Ginsulat ni: Linda Arnaez-Lee

(Sulod si Biboy nga naga lungu-lungu.  Ginalantaw kon may tawo sa palibot.  Pagkamaan nga wara ti tawo, dayun na kuot kang anang bulsa.)

“Ako si Biboy, ang hari sa paupas damang!  Kada sirum, rugya ako sa likod-balay para magpakaun kang akun sinakpan nga si marka Diablo.  Ha! Ha! Ha!  Wara pa ti may naka pierde kanakun! Kita nyo kon ano dya? Ka-ha!!  Kaha kang posporo! Ha! Ha! Ha!  Rugya naga hukmung ang alaga ko.  Abi marka Diablo pagbugtaw! (dayun huyup-huyup kang posporo)  Oras run para mag yapon!  Sige!  Lagsa si bulian! Ha! Ha! Ha! Dan, dan!  Amo kara!  Sige pa!  Ha!  Ha!  Ha!  Barambudi kang lawa mo!  Sige pa!  Putsa hasta indi kahulag!  Tapos uyuti sa buli!  Ha!  Ha!  Ha!  Sige magpakabusog kaw hay sa rum-an ma derbi kita rugto sa likod kang eskwelahan.  Kinahanglan pierdihun mo gid ang damang ni Bentot!  Ha!  Ha!  Ha!  Sige pa!“

Tok!  

"Araguy nong!  Este nang gali!  Ginapakdol mo ruman ako sa ulo?!”

“Huod! Wanhaw?  Hoy Biboy!  Kapira kaw bay hambalan nga indi mag agto sa likod balay kon sirum run hay duro lamok?  Rugya kaw liwan?  Ay abaw…kanami kanimo guripatun…!”

“Araguy! Araguy nang!  Indi pag guripata talinga ko!  Daw malabadyang run ria kalapad sa sagi mo kg guripat!”

“Buligi ko to kahimos ay, damang tana imo.  Kar-on damang ang ipayapun ko kanimo.”  Si manong ria, ang gurang ko nga santunga.  Santunga bahi, santunga man laki.

“Sus, si manang bala haw… Abi mo nang, ga dugang gali ang gwapa mo kon naga ugtas ikaw,hehe.”

”Ay tuod kaw Boy? Ha-haay!  Amo ra gusto ko kanimo hay ga sugid kaw tuod.” Gulpi lang nagkambyu ang modo ni manang pagkabati  kang dayaw ko.

“Tuod  tana ra nang!  Bisan mangkuton mo pa si Nanay.” (uruk-uk kadlaw)

“ Hala, dasiga!  Basi maabutan kita dya ni lolo.  Kar-on baston gid ang maghusgar sa byuti ta nga darwa, ha haayy!” (kiay-kiay)

Tok!  Tok!

“Araguy! (Biboy)

“Araguy!(Bibang/Bobong)

“Lolo!!”

“Hoy mga toto!  Abi nyo maisahan ninyo ako?  Bisan ga dukoy-dukoy lang dya si lolo nyo, masanag pa ang panurukan.  Makatuhog pa gani ako kg dagum ni lola ninyo,hehehe.  Kapira ta bay kamo hambalan nga indi gid kamo mag agto sa likod balay kon sirum run hay tag ralagaw kg kama-kama?!  Kag…Biboy?  Bobong?  Sa diin run kamo?  Ginpalagyuhan nyo ruman ako?  Paano to sanda nakalampuwas sa panurukan ko?”

Amo dya pirmi ang eksina sa likod balay sa tagsa nga madakpan ako rugto nga nagapaupas ukon naga pangita kg damang.  Magluwas sa magurang ko nga Agi dyan pa si Lolo nga ulianun kag bungul nga nagapugung kanakun.  Pero indi pwede nga mapunggan ako, sa rum-an run ang derbi kag kinahanglan mahanas kag mabaskug si marka Diablo.  Kag…danay kaw, daw sa ginaramigan ako haw.  Ano man, trangkasuhon ako?  Daw wara man ako mataritihan kaina.

“ Hoy, Biboy!  Naano kaw?  Ano sagi mo ka sikmuru dyan?”

“Ginaramigan ako nang kag nagakutoy busong ko.”

“Hala!  Kag may lagnat kaw pa!  Basi kinagat kaw kg damang kag na inpeksyon kaw?”

“Wara mong!  Ako ang hari kang damang…”

“ Ano nga daman?” saligabat ni lolo.  “Nagadaman timo nga naga mukra man ang mata mo?”

“Maan kanimo lolo, may lagnat si Biboy kag ga sakit busong na.”

“Ha?  Basi gintuyawan  ikaw kang kama-kama? Kag lantawa bala dyang naga purula sa alipudwan mo?  Sus, santisima!  Ipatawag si Piryong!  Ang pinakatanda nga manugbulong rugya sa atun baryo!” Kag ginpatawag nanda si Piryong!

“Ha- haaaayyyyyy!!!( panguy-ab.  Dayun kumod-kumod samtang ginahuyupan ang luy-a kag ipahid sa ulo ni Biboy). “Ha-haaaayyyy!  Ay abaw, ginsipalan si Biboy kang idalmunon sa inyo likod balay.”

“ Ti, kuon ko gid mong! Siguro gin hilabtan mo gid to ang bungyod sa likod balay.”

“Wara 'Lo ah, para nagpungko man lang ako to samtang ga paupas damang..”

“Ayti, kon napungkuan mo bay bungot na!  Hay wara kaw gid ga pamati kang hambal kanimo.  Ti, ano mayad kadya?”

“Daw indi dya madara sa luy-a lang.  Kinahanglan dya gid nga obrahan.  Kinahanglan ang manok nga bukay nga itum ang kahig kag….”

“Mayad nga sirum kaninyo nga tanan!”

“Ay!  Ano to ang naga-uwang?” pamangkot ni lolo.“Ang radyo puwak rugya sa atun baryo, abi mamati kita.” Tapna ni manang kay lolo nga mahirit pa raad.

“Ginapanawagan sa tanan nga mag-andam gid sa sakit ng Dengue!”

“Ano kuno? Dangue?” pamangkot ni lolo.

“Dengue kuno lo!”

“Ano?  Frangue?”

“Dengue! Lo! Dengue! Ay, daw madura pagka agi ko kanimo.”

“Aw, Dangue!  Abi ko Dengue!”

“Kon makagat kamo kg lamok nga may dara nga baktirya kang Dengue amo dya ang mga patimaan nga may Dengue ikaw.  Una, nagasakit busong mo kag naga saka-naog ang lagnat.”

“Boy, indi bala sakit busong mo? Basi nakagat kaw kg lamok sa likod balay nga may Dengue!”

“Huud nang, kag naga saka-naog ang lagnat ko.”

“Hala! Basi may Dengue kaw?”

“Ano nga Dangue?  Gintinuntuhan tana ra kg kama-kama.  Uhud, may inagyan pa gani, ga purula!”

“Pangarwa, naga purula ang lawas ukon may “rashes” sa inglis.”

“Boy, may “rashes” kaw man.”

“Pangatlo, kon grabe run gid, nagadugo ang irong.”

“Maan, wara man tana nagadugo ang irong mo Biboy, indi bal---Biboy, naga dugo ang irong mo!.” Tyabaw ni lolo.

“Kon may amo ka dya nga sintoma, dar-a lagi sa pinaka marapit nga ospital.”

“Ay ti, ano pa ang ginahulat ta? Hakwatun ta run si Biboy!” Ang mandar ni Lolo dara kumpas kang alima.  Kag ginburuligan nanda ako kang hakwat.

“Ay, dali lang! Daw mahulog ako! Aaahhhh!”

“Boy, Biboy!  Bugtaw!  Abu…ano run tana nga turog ria.  Ga karahulog timo sa katre!”

“Ha? Damgo lang gali to? Daw tuod ba.  Salamat hay damgo lang.(kapot sa irong kag lantaw sa kalawasan)  Diin gali si manang Nay? Ay manong gali?”

“Rugto sa likod balay!”

“Ha?  Ga iwan to?”

“Ga panglimpyo.  Uso kuno kadya ang Dengue , amo nga ga panglimpyo to si manong mo.”

“Ang damang ko?”  (kapkap sa bulsa)

“Kag ginapanawagan nga indi sagi pamatay ang damang hay amo ra ang makabulig tapna kg lamok paagi sa anda lawa."  

" Hala ibuy-i to ra ang damang mo kag buligan panglimpyo si manong mo.”

“Huud Nay.”

“Diin kaw liwat maagto Biboy?”

“Lolo?!”

******TAPOS******

	1. 19-11-2007 10:10
	abaw ang damang gid tana imo ba, gakamang bay ra? sadya gle si Lolo nga ra ... gina-imagine ko lang kung may maglubad karia ba ... Registered Report

Jigsz

	2. 19-11-2007 19:28
	Nami. Dumduman ko kabataan ko katong nagapaupas man ko damang. Hindi pa dengue to ang uso, H-fever pa to ang uso... Registered Report

spidamang

	3. 23-11-2007 22:42
	Damang gid eh tana... Kang bata pa ako, ang damang gid ang akon gina supalan...  gina baylo ko pa gani raan kang papel sa school, kag lipatan ko gani igma ko kan mong... hinali mag pamito si tatay, naga karawigit ang akon notebook ka dalagan pauli, senyales nga nga my nagsugid kay nana nga naga paupas ako damang, ang akon pakaisa bala nga to.. pirme ko tana gina sumbag kung nabalbal dun ako sa buli. mabalos gid bay ako, amo ra ang akon experience.. hahahahaha Registered Report

are_nize77

	4. 29-11-2007 13:54
	salamat salamat sa komentar. entry ko daad ja sa dungug kinaray-a, garing indi ako pwede ka intra,hehe. rugya ko run lang ipasundayag sa k.com.     salamat hay naka relate man kamo. Registered Report

zeanra7

	5. 14-03-2008 07:24
	damang hi ng, nami storya mo ba, wara garing takun pagpaupas kang damang, labug-labug lang. hehe. wara gid ako ti ideya sa dungog kinaray-a kag sa mga tiyempo hapon. tanx for the kind comment. im so flattered to receive a thumbs up from a very good writer like you. tanx tanx Registered Report

linapuhan

Only registered users can write comments.
Please login or register.

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved