Antiqueños Community Website - Province of Antique, Philippines

Friday, September 3, 2010

Text Size

PAGBAG-O

Posted by carlo nicholas serapion curatcha

Sa karsada nga akun inagyan, duro ang sarait

Ginhawa ko gidlang kaandam hay basi ako magsab-it

Nagtihin ako agud indi ko malapakan ang mga siit

Pero wara ko gid malikawan ang makabatyag kang sakit.

Ang taramnan nga akun nalubsan, akun ginpanggasan

Kang akun mga talento kag akun nga kaaram

Sa akun pagpabaya, nalipatan ko abunuhan

Gani ang akun ani, upahun kag daw pasapayan.

Nagtiraw man ako mamanlo sa tunga kang kagab-ihun

Bitbit ko ang sulo, tigdawan kag ang akun nga taun

Sa akun pagdali-dali, nahulog ako sa kahon

Nagpinalagyo ang mga haruan kag pantat nga akun daad salugon.

Nag-abot ang adlaw nga ako daw gintamadan

Mag-obra kang mga bagay nga daw indi ko masarangan

Hay daw wara't pulos malang ang akun mga pinangabudlayan.

Gadugang lang ang paranakit kang akun kalawasan.

Pero, ako naturugan sangka adlaw

Sa akun pagbugtaw, ako nagkadlaw

Ang akun taghipusuon, indi kapugung sa paghugyaw

Hay nakita ko, sa likod kang gal-um, gayuhum ang adlaw.

Panahon run siguro para ako magbag-o

Gamitun ko sa mayad ang akun kaaram kag talento

Sundon ko ang mga panglaygay ni lola kag ni lolo

Nga ang mayad nga paraabuton, depende sa sangka taho.

Comments (3)

	1. 27-06-2007 10:24
	nami kag tuod gid man. wish more people, esp the younger generation (the 'desperate' ones) would take to heart the moral lesson of this poem. Guest Report

vicpjr

	2. 24-04-2009 11:10
	? ako? by: franz vincent aguilar sin-o bala ako? isara ka manugbinalaybay sa banwa ka san joaquin nag-agto ridya para mangin isara man nga kabahin manugbinalaybay nga bisan sa diin-diin nagpasundawag kang sarang nga indi mabitin sin-o bala ako? sa kada oras kang akon pagpangabuhi pagtukod kang binalaybay ang guinapasulabi lain guid ang ugali sa mga himata kag paryenti pinasahi nga pasi nagdapon sa binhi sin-o bala ako? may kinaiya nga pagkatawo may abilidad nga ikasarang bilang ipamato tinaga nga ginabuy-an madalum ang guin halinan kang ordinaryo nga tawo indi maintindihan ako dya kang akon mga guinikanan ako dya kang akon himata kag kaparyentihan kang mga kairimaw ko sa obra kag sa kaumahan kang mga nasugalaw ko sa mga aragyan ako ang nagatukod kang manami nga mga binalaybay ako ang naga pabuhi kang baratyagun nga lupaypay naga suroy kang inyo mga inagihan kag naga pintura kang atun kalibutan karon imo run ako nakilala sa huna-huna batuna ako nga bulawanon panurukan kag paminsarun imo run bag-uhon mayad nga pagtrato ako imo atipanun Registered Report

lauchengco

	3. 24-04-2009 11:11
	hi amo ra ang akon balos sa imo binalaybay? dapat guid likakahon mo anay kon sin-o ka kag kon anu ang imo ikasarang agud magamit mo sa mayad nga paagi ang imo kinaaram Registered Report

lauchengco

Only registered users can write comments.
Please login or register.