Gutuk ang dughan nga ginsulat ang mga tinaga kang PANAHON pira ka oras tapos nga una ginflash sa TV ang video footage kang  maluib nga pagpatay kay Ninoy sa tarmac. Ang malolo nga ilig kang tagolaylay-bisaya akun ginhugut kag ginpabiti ang anang lapdus dara kang kasingkal kang baratyagun. Ang linya sa sulud kang () amo ang orig nga dinalan. Nangin experimental ja nga kanta kag akun kato gintawag Habug Kinaray-a o kon Karay-a Rock kay may hagyon kang Rhapsody kag may influence kang Stairway to Heaven. Pamatii palihog ang demo tape.

Ang PANAHON kabahin kang mga kanta sa rock musical nga Maragtas.

PANAHON                                                                                                                                    Binalaybay kag balaylay ni Bernie L. Salcedo

Haros laban kang panimalay karon

Kulang sa adlaw-adlaw nga kinahanglanun

Haros run mahingagaw taboon

Ang andang aga kag hapon.

Doro ang nabolid sa kalainan

(Naggamit kang bahi nga kalakasan) 

Nagsamad kang duna nga manggad kang kalibotan

Natonaw ang kamatooran kag ang kalinung

Nagtohaw ang patalangay kag hinorong.

Ah ha hah aha! Iba tulad ang panahon.

Haros laban kang kasimanwa ta karon

(Ginakulbaan manumdum kang paraaboton)

Ginakulbaan sa pag-abot kang taggurutum.

Haros pa lang anda nga pasolabihun

Ang magtabok sa pihak nga baybayun

Agud rogto pangitaun ang kapalaran

Nga di-masapwan sa lupa nga tinobo-an

Sa diin ang mahakug kag ang makusug nagadaug

Kay ang mga but-anan wara mangisug magtindug.

(Iba tulad ang panahon, sa kagarokan may makaun)

Ang kapat-udan kang pagkaun

Magapabilin lang bala sa handum?

Bosong nagaragokrok, torog di-mahamuuk

Magarot ang panahon, panahon!

Maiwat ang pangabohi, liwan ang pag-inogali

Maiwat ang pagkaun.

Ay, kasan-o lang

Ang uran kag ang init nagapatobo kang pilit

Ang soba kag ang dagat nagapabug-at kang alat

Kasan-o lamang...

Ang lopa kag ang tanun

Nagabosong kang paglaum

Ay, ang hangin kag ang pispis

Ang ginalaylay lunsay matam-is

Kasan-o lamang

Kasan-o lang. 

                    END
 

Only registered users can write comments.
Please login or register.

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved