Ang pulong liso

Nga ginsab-og kang Tagtuga

Sa hardin kang akun pagsulat: 

Kada dukut sa lao ko nga pamensarun

Nga gin arado kag ginbunyagan

Kang kalipay kag kahidlaw

Sa akun nagriligad kag tulad,

Paglaum nga gahandum magpasad

Kang maduagun nga kalibutan-

Ang tagsa ka tinaga kag metapora

Bukad nga gaili-ili kang kada musa

Nga gahandum maghalad

Kang mga singgit kang baratyagun

(ukon luyag magtiraw kang nektar kang kabug-usan kang iban);

daw ako,ang alibangbang kag buyog:

ginakulbaansa tagsa ka tag-irinit nga gaabot.

Mayad lang hay ang pulong kag ako isara; 

Mangin apa man ang pangako ko sa tagramig,

Maupos man sa kasingkal ang akun parangadiun,

Ang pulong nga naugduk sa lupa nga ginpugadan

Kang gugma (nga amo man ginapamugadan ko)

Padayon nga magapamukad,magapahamot, kag magapinta

Kang mag duag sa akun papel bilang bag-o nga hardin

Sa dason nga pagpanaringsing kang kabuhi.

Only registered users can write comments.
Please login or register.

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved