Mayad gid nga adlaw sa tanan! Kabay pa inyo man ja mauyunan... :)

Diin timu kabatyag pagpalangga kang kasiringan?

-dalidali ngayo dapli kun nagutman?

-huram kaldero kun kamu nakulangan?

-remedyo paramasahe kun nawad-an?

Hay rugto lang…

Diin timu makakaun kang pighol kun naubusan?

-katanuk saging sab-a pang meryenda man?

-makapagusto higup kang linapwahan?

-makainum tuba imaw kamal-aman?

Hay rugto lang…

Diin timu katiraw turog sa papag nga kawayan?

-batyag bugnaw ka banig nga baratangan?

-katurog muok kay may muskitero man?

-kapin pa may arinola sa sikwayan?

Hay rugto lang…

Diin timu makabati panihol kang kapispisan?

-kakita duro nga karbaw sa turugban?

-kanding nga hilamon ginaaragawan?

-baboy, idik gairiwik sa pasungan?

Hay rugto lang…

Diin timu makatiraw sadsad sa mga baylihan?

-birabira saot nga gatsinelas lang?

-ka ’sabay’ sa daraga o soltero man?

-karequest ka box hirimuon sumsuman?

Hay rugto lang…

Diin timu kakita kaduro nga kaparyentehan?

-maglagaw sa karsada bisa sa tanan?

-kakiritaay orig nga barkadahan?

-mabatyagan tuod gid nga kalipayan

(imaw si nanay, tatay, kag kabugtuan)

Hay rugto lang…

Diin pa bi? Sa probinsya ko…Probinsya ta…

Sa Antique lang.

J

Godbless sa tanan!

	1. 11-12-2007 21:18
	nami nami Ai...sakto gid ja, rugto lang sa antique ja matirawan ang tanan! Registered Report

zeanra7

	2. 14-12-2007 00:05
	Ayos! Ai,ayos gid tana imo nga binalaybay nga dya.Te kon butangan dya mga nota, manami gid dya nga kanta.Gadugang man homesick ko ba...hay rugto lang.. gid man sa aton probinsya ang bulong kang kahidlaw ko nga dya... Registered Report

MarilouCares

	3. 15-12-2007 14:13
	shlamat shlamaat gd... sure, kun may maobra nota kang mga binalaybay mas sadya.. hehe. Godbless gd sa tanan. :D Registered Report

futiefutz1

	4. 06-02-2008 20:49
	shlamat krrruuuuuhaaaayyyyy!!!!!!!!!    iba gid tana ang kalidad kang antiqueno...    proud antiquena!! Registered Report

mhohayl_snap

	5. 06-02-2008 20:50
	shlamat myesta kamu culasi 1st of march!!! Registered Report

mhohayl_snap

	6. 07-02-2008 19:13
	salamat gid liwan salamat gid ha! halin gid sa kaibuturan kang akun tagipusuon,,,, hehe. ahay, di gd makapamiyesta, ja abi sa manila... enjoy, happy Fiesta! Godbless! Registered Report

futiefutz1

Only registered users can write comments.
Please login or register.

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved