(Nakamaan bala ikaw nga Kinaray-a ang panghambal kang karak-an sa isla kang Panay? Pero kalabanan kananda wara nagagamit kang andang kaugalingon nga panghambal…. Basi gusto mo magpamangkot kun wanhaw?)

Ang awto kag ang karusa

Rayu gid kun ikumparar ta

Ang tanda kag suruklan dya

Pangabuhi sa syudad kag uma

 

Sa pagpanglugayawan kang tawo

Halin sa uma sa syudad paadto

Pagginawi kag hambal ginabaylo

Tungod nga ginakahuya didto

 

Kinaray-a, ano bala ri-a?

Tawag sa panghambal sa uma

Nga kun mabatian gani kang iba

Nagakuon….. Baw! Kabuki gid ah!

 

 San Juaquin, Miag-ao, Guimbal, Tigbauan

Sipak sa Ignaras, Leon kag Tubungan

Deretso sa San Miguel kag Alimodian

Ilabi sa Antique kun imo adtunan

 

Karay-a imukra ang imo mga mata

Panghambal mo indi pag-ikahuya

Magpakamalig-on, ipakita kananda

Ang pat-ud nga mga ebidensya:

 

Tama gid karayu ang "ayam" sa "ido"

Pero kun may alog kanimo magpatudlo

"Mangangaso", ano ang tawag sa inyo?

Indi pwede "mangingido", Kag pat-ud "mangangayam" isabat mo

 

Amon "busong", tawag ninyo "tiyan"

Sa bayi, kang bata pagasudlan

"Nagabusong" ang tinaga dyan

Indi man pwede tawgun "nagatiyan"

 

Lakat ka "tiil" panaw kaw "kahig"

Sa pagtugpo kang manok ikaw magbulig

Indi kaw gid pwede "magpatiil"

Hay sa bulangan ang tawag "pakahig"

 

 Sa imo pag-uli ikaw gutom run

Ang "pagluto" ukon "pagraha" himuon

Kag sa diin ikaw magaprito kang isda

Sa "kaluto" ukon sa "karaha"?

 

Gani Sta. Barbara, Maasin, Mina

Kag sa Antique nga probinsya

Aton hambal ginasunod-sunod nanda

Magtindog kag ipabugal ta......

Kita mga........ KARAY-A!!!!!!