Ang kalipay ni Badong

Yehey! Salamat sa Diyos Sabado ruman sarum-an.

Hambal ni Badong sa anang kaugalingun. Inugtapos run kadya ni Badong sa kolehiyo sa anang darwa ka tuig kurso nga Information Technology sa sangka eskwelahan rugyan sa banwa kang San Jose  Perti gid ang anang pagpasalamat hay makapahuway ruman tana ka darwa ka adlaw pagkatapos kang lima ka adlaw nga pagpalitik kang anang ulo sa pagsabat kang mga exam kag mga asaynments sa eskwelahan kag sa makatiringil nga baba kang anang agi agiun nga maestro sa kemistri nga suno sa kalabanan ka mga estudyante sa anang eskwelahan, tam an ka supladokag istrikto ang diyang maestro pro mayad tana kadya ang pagtamud na kay Badong hay pirme ni Badong gina top ang anang mga exam kag gina paobra nga aktibidad. Pirme na lang gani kadya gina himo nga ehemplo kang kamayad si Badong sa anang mga klasmeyt nga bisan libro tamad mag dara sa eskwelahan.Kun kis-a gani gina sunlog pa kang mga klasmeyt na si Badong nga crush tana ni Sir na nag gina yuhum yuhuman lng ni Badong.

Indi kamo  kamaan mag angga sa laon mong! Yamuhat nga sabat ni Badong sa anang mga klasmeyt kada sunlog nanda kana.

Badong dali bala anay! Malulo nga tawag ni Sir na kana samtang naga girinuwa ang andang mga klasmeyt nga kalabanan kaina pa ga dali mag uli.

Ano to Sir?May respeto nga sabat ni Badong.

Palihog ko anay hambal sa mga klasmeyt mo nga basi indi ako maka klase kaninyo sa Lunes hay may tambunagn ako nga seminar.Nalipatan ko abi hambalun kaninyo kaina sa klase. Hambalun mo lang sanda nga ma agto sa library kag magtuon kag ikaw ang ma lista ka attendance ha.

Yes sir.

Salamat gid Rey. Bye!

Reynaldo ang tuod nga ngaran ni Badong kag kalabanan nga tawag kana sa eskwelahan amo ang Rey hay medyo class kuno pamatian kag nanamian man tana.

Dali dali man nga nagpauli si Badong sa andang Balay pagkatapos kang estoryahanany nanda kang anang maestro. Mga alas singko y medya run sa hapon ang andang buhi kag gahingagaw tana mag uli hay masag-ub pa tana kag manamog kang andang mga ginasagod nga sapat. May mga pirabilog tanda kadya nga bisaya nga manok kag idik nga ginsagod ni nanay na sa maninay kang anang libayun. Kag sara man sa anang gina dalian amo nga ma mati pa tana kang programa kang anang paborito nga DJ sa Radyo Natin San Jose. Saulado run ni Badong ang programa kang amo nga estasyon hay pirme tana gid rugya gapamati kun rugyan tana sa andang balay bisan may obra pa tana.Kis-a gani naga pakitluoy tana sa andang piyak balay nga ma huram ka celfone para mag greet kag rekwest kang kanta sa radyo  Mahilig si Badong sa musika nga klase ka tawo nga masinadyahun tana nga klase ka tawo pirme lang tana kadya naga kanta kanta bisan nga libagun tana kag amo man diya guro ang rason kun andut raku ang nanamian kana kag raku ana abyan sa eskwelahan kag bisan diin tana maagto.

Naga panamog gid si Badong kang andang indik kang nag-abot si nanay na.

Bisa ko nay! Gindab-ot ni Badong ang tuo nga alima ni nanay na kag nagharuk sa pagtahod kag pagpangayo kang bendisyon.

Rugya kaw run gale gha?Kaina kaw pa?May tono kang pagpalanga nga pamangkot ni nanay na kana.

Huod nay.Naka pamubod run man ko kang mga manok ta.

Mayad gid hay naka panamog kaw run.Nakapoy gid ako ka abi kang libot kang baraligya ko nga linaga kaina. Nagabihan gani ako hay gamay naga bakal. Halos tanan nga tanyagan mo gapanghakruy sa kapuraut ka pangabuhi sa tulad. Bisan si manong mo Ontoy nga engineer kag nars si manang mo Nenet nga sawa na gareklamo. Mayad gani hay nalubsan ko mga naga irinum diyan ay sa minoro gin ubos da  ka bakal linaga ko.Mayad man hay bag-o lang sanda ka padarawat kang andang ginaraban.Ga reklamo man to gani sanda nga gamay lang ginaraban da hay ginhapay ni bagyo Angelina ang mga gararabun kag nagrulubung sa lao. Bati ko gani naga paluya to gha si nang Estring hay lugi gid tana sa anang patubas.Wara na mabawi gasto na. Maluya nga hambal kang anang nanay.

Amo man gani nay.Bisan sa tindahan sa San Jose kun turukun mo daw Biyernes santo hay gamay lang naga panindahan.Husto lang manimuko sa andang pwesto ang mga negosyante. Ano bi hay imbes nga mamensar ang atun mga lideres kang ikamayad kang atun ekonomiya ang inaway tana anda kag bantayanay mong. Ambay kun san-o pa tana mauntat ang amo diya nga klase ka sitwasyon sa atun politika?Sabat ni Badong kay nanay na nga may dara gamay nga panghahay.

Matadlung nga sabat ni Badong kay nanay na. Basta parte sa naga karatabo sa palibot kag may angut sa  sosyedad ang gina istoryahan medyo tarum kadya ang anang pensar. Kang naga edad tana kang kinse anyos nangin SK Chairman run tana kang andang baryo.

Sige nay pahuway run to sa sulud hay mayapon run kita burubhay.Gina paarangan ko pa to tinig-ang ko. May gin hatud diyan kaina si Nang Delia nga dapli hay berdey kadya kang bata na nga si Darwin. Si Delia pihak balay diya nanday Badong nga daw paryentehanay ang pagkilalahay nanda.

Pagkatapos kang iyapon nag rebyu kang makadali sI Badong kang anang mga leksiyon kag nagturog.

Uhmmmmmmmmmmmmm. Abaw naadlawunan ako ba ka bugtaw. Diin run si nanay man?

Nagpanaw run si nanay nong kaina pa naglibud kang laswa. Wara na kaw ginpukaw hay muuk gid turog mo kaina mong. Nakapamahaw run man kami nong.Gin tigan-an kaw to namun.Panginsapo lang to sa kusina ah. Hambal kang anang libayun nga sa tulad inug gradweyt run man sa hayskul.

Sige gha. Salamat. Pagkatapos ko pamahaw buligan mo ko manglaba ha.

Ok nong.

Darwa lang sanda ka anang libayun ang magbugto. Darwa pa lang ka tuig si Badong kag gina busogn palang ang anang libayun kang napatay si tatay nanda. Karpintero si tatay nanda kag nahulog diya sa tambara kang andang gina obra nga balay kag umpisa kato si nanay nanda ang nagtigayon kang andang pagpangbuhi paagi sa pagpananum kang ralaswahun sa bakante nga lote sa likod kang andang balay kag sa paglibud sa andang baryo kang kun ano ano lang nga pwede ma kwartahan agud nga may barakal sanda ka bugas kag inugplete pagto sa eskwelahan adlaw adlaw. Mayad lang  gani hay mga maaram kag tadung nga mga bata kanday Badong amo ra nga wara nagduha duha ang andang tiya nga laon nga gapangamo sa Hongkong sa pag bulig kay nanay nanda sa pagpa eskwela. Mga kinse anyos run man nga naga pangamo ang andang tiya sa Hongkong kag wara gid sanda kadya ni Badong naka kitaay okun ka istoryahanay.Hasta gid lang sa sulat kag litrato.

Samtang nagapanglaba si Badong kag ang anang libayun nagapamati sanda sa andang paborito nga estasyon kaimaw kang anang paborito nga DJ.

Goodmorning Antique, rise and shine Antiqueños!Malipayun nga pagpamati sa 91.7 Radyo Natin San Jose. Welcome to Saturday Showdown with you friendly DJ Viktoria.At sa lahat ng ating mga kababayan saan mang sulok ng mundo  na nakikinig sa atin via Kinaray-a.com maayad ayad gid nga adlaw kaninyo. Alam nyo ba na ang Radyo Natin San Jose ay mapapakinggan na live sa buong mundo through our very own Antiqueño website Kinaray-a.com?So sa mga kaibigannatin diyan na mahilig mag internet please visit this site at siguradong mag eenjoy talaga kau!

Ha? Ano kuno to hambal ni Dj Viktoria?

Batian run kuno nong ang Radyo Natin Sa bilog nga kalibutan paagi sa website nga Kinaray-a.com.Sabat kang anang libayun.

Ay tuod kaw?Abaw mayad gid eh. Gapamaan lang diya nga naga ugwad man ang atun mga pumuluyo kag atun probinsya. Ano kuno to Kinaray-a.com?

Huod nong.

Manami gid ang yuhum ni Badong sa anang nabatian.Samtang naga kusu kang anang gina labhan:

Ay! Nalipay gid ko  hay may nag bag-o man sa dagway kang Antique kag bangud nga naka kita ako kang sangka opurtunidad nga maka komunikar kay tita sa madasig nga paagi samtang naga pamati sa  akun paborito nga estasyon kag DJ.Nalipay man ako hay ana ginapanuruk nga madugangan pa gid ang akun mga abyan kag ka kilala sa iban nga bahin kang kalibutan paagi sa diyang website.Salamat gid sa teknolohiya kag sa mga tawo nga sa likod kadya..Dalia gha para maka panghalay run kita antes mag abot si nanay.  Sa Lunes aga pa ako ma internet sa library.

	1. 28-02-2008 20:11
	gud boy badong mayad nga bata. Registered Report

linapuhan

	2. 29-02-2008 11:40
	gud boy badong nagayuhom yuhom man ko magbasa fafa stephen kang imo nga ginsulat ba...very inspiring tana ja. Registered Report

0o_alterego_o0

Only registered users can write comments.
Please login or register.

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved