Nagaturo ang akun luha kadya hay na-miss ko run ikaw. Ilabi na gid kang nabatian ko nga nagpanaw kaw run sa iban nga lugar. Daw ka san-o lang nga nag-imaway kita rugya. Kag daw hindi manami ang atun pagbulagay? Kabay nga napasaylo mo ako sa akun mga ginpanghimo nga hindi mo nagustuhan. Tungud nagapalangga-anay kita, daw nadura lang man ang mga hindi manami nga mga baratyagun nga to. Mayad lang nga nagapasensyahanay kita.

    Amo gid man ra kung magburugto, may oras nga naga-sampukanay ang atun ideyas kag pagsirinayo. Pasalamat lang kita nga bisan ano nga pag-supok kang mga nagakaratabo, hindi gid maguba ang atun relasyon bilang magburugto kag magkapamilya. Hay sa urihi kita man gihapon ang mag-irimaway. Bisan may kabudlay nga maagyan wara ti kaso ria basta rugyan ang suporta kang kada isara sa isara. Bisan rayu-ay kita nga lugar rugyan ang naga-bugkus kanatun bilang magburugto. Ang pagpalangga nga gintudlo kag gintugro kang atun mga ginikanan kag kang mahal nga Diyos amo ang magtulud kanatun nga mag-atubang kang kung ano man nga matabo sa adlaw-adlaw.

    Karon nga rugyan run ikaw sa bag-o nga lugar, ang akun handum kag pangamuyo para kanimo amo nga mangin mabaskug ikaw sa tunga kang kabudlay kag kasubu, kag mangin madinalag-un ikaw sa imo nga pinili nga trabaho; nga malab-ut mo ang imo mga handum para sa imo lawas kag sa imo nga pamilya. Kabay nga pirme ikaw magparapit sa Gino-o hay tana lang ang nakamaan kang tanan kag gamhanan sa tanan.

	1. 20-07-2007 08:23
	Natandug gid akun baratyagon ba Jigzs. Life is always thus. God bless those who have the humility to accept their failings and failures. Basta itablug lang ang mga unnecessary unwanted "excess baggages" within ourselves para mag-an gihapun atun pamatyag. Nobody is perfect even how hard we try. Pleasing others for that matter will not solve the problem anyway. I think it's better always to be broadminded especially understanding other persons' faults and failings also.   Guest Report

vicpjr

	2. 21-07-2007 20:11
	tita jigz miz man kta...manami guid man nga gamitun natun ang atun dialekto nga kinaray-a perme bisan sa ano nga topiko. Na realisar ko man gani kang General assembly forum kahapon sa LIRA (Linangan, Imahinasyon, retorika at Anyo) sa UST, manila. Isa guid ka dako nga challenges kang antiqueno writer nga makilala man sa Pilipnas ang atun mga nabal-ag o bisan sa maniki nga handum maangot man natun sa rehiyonal na panitikan ang kinaray-a. Sulat lang nga sulat ah!!!! Guest Report

artebadong

Only registered users can write comments.
Please login or register.

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved