Antiqueños Community Website - Province of Antique, Philippines

Tuesday, December 2, 2008

Text Size

Istorya lang

Posted by Jigsz

Natabo to sanka tungang gabii nga may misa sa simbahan. Buta-buta ang simbahan tungud nagselebrar ang mga tawo kang Paskua. Nagapungko ako marapit sa gawang kang simbahan. Sa tunga-tunga kang misa gulpi naghipos ang tanan. Nagturuk kami sa tuu nga gawang kag may nakita kami nga sangka puti nga kabayo nga may nagasakay nga laki nga naka-uniporme kang daw militar. Daw kadali lang to nga natabo kag pagkatapos kang pira ka segundo naglisu ang kabayo kang nag-gwa sa gawang. Wara ako kadumdum kung ano run to ang natabo. Daw nadura run sa akun paminsarun pero klaro pa tana gihapon sa akun panurukan ang kabayo kag ang nagasakay nga tisu-tisu ang pagpunko na sa kabayo. Sin-o to ayhan? Ano kato ayhan ang tuyo na nga magsulud sa simbahan? Sa amo to nga mga tini-un daw tama ka katingalahan ang natabo nga to. Kang naga-inistoryahanay run kami sa balay naman-an ko man nga ang amun balay daw agihan kuno ria kang mga tinuga nga hindi makita kang atun mga mata. Pero rugyan sanda karia naga-libot-libot kag naga-agi-agi. Nga kuno kung kaisa naga-agi dyan ang mga naga-sakay man sa kabayo. Kun kis-a may mga makakita man kananda ukon di gani mabatian man ang huni kang andang mga kahig nga naga-bundag-bundag sa lupa.

Sa palibot kang amun balay kag sa mga iningud kag atubang kang balay may 4 ka puno kang mangga nga kuun kang mga mal-am amo ra ang 4 ka puntos nga naga-angut. Kag amo dya ang daw reference points kang mga tinuga nga hindi makita. Mga pira ka tuig nagligad nabatian ko nga ang sangka puno sa tabuk karsada na-igo kang kilat, kag ang isara man sa pihak nayun daw gin-utud run. Te wara ako kamaan kung ano karia ang epekto na sa mga tinuga nga nagadepender rugyan sa anda nga adlaw-adlaw nga pagpangabuhi. Kabay nga wara to sanda nagtaralang sa anda nga gina-agyan.

Duro pa ang mga nakita ko kag iban man nga daw hindi mapatihan. Ayhan imahinasyun lang ukon tuud gid nga nagtuhaw.

Add as favourites (21) |

Quote this article on your site | Views: 703

Comments (1)

	1. 31-05-2007 23:38
	Ay Maruod gid! jigsz, aysus kon ako pamangkuton nagapati gid ako ka ria nga may mga tawo nga hindi makita kang iba. kang rugto pa ako sa atun duro nga beses may nahambal ko gani mong sa puno kang kahoy ang balay da. rugya sa maine gani mong may nakita ko nga hingante nag-agi sa balay namun kag ginkun-an ko ang akun nga mga in-laws kag ginpamangkot kon may nabatian sanda nga sugilanon tungod kara ayteh kuon da man nga matuod nga may mga tawo nga hindi makita kang iba pero may jan nga makakita man kon gusto nanda magpakita daw paris ta man. oh well, it's a story to tell more. Guest Report

nenen422

Only registered users can write comments.
Please login or register.