Antiqueños Community Website - Province of Antique, Philippines

Saturday, November 22, 2008

Text Size

Istorya ni Nene

Posted by Jigsz

Hapon run kang nag-abot si Nanay halin sa obra na sa banwa. Nagutom run gani ako kag ang akun libayun nga si Ontoy, ka-sagi hulat kana tungud wara run kami ti bugas kag darapliun sa panyapun. Mayad run lang hay nakabakal tana kang amun karan-un. Ginbuligan ko si Nanay tig-ang kang darwa ka leche nga bugas nga hasta run dya sa amun pamahaw kag igma sa rum-an. Ang darwa ka bilog nga hawol-hawol ginbuug ko sa baga nga halin sa pagtig-ang. Gintago ko ang tatlo pa kabilog para sa sunod nga adlaw. May sinamak pa man kami nga gamay para sawsawan kag padugang gana. Ugaring hay bisan ganahan pa ako magkaun wara ruman ti kan-un pa tungud nga gin-tago para sa pamahaw kag igma sa rum-an. Amo dya ang amun pangabuhi nga akun madumduman halin pa kang ginbaya-an kami ni Tatay. Si Nanay naga-panglaba kag naga-pamalantsa sa balay kang sangka negosyante sa banwa. Kung kaisa, ginatugruan man nanda kami kang mga delata nga sardinas kag iban pa nga mga pagkaun. Maalwan man ang pamilya kang amo ni Nanay. Gani nga bisan kung kaisa naga-pamangkutanon ako kung andut tama gid kalisud ang amon kabuhi, ginapinsar ko run lang ang mga mayad nga butang nga naga-abot kanamun, bisan gamay lang pero nagatugro kanakun kang paglaum sa kabuhi. Nga sa tunga kang tanan nga pangabudlay, may ma-abot man nga kahilway. Mapadayun ako nga mag-tuun kang mayad kag tutum agud nga makatapos kag makakita kang manami nga obra. Kag makabulig ako kay Nanay kag sa akun libayun. Kung kis-a nagahibi ako nga makita ko si Nanay nga daw nagmal-am run gid ang ana nga hitsura. Ayhan duro ang ana problema ugaring wara na gina-sugid kanamun. May kaugut ako sa akun Tatay nga tama ka talawit. Gintalikdan na ang kabudlay kag nagsunod sa pangalipay nga panglawasnun lamang. Wara ti may matabo sa akun kabuhi kung ang kaugut sa tatay ko ang akun atupagun. Bata pa ako kag may damgo man ako nga dapat agumun. May tatay ukon wara, lab-utun ko ang akun damgo. Para kay Nanay, kay Ontoy, kag kanakun.

(Ang dya nga sinulatan gin-bugna lamang kang akun imahinasyon)
Add as favourites (18) | Quote this article on your site | Views: 797

Comments (6)

	1. 05-02-2008 04:05
	Nang Jigz, dumduman ko man akun nagligad ba, hehe. Amo man kami ka dya sang-una, imol bay. Pero tanaga man lang, tandus man tana abi akun Tatay, alas dos pa lang ga bugtaw run kag mag-arado. Amo nga bisan pigado nakatibawas man gamay. Nang, ang kalbo mo bala nga bosabos to ang post rugya, hahaha! Nami to, very natural ang pagsulat but full of emotions! Registered Report

zeanra7

	2. 06-02-2008 17:16
	nasibit ruman kang perdible ang akun nga nang jigz, naka relate gid ako sa imo nga istorya ba, daw parihas man kita nga inagyan sa pangbuhi, pati hawol hawol gina tipid kag sardinas nga gin utang pa kay manding sa tiangge akun madumduman pa..si nanay kag tatay aga pa mag halin sa balay kag mag sagap kang makakita kang parangabuy an., nga pakaun sa andang mga bata nga nagutman. pero sa urihi nga tinion gali, ang pag himurat maka tibawas man kita sa kapigaduhon.. Registered Report

edemadethird

	3. 06-02-2008 17:27
	nasibit ruman kang perdible ang akun nga nang jigz, naka relate gid ako sa imo nga istorya ba, daw parihas man kita nga inagyan sa pangbuhi, pati hawol hawol gina tipid kag sardinas nga gin utang pa kay manding sa tiangge akun madumduman pa..si nanay kag tatay aga pa mag halin sa balay kag mag sagap kang makakita kang parangabuy an., nga pakaun sa andang mga bata nga nagutman. pero sa urihi nga tinion gali, ang pag himurat maka tibawas man kita sa kapigaduhon.. Registered Report

edemadethird

	4. 06-02-2008 17:31
	sorry po sorry po..double post.. moderator please delete the other 1 posted.. correction*...for for title: "nasibit ruman kang perdible ang akun nga dughan ba!" Registered Report

edemadethird

	5. 07-02-2008 00:54
	sorry po tito 3rd, abi ko kung ano run to nasibit ... sakto gid ra ang imo hambal parte sa paghimurat ... puede man magtultul kang asin gani. ukon kalamay nga pula kag kan-un; katiraw kaw man kaun kang patis (toyo) kag mantika samo sa kan-un? Registered Report

Jigsz

	6. 14-02-2008 11:42
	daw mahibi ako!!! daw mahibi ako sa gnsulat ni nang jigzs ba.... Registered Report

mai

Only registered users can write comments.
Please login or register.