| Ti anhun ko ra bay kay amu run ria |
|
|
| Posted by roniepoe | ||||||||||||||||||||||||||||||||||||||||||||||||||||
|
src="http://pagead2.googlesyndication.com/pagead/show_ads.js"> Amu ra gani pirme gid ginahambal ni Nanay kanakun, "'To tuon ka gid mayad ha? Para indi kaw man mag pareho kanamun ni Tatay mu sabun." Pirme ko ria mabatian sa baba ni Nanay. Kataraka na man gani pamatian. Ang hambal man tana ni Tatay, "Tapuson mo gid 'To ang pag-eskwela, maluoy ka man sa lima mo nga mga libayun." Maski si Lola naghambal, "Apo, mag-andam kaw sa siyudad indi kaw to mag pang chicks!". Kita mo lang ... Ti amu ra eh nag eskwela ko sa siyudad dara ang paglaum kag handum kang akun mga ginikanan nga makatapus gid kag makabulig man kananda. Gani maski HRM lang nga darwa ka tuig mayad tana eh kaysa sa mga kabaryo ko nga indi ka eskwela. Ang ubra maisip lang ka mga sarakyan nga ga agi sa karsadahun. Sang sa siyudad ako, ay abaw agwanta ko lang ka purutikol kang hambal kang garagumo nga Kinaray-a tapus kadlawan ka lang kag hambalan nga "kabuki simu!". Mayad man lang ra gani kay nakilala ko si Ana. Naga intsindihanay gid kami. Ti sa una migahay lang eh. Hasta sa pira ka bulan kami man nagdayunay, nobya ko run tana. Hay ang hambal gid daan ni Nanay, "'To, indi kaw gid anay mag nobya-nobya ha kay awat lang ra sa pagtuon mo.". Kag ang hambal man tana ni Tatay, "Indi lang gid anay mag nobya 'To kay pag himuon mo ra labuon ta gid kaw ka binangon ko pag-abut mo.". Anu man tana diya nasudlan ko man? Ang nahambal ko lang sa kaugalingon ko, "Ti anhun ko ra by kay amu run ria.". Kay palangga ko tana kag palangga na man ako, ti amu ra eh magpalanggaanay na lang gid eh kami. Sa pira man ka inadlaw,hay nag-abut gid tana sa kun diin nahimu gid eh namun ang dapat sa mag-asawa na gid. Ti kay gusto man mu matirawan ang ginakuon nga raha ka Ginuo. Wara gid eh maisip-isip kun anu ang matabu sunod. Ti sa natabu, ay ahay nakibut lang ako kang naman-an ko nga nagabusong run si Ana. Abaw ti ma tatay run gale ako, pero dali lang gid daw estudyante pa lang man ako. Gani sa pag uli ko, una ko gid nga nakita si Nanay. Ato gapanglaba ka bayu sa bumba. Nakita ko ang kasadya sa ana mga mata, ti dayun na man tindug kag agtunan ako eh. Gin hambalan ko tana nga mangin Lola run tana. Ay abaw ang ana bibig nagsarambil gid tana, nangruluya sa ana nabatian. Ti ginhambalan ko tana, "Ti anhun ko ra bay kay amu run ria.". Dali-dali man ako nag-agto sa bukid. Didito nakita ko si Tatay gapananum kamote. Pag ka kita tatay kanakun nasadyahan gid tana kag nagalauman nga may dara gid ako nga nami nga balita. Ginhambalan ko tana nga mangin lolo run tana. Ay abay naghipus na lang si tatay kag dayun nag huhoy ang ana dughan. Gina tago na lang ang ana kasubo kag nagkalma na lang kay basi malabu na bala ako ka binangun na haw. Mayad lang gani kay wara. Nahambal ko na lang sa kaugalingon ko, "Ti anhun ko ra bay kay amu run ria.". Dayun nag agto man ako sa balay. Nakita ko si lola ga pungko-pungko. Dayun ko tana gin hambalan nga mangin tatay na ako. Dayun naghambal tana, "Mayad man ria gani to' kay may ulit-uliton man ako.". Sa akun pag agwa nakita ko ang akun nga mga libayun ato sa kahoy. Hay, katap-ingun kananda kag gisi-gisiun ang mga bayu da. Dayun naisip-isip ko man, "Anu ayhan kun amu man diya ang mga itsura ni Toto kag ni Inday ko?" Gani wara run ako mahimu kag maski sanda eh kundi anda na lang batunon nga amu diya ang natabu sa akun. "Ti anhun ko ra bay kay amu run ria.". Ti baka-baka naman ubra eh kag panindugan ang amun relasyon ni Ana. Ti mahuwad kamo kanakun?!  Add as favourites (15) |  Quote this article on your site | Views: 669
Only registered users can write comments. Powered by AkoComment Tweaked Special Edition v.1.4.6 |
||||||||||||||||||||||||||||||||||||||||||||||||||||
