Hay ato na naman si Isko, anu abi kay sa subra ka kapuy naturugan sa kahoy. wara run ti gin ubra bilog nga adlaw kundi maglagaw kag mag gastu ka kwarta. Didto sa banwa pirme gasipal billiard, kundi gani masipal eh ka computer. Anu na lang matabu sa ana pangabuhi kara subun?...

Si nanay na, hala ga bira-bira ka panglaba ka bayu sa piyak balay. Pagkatapus ay bira-bira man ka ubra sa sulod ka balay. Pirme lang gina kapuy kag wara gid ginabuligan ni Isko. Si tatay na, ato sa bukid ga iritum na ka ubra kag arado ka lupa. Anu abi kay si Isko indi gid makabulig-bulig. Wra gid gabulig kay wara man ti puros para mag arado gamit ang karbaw. Hadluk man daan mag itum.

Pero maski amu lang ra si Isko palangga gid ka nanay kag tatay na. Wara gid ginapabay-an, kun may pangayuon gani dayun man nga ginatugro kana. Anu abi kay ginapabahul man sa tanan nga layaw na.

Sa anum ka tuig ni Isko sa High School, pasalamat man ka ana ginikanan kay nakatapus gid man sa pag eskwela. Pero abaw ang grade rapit-rapit lang pa gid nga mag huwasay, mayad lang kay naluoy man ang maestra kana. Sa anum ka tuig nga pag eskwela, si Isko daw wara gid may naman-an. Pirme abi galaylo kag wara gapamati sa maestra. Pero sadya-sadya gid ang ana tatay kag nanay kay makapag kolehiyo na si Isko. Bahul gid ang anda pagsarig nga makatapus kag makita ka ubra eh. Amu diya ang andang handum nga makaubra na si Isko kag maka bulig-bulig man kananda. Maubra diya ayhan ni Isko?...

Si Isko maeskwela run sa kolehiyo pero wara gid sa isip ang pagtuon. Si nanay kag tatay gusto gid Engineering ang bul-on na. Gani maski kuntra sa kabubut-on ni Isko mabuol na lang tana kang kurso nga Engineering. Ang ana ginikanan may pagsarig gid kay Isko. Naghambal gid, "To, tapusun ang pag-eskwela ha? Para makatapus kaw kag makapangita dayun ubra  kag mabuligan mu man si nanay kag tatay mo. Gamitun mo gid ang kwarta sa ensakto.". Si Isko daw wara lang kamaan kag daw wara gid sa anang baratyagun ang ginhambal kana.

Gani si tatay kag nanay ni Isko ginbaligya run ang karbaw kag ang andang kakahuyan para lang pambayad sa tuition ni Isko. Nag pangabudlay pa gid para lang may baralunun si Isko. ang tanan nga kabudlay gin antus para lang sa andang bata nga si Isko.

Si Isko sadya gid kay maka agto run sa siyudad kag mahimu na run ang ana nga gusto. Abaw si Isko daw sa anu ang kalipay; ginapagustuhan ang kaugalingon sa tanan nga makita nga nami.  Sa siyudad daan raku makita nga wara sa uma.

Sa una pa lang nga sem ni Isko, gasulod lang sa eskwelahan pero wara man gasulod sa ana nga klase. Ay gali kay gina hulat na ang ana bag-o nga mga barkada para magsipal billiard, computer, kag mag lakwatsa. Si Isku kamaan run mag-inum kag nag intra pa sa frat.

Natapus lang ang una nga sem pero wara gid may napasaran si Isko. Ang nanay kag tatay hala sige lang padara ka kwarta  kag abi da ginagamit sa pag eskwela. Bahul gid ang pagsarig nga gatuon nga gatuon ang anda bata kag ginagamit gid ang kwarta sa ensakto. Nag abut lang ang pangarwa nga sem pero ang nanay kag tatay ni Isko sige man gihapun padara ka kwarta para lang pang eskwela-abi-kuno ni Isko. Naga baka-baka run kaubra para lang kana.

Si Isko nagbinutig na kay nanay kag tatay na. Ginagamit ang kwarta gusto na lang nga luho kag indi sa pag eskwela. Si Isko nag-iba run gid. Gabii run pirme gauli sa ana boarding house, kag gabii run man gaturog nga katung anay sa uma pirme ginapatimpranu paturog. Nag duro pa gani tapat ang ana mga bisyu. Nagtawas run sa mga agtunan kang ana frat. kung anu anu na lang nga hindi manami ang ana ginapang-ubra. Wara run gid ti pag respeto sa ana ginikanan. Ginapaasa lang tanda gali sa wara.

Sangka gabii naparambul ang frat ni Isko. Asta nga may napatay kag ato nagdaralagan kag nagsipanagu kay nag abut ang mga pulis. Grabe na gid ang pag bag-o ni Isko. Nauyang lang ang kwarta kang ana ginikanan. Ang kwarta nga dapat para sa pag-eskwela na. Ang handum ka ana ginikanan isara man lang gali ka damgu.

Nag abut man ang mga inadlaw kag si Isko nakonsensya man sa ana ginpang-ubra. Gin isip isip kun anu ang ana kakulangan kag kung anu ana nga mga sala sa ana ginikanan kag ilabi na gid sa Diyos. Nag hinulsul kang mga pinanghimu na, gin paasa na lang ang ana nga ginikanan. Ang mga pagpangabudlay kang ana ginikanan wara na gid mabaslan. Ginpanumdum man nga kanugun lang kang karbaw kag mga kakahuyan nga ginbaligya kang ana ginikanan para lang ibayad sa ana tuition. Grabe gid ang ana paghinulsul, nagapanangis nga indi na gid mag liwat. Ti anu pa mahimu na, urihi run ang tanan para kana. Indi na run mabag-o ang ana kinahimtangan. Ato na si Isko, gahiribiun... Na priso na si Isko...