Sa mga Antiqueño nga may pag-ulikid gid sa Antique kag sa okasyon kang Binirayan, sa mga nakasaksi kang bag-o lang natapos nga selebrasyon, ano bala ang inyo matugda kag ano ang inyo obserbasyon sa bilog nga kahiwatan?

Duro ang naghambal nga indi manami ang selebrasyon kadya nga tuig. Bagay nga ako mismo ang nakatalupangud. Naglista ako kang mga bagay nga akun nanamian kag ang mga bagay nga daw dapat tugruan gid kang bahul nga improvement. Unahun ko anay ang manami nga mga bagay kag programa, base lang sa akun napanilagan. Kon kamo may inyo man nga panugda sa mga hitabo, ginaimbita ko nga ipamaan man ninyo para mangin giya sa paraabuton pa nga kahiwatan, indi lang sa Binirayan kundi sa tanan man natun nga mga okasyon.

-    Ang Komedya

Bisan wara ako makalantaw kang kabilugan, mahambal nga successful ang paghiwat kag nami ang representasyon.

-    Pagsindi kang sulo kang kahilwayan (Torch Parade)

Ang pagparada halin sa Malandog hasta sa plaza kang San Jose manami gid lantawun. Ugaring daw timprano pa nag-umpisa amo ra pag-abot sa Bagumbayan amo palang kag maapreciate gid ang kanami kang siga kang mga mitsa.

-    Parada kang Lahi

Parada kang mga floats kag mga representatives halin sa kada munisipalidad. Duro ang nag attend pero gamay lang ang mga floats kag ang mga participants sa street dancing daw tatlo lang ka tribo.

-    Police Visibility

Nangin malinung ang bilog nga okasyon hay manami ang performance kag attendance kang atun mga pulis.

-    Art Museum kang ang bag-o nga EBJ Gallery

Labaw sa tanan ang pagbukas kang darwa ka museum sa Old Capitol Building ang sangka manami gid nga ralantawun. Wara ko gid ginpabalik ang mga bisita ko without them visiting the gallery. Sangka bagay nga mapabugal gid natun nga mga Antiqueño. Ang pag-intsindi kang mga bisita kun ano kag sin-o si Evelio sangka bugal. Iba ang pamatyag ko samtang gina-appreciate nanda ang nagkaratabo kauna. Salamat sa mga in-charge nga ginbuksan gid nanda ang gallery bisan close sanda for cleaning upon my request. Nakipag-usap gid ako hay last day run namun kag pabalik run sa Manila.

Sa liwan, duro ang nagahambal nga indi manami ang selebrasyon kang Binirayan kadya nga tuig. Well, indi gidman kinahanglan hambalun siguro kapin pa kun didto ikaw hay imo gid mabatyagan. Gamay lang ang mga aktibidades kag indi masadya. May naghambal kanakun nga mayad lang hay wara makatawas kana ang pira ka bisita halin pa sa Mindanao. Well, dimalas ako hay kadya lang ako nagdara ka anum pa ka bisita halin sa Manila.

Amo diya ang mga bagay nga ginapangita kang karak-an.

-    Where’s kinaray-a music?
 
Unlike last year, kadya nga tuig tatlo lang kang kinaray-a songs ang nabatian ko. Ang “Binirayan, Kruhhhayy!” nga theme song mismo kang Binirayan, ang “Kinaray-a” nga theme song natun rugya sa K.com kag ang gin-perform ka banda nanday Sean Bryle Rubido (bata ni migo Sammy) sa food fest. Ginsugid lang kanakun nga gin-playback ang music video kang “Antique Banwa nga Hamili” during the Lin-ay search.

Sa diin nag-agto ang mga ginapabugal natun nga mga kinaray-a music? Diyang sangka bagay nga ginpanginbulahan anay kang imaw ko nga director kang nag shoot kami sa Antique. Hambal na, very proud gid tana para kanatun hay kita lang ang probinsya sa bilog nga Pilipinas nga bisan mga bata kabisado ang mga lyrics kang kinaray-a songs kag ginapatukar pa sa local FM stations kag sa mga baylehan. Most places in the country are famous in visual arts. Kita lang ang proud sa atun kaugalingon nga music. He even expressed his willingness nga mag migrate sa Antique.

Last year, sa foodfest puro karay-a songs ang mabatian in between band performances. May show pa ang mga local artists natun. Kadya puro sponsorship plug kag “Lintik na Pag-ibig” kang Brownman Revival. When I asked the operator kang sound system sa foodfest, hambal na wara sanda ti CD nga kinaray-a. Lintik gid man! Why would they care hay indi man sanda Antiqueño, kag ang organizer kang foodfest, mga lintik nga grupo nga puro Ilonggo! Amo ra nga ang iba natun nga mga local artists wara magperform. Ang iba gin-abuso pa kang organizer nga MYOB. Luwas sa gintugruan kang tama ka naba nga talent fee, bisan tubig wara ginpainom. Bagay nga nagtulod kananda para mag back-out.

-    Merrymaking!

Kun amo to ang konsepto kang merrymaking kang mga Antiqueño, it is clear that Antique is truly a divided province. Well, kun ang mga leaders gani natun wara pag ugyon sa pag selebrar kang amo diya ka importante nga okasyon, no doubt nga ang mga activities amo man diya nga nagaburublaganay. Ang merrymaking nga daad sangka kahiwatan kun sa diin nagatipon tipon ang tanan kag iririmaw nga magsirinadya, nahimo nga “parada timo kun mayad pamatyag mo kag umpisa timo kun san-o mo gusto.” Ang kada grupo nagparada palibot sa banwa kang San Jose nga “kanya-kanya”. Ang iba sangka libot lang nakapoy run. Ang iba nga masinadyahun indi lang darwa ka beses naglibot. Ang iba gani gabii run sige man gihapon anda marcha kag libutay. Ti, nahimo nga “Kanya-kanya Making” eh.

-    Lin-ay

Ang lin-ay amo ang sara sa mga pinaka-highlight kang okasyon. Ang problema, indi natun mai-angat ang level kang kumpetisyon. Sa tuod lang, ginahimo kis-a nga karadlawan ang mga kandidata kag ang pageant mismo. Duro ang mga guwapa, maaram kag talentado nga mga “lin-ay” sa Antique. Ang kaso nga kalabanan namayha lamang mag-intra  hay ginahimo lang nga karadlawan kang iba. Sa pira ka kandidata nga naga-partesipar, irisipun lang rudya ang mahambal mo nga beauty queen gid ang packaging. Sorry to say this pero ang iba, ginpirit lang kag ginhugot lang para may magrepresentar kang andang munisipalidad.

Paano abi hay nabaw ang paglantaw kang iba sa Lin-ay pageant natun amo ra nga duro diyan ang mayad pero nahuya lamang. Sangka halimbawa, may mga Lin-ay contestants nga daw indi gani kamaan maghambal. May diyan nga itum pa gani ang iruk na. Pero maagyan mo lang sa binit kang karsada kun maglibot kaw sa Antique nga duro ang mga matahum pero nagatingala ako nga wara haw kanada ang may interes nga mag intra? Mahambal natun nga wara ti hilig ang iba. Kun mapasaka daad natun ang kalidad kang kumpetisyon ngadya, duro siguro ang mag-agaway nga mag-intra. Basi makapasaka pa kita kang kandidata sa Binibining Pilipinas kag sa iba pa nga mga mas mataas nga kumpetisyon.

Ang programa tama ka lawid. Ang iba nga bisita wara makapatapos hay introductory march palang kang mga kandidata, sangka oras run. Ginahambal ko diya tanan indi para asi-asihun ang pageant. Diya sagka kamatuuran nga permi ko nabatian. We have to learn from this. Truly, most winners are very deserving, pero mas exciting daad kun mas competitive ang tanan. Ano abi hay kita nga mga Antiqueño nakutento lang permi sa kun ano lang may diyan. Basta may programa lang nga mahimo, maipakita sa tawo, ayos run. Maipakita lang nga kuno abi, kita may pinangabudlayan. Pero hasta lang haw sa amo kadya ang atun ikasarang? Wara nantun ginahandum nga ang programa himuon pa nga world class. Ti, sapwan lang pirmi kita sa binit-binit eh.


Amo lang diya ang mga bagay nga tugruan ko ka pagsapak. Kun busiksikun ko gid, kulang ang oras niyo sa pagbasa. Ang akun handum nga daad sa pira ka adlaw, sa paghiwat natun kang Binirayan, daad indi lang ang plaza kang San Jose ang magahud kag masadya. Daad ang bilog mismo nga banwa, ukon ang bilog gid nga probinsya. Daad maabot ang adlaw nga ang mga tawo, indi lang ang mga taga San Jose, magdirinumog sa pagsaksi kang mga aktibidades. Magpa-init sa paglantaw, ukon sa pag-intra mismo sa parada. Mamulaw kag magbugtaw ka timprano para boluntaryo nga magpatisipar. Tugruan daad natun diya ka prioridad sa budget kag sa oras. Dumugon man daad kita kang mga turista, kang media, kang manari-sari nga mga bisita.

Tanan diya nga mga bagay mahulas daad matugruan kang solusyson kun may budget lang ang Binirayan, kag may mga individual nga maisug magrisgo kag mag experimento. Eh, kaso tama gid ka kulang. Paano kita makabuul kang make up artist nga makapaguwapa pa kang atun mga lin-ay? Kang photgrapher nga makatugro kang bag-o nga konsepto kag mataas nga kalidad sa andang pictorial? Wara ako paghambal nga kinahanglan gid natun mag hire kang mga tawo from outside Antique to make these changes. Pero kun kinhanglan, why not? After all kinhaglang pa natun kang bulig. Pero indi natun paglipatan nga duro ang nga talento ang rudyan run mismo sa Antique ukon talentado nga mga Antiueño bisan sa guwa kang Antique nga willing mag-uli kag magbulig. Kun wara kita ti kuwarta, gamitun daad natun ang iba nga resources. Indi natun pagsolohon ang obra. Duro ang mga Antiqueño nga may tagipusuon sa okasyon. Itugro kananda ang pagpatikang kang mga aktibidades. Indi sa mga pangayaw nga wara ti ginapinsar kundi ang makaginansya lang. I’m sure duro ang willing magbulig. Rudya lang sa kinaray-a.com duro run.

	1. 08-05-2007 09:42
	the best!!! good job ka nong... you said it all!! Guest Report

psyche

	2. 08-05-2007 12:40
	ti.. ti sin-o bay dapat basulon kaja? sn-o haw ang overall chairman(incharge) kang binrayan? dapat may evaluation sanda e, after the event. para malikawan sa sunod ang ja nga kapalpakan, i'm really sad and disappointed to read this. ga promote pa man ko ja phil's culture sa korea. kag ginapabugal ko gid antique(binirayan festival). daad sa sunod buruligan ja, d lang maghulat kag mag critic after. critic, suggest and participate. mu ja dapat ang himuon kg tanan.and evrything we do we should do our best no matter how small the work is. d lang magkumporme sa "pwede na". always think of improving. para d mag stagnant utok ta. kabay pa taw-an ja kg pagtalupangud kg tanan nga mga antiqueno. and i'm willing to help basta sa karaaydan kg tanan. dont hesitate to ask, basta masarangan ko.salamat gid manong manie for deep concern. daad tanan tawo pareho kanimo... Guest Report

zeanra7

	3. 08-05-2007 22:36
	ti.. sakto gid man nga daw may kulang, te try lang enjoy kung ano ang rugto hay ang bana ko first na man to witness eh, so far so good for him hay wara man tana kamaan kang iban nga issues ... pero kung turukun ta ang process kag pag-manage kang event amo ra duro pa gid dapat improbar, pareho kang ginhambal ni manie. ginhambal run man tanan ni manie a. wara takun ka-lantaw kang tanan esp sa gabii hay maan budlay mag-gwa sa gabii kabay. pero sa parada kang lahi nami man nga duro nag-attend kag nakita man ang creativity kang mga banwa, pero kulang pa gihapon. ang float gani kang lin-ay sa tunga gawa ano hay rugto tamun naglantaw sa bantayan nayun. wara gani namun na-notisyar nga amo run to gle ang mga lin-ay? daw faded pa ang sash gina-himutaran ko ka mayad kung ano to nakasulat ehehehhe....amo run to gle mga lin-ay? daad sa urihi nanda ginbutang. ang pinaka-urihi sa parada to daw mga martial arts group nga ga-arnis? pero basi gin-islan ang order pag-abot run sa plaza nayon.    tapos sa hapon daw wara man ti program gid sa plaza, hay may 3 or so ka grupo lang to nagperform? sadya lang ang kinaray-a.com.     pero nagmisty-eyed man ako pagbati ko kang 'binirayan beat'! daw ginbalik gid ako kang mga sounds sa mga nagligad nga mga binirayan kag nadumduman ko ang kasadya sa karsada kag ang isara pa kasadya hay duro-duro kato naga-intra.     let's hope for a better one next year, nga ma-showcase gid ang pinakamayad sa atun. Guest Report

Jigsz

	4. 09-05-2007 07:29
	barasulon wara man siguro sa pamasol gid. daad tanan maamot para sa ikasadya. pero maumpisa ra sa babaw. masunod nalang ang sa dalum. from our leaders daad eh, down to organizers. kun mayad andang performance, basulon run natun ang atun kaugalingon kun indi kita makapagcooperate.    well, i hope next year would be a better one hay wara run ti election. http://maniemjr.multiply.com Guest Report

This e-mail address is being protected from spam bots, you need JavaScript enabled to view it

	5. 09-05-2007 07:38
	barasulon first time ko mag-witness ka binirayan and i'm glad nga i was part of it..wara gid ako ti idea kun ano ang mga activities nga parte ka festival but i was looking forward sa malay-ati nga part because once nga nagjoin ang school sa place namun before and they won and was even sent to intramuros..too bad, wara ti malay-ati this year, hopefully next year may jan..    same sentiments with nong manie regarding the cr and the event organizer. it rained ka april 26, and after pa kauran kag nag-abot ang mga cover ka tents, kang basa run ang mga exhibits..hehehe..    naglook forward man ako for a concert kang OKM, but wara man.    it is memorable for me since 1st time ko tu. hopefully, it will get better next year. perhaps the organizers can get something from this write up of nong manie to evaluate the whole festival. Guest Report

anne_0125

	6. 09-05-2007 08:42
	for the artist, for the people ang diya nga selebrasyon gali should be spared from politics. tuod nga subsidize diya kang local government pero their support should end there. dapat ipa-ubaya run diya sa mga organizers, sa ordinaryo nga tawo ilabi run gid s mga artists.    ang problema, bisan sin-o mangkuton mo, pinakabudlay nga ihugpong sa tanan ang mga artist hay may kanya-kanya ra nga prinsipyo, diskarte, pagtuo, ugali nga indi gid mabari.    rudya kadya masulod ang diskarte kun paano sanda tiringbun. suhestiyon lang pagid, eh, di pabay-an sanda nga magdiskarte kang kaugalingon nanda. but let them work in one roof. make a theme nga guidelines nanda. tapos separate visual arts sa music, literature, etc. etc... give them venue. I'm sure duro ang mapartisipar bisan sanda mismo ang magasto kang andang event. duro bay mga gagmay nga artist nga gusto magsinggit kag magpakilala. wara lang sanda ti venue. provide them one and let them do what they want. just provide what's basics. comfort rooms, lights and electricity etc., and most of all security.    http://maniemjr.multiply.com Guest Report

This e-mail address is being protected from spam bots, you need JavaScript enabled to view it

	7. 12-05-2007 19:26
	for the artist, for the people mayad man at may dyan nga kagaya ni manie nga naga malasakit gid para sa ikakaganda pa ng festival... actualy nde man gid ko maka relate dya sa issue nga ja, dahil elementary pa ata ako ang pinaka ka last ko nga makalantaw kang binirayan.... pero pirmi man ako updated kang mga kinatabo dyan eh...kag raku run ako nga mga feedback ka nabatian good and bad about binirayan...pero mas labhan gid ang bukon ti nami nga commento...   siguro ang best nga dapat himuun ta kaja ay ang kunin natin ang attention ng organizer at maiparating natin ang mga concerns natin sa issyung eto... for sure na matutuwa sila at lugud nilang tatangip ang ating mga comento at suhestyon. maisaayus ang mga bagay bagay, at mapag aralan kung ano ang makabubuti maka pag paganda ng sariling ating binirayan. Guest Report

Raw_ayan

Only registered users can write comments.
Please login or register.

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved