|
Sa pagbukas ko kang baul, nagtuhaw ang mga dumaan ko nga panghuna-huna nga nabadlit sa papel. Inspired by our newsletter "Binhi" for our Sacred Heart Parish sa Egana Sibalom in 1999, nag-umpisa ako kurit-kurit sa papel, trying hard magsulat sa kinaray-a para lang may maamot nga article. Nakaloy-an man ang iba ko nga poems na-publish but unfortunately, Binhi didn't stay long. After two issues, nagburublag run kami nga mga staffs kag nailisan ang amon Kura Paroko. This short story inspired by one of my colleagues in the church didn't make it hay daad sa third issue ko diya i-submit. Mayad lang hay may sangka venue gali nga nagahulat and after 8 years, rudya run kag ginapaambit ko kaninyo. Sangka simple nga estorya nga buta kang repleksyon kag realisasyon sa sangka simple man nga kabuhi. Pasensiyaha niyo lang hay ang naghimu kadya wara pagid it tuman nga talento sa pagsulat. Para kay Hanibal, Itik kag Edward (Wangyu)
Ano ang ginapamensar mo? Okey kaw lang?
Kahapon lang nakita ko ikaw nga nagayuhum-yuhum sa bintana kang convento, tapos ginpaypayan mo ako nga magsaka hay may nabilin pa nga gin diyan sa ref ni father. Garing nang-indi ako hay may hang-over pa ako kang nag-inuman kami ka migo ko ka sarang gabi-i didto sa balay nanda. Ano abi, nagsakit ang buut na hay ang anang insakpan nga bao ginkaun kang kuti.
Naghambal ikaw nga daya-un ako. Mayad lang kon ako ang manghagad… pero, wara ka saler ang drama mo (style ko man bay ra). Ti, nag-estoryahanay nalang eh kita kag ginsugid mo kon andut malipayon ikaw.
Nagbisita gali ang crush mo sa simbahan, kag ikaw ang nag-entertain.
Amo lang to? Kanabaw kanimo man. Hambal ko kanimo nga medyo
nagayambi.
Bukon lang ti amo ra pre, pamati bala anay! Daw medyo nagseryoso ikaw. Wara kaw kamaan nga naghambal si father kon gusto ko mag-eskuwela sa SAC, tana ang magastos kanakon? Bisan ano nga kurso!
Bahul-bahul ang mata mo ba paghambal mo kato.
Ti, bilang migo mo nalipay man eh ako hay naman-an ko nga buhay mo run ginahandum nga maka-eskuwela kag makatapos sa SAC. Handum nga buhay mo ron daad naabot kon wara lang mapatay si tatay mo kang mahulog sa santol samtang nagapanamkun si nanay mo kang inyo nga kalibaynan.
Kahapon to. Ti, kadya, daw lain ang huyup kang hangin haw? Daw amo ria ang hitsura mo anay kang gindura kang libayon mo ang ballpen mo nga Kilometrico nga ginregalo kang, sin-o pa abi kundi ang crush mo man gihapon nga pito run ka tuig hasta kadya.
Mainom ta? Ako ruman ang nanghagad kag wara pa ako makatikab liwan, dayon mo halin. Abi ko anay naabot kaw liwan kang litik mo sa ulo pero nangisyan nalang ako kay samtang naga estoryahanay kami kang sangka katekista, gulpi timo nag-abot nga may bitbit nga tunga sa kahon nga beer. Kag sa sugo kang sangka butilya, gin-estorya mo ang rason.
Amo gali nga nagaluya ang lawas mo hay nakita mo ang crush mo nga gina-agbayan kang sangka tisoy nga laki samtang nagabakal kang sinakol diyan sa may tindahan.
Ah, ang taas nga puti… macho… kurung ang buhok… dapa ang irong kag medyo manok-manokon? Pamangkot ko kanimo nga medyo nagabarabangisi.
Dan! Amo ra pre! Sin-o ra haw? Nagkadlaw nalang ako sa reaksiyon mo hay baw, kaluluoy kaw man. Pito run ka tuig, wara kaw man gihapon ti kalibutan.
Pakaisa na ria nga bag-o lang nag-a bot halin sa Guam. Kahapon lang ria nag
abot. Tama timo ka emotional gid! Dayon ko bukas kang bag-o nga butilya. Nabatyagan ko nga naghurma ang kalipay sa imo pungyahun. Hitsura nga nagapakita kang pag-asa… kang mayad nga para-abuton.
Sa amo to nga punto napamensar ako… Permi kita amo kadya. Daw sa kanami lang daad nga ang kada sara kanatun may mayad nga para-abuton. Pero diya depende sa atun paghimurat kag sa suwerte nga ginatigana kang atun Ginuo. Siyempre indi tanan nga para-abuton mayad. Bagay nga bisan
maghimurat kita, diyan gihapon ang kapaslawan. Kag rudya kita kadya mahina, ang magbaton kang kapaslawan. Gusto lang natun permi ang kadarag-an... syempre sin-o bala gusto maapaslawan? Wara abi naton pagpasudla ang ginahambal permi drama nga "sa piyak kang kadulum, may kasanag nga nagahulat."
Hoy! Daw ikaw ruman ang nagapaluya haw? Hambal mo dayon hampak sa baga ko. Dasiga hay may misa pa saruman!
Wara ah, may nadumduman lang ako. Naglain ang hitsura ko hay nangisyan ako kanimo ba. Ang indi ko lang maintiyendihan nga kon andut gulpi lang ako nag sintimiento sa panahon ngato. Daw sadya man ang atun nga ginaistoryahan. Siguro tungud nga nakadarwa ron kita ka butilya kag nagbalik kanakun ang mga nagkaratabo sa akon kabuhi. Mga bagay nga nasaksihan mo man sa buhay run natun nga pag-amigohanay. Konsabagay, indi lango-Iango ang mabigo. Indi bala, ako man kauna ang naayawan kang maglukso ikaw daad sa tulay tungud nga ginbasted ikaw kang puppy love mo nga kadya, nakapamana kang adik nga niwangniwang? Ti, kadya lima run ang anda nga bata kag sige hanot man gihapon. Lantawa hay ang dimples na nga amo ang gina-umangan mo kauna daw bobon ron ka dalum hay nagasalup imaw kang anang bagi-ing. Suwerte lang ikaw pre hay ginsapopo kaw ni father. Naka-uli ikaw sa convento kag nakatuon kang pag-intiyende kang mga bagay-bagay sa kabuhi.
Nadumduman ko akuna ang amun bulig. Rugto man gihapon ang buong ko nga gitara nga ginlampus na sa ana nga ulo hay indi na mabaton nga naghambal ang anda ginikanan nga mas guwapa ang anang magurang. Sa tuod-tuod lang pre, nakita mo man bay ang hitsura na kato? Daw sala gidman siguro kon hambalon mo nga guwapa tana no? Basi maigo pa kita kang kilat bala haw.
Man-an mo kon kaisa, amo ria nga indi natun mabaton ang mga kapierdihan
tungud nga indi pa naton kilala ang atun kaugalingon kag indi man natun mabaton kon ano kita kanabaw. Tuod man, nabaw ang pamensarun mo kato kang maglukso daad ikaw sa tulay. Kag ang bulig man namon kang ginlampusan na ang ana ulo kang gitara ko nga made in Japan. Bisan ako man gani kato mong, kang wara ako makapasar sa exam hay naturugan ako kag nalawayan ko ang akun test paper. Ano hay namulaw kami ka bais kon ano gid man ang nauna, ang itlog ukon manok. Ano gid man pre haw? Konsabagay indi man to ti kapierdihan kundi katangahan. Dugangan pa nga napierde ako sangka puntos lang sa klase namon bilang escort hay wara magboto ang best friend ko nga karibal ko man sa muse nga bata ni ma’am. Dan, amo tana to, daw umang man ako kato ka hibi sa C.R. Mayad gani hay naluoy si ma’am kanakun kag gin tugruan an ako kang special exam. Kun indi lang to tungod sa ako lang permi ginasugo na nga magtaya sa Daily Double, tingkaub gid ako eh. Amo lang to pero, wara gid ako makakadapit kang alima kang bata ni ma’am ba.
Tanhaga lang man kag nagbuylog kita sa simbahan no? At least duro ang aton
naman-an paagi sa mga seminars, recollections, retreats, prayer meetings, faith sharing, community services kag duro pa nga mga aktibidades kang simbahan. Exposed kita sa duro kag lain-lain nga lugar kag nakasaksi kita kang duro nga klase kang pangabuhi. Didto naglapad ang atun paglantaw kang mga sitwasyon. Pero kon kaisa indi gid man gihapon natun malikawan nga nagahina kita sa pag atubang kang iba nga mga sirkumstansiya. Nagabawi lang kita sa bulig kang iba, kag sa atun man pagpangamuyo. Ang ginapangabay ko lang nga daad amo man diya ang sundon kang mga pamatan-un nga pareho kanaton no? Imbes nga magyaga.yaga lang permi,
magpa-cute ukon magrampa sa karsada kag maghulat kang orasyon nga bisan panguros lang gani kag bisa sa mga mal-am indi run kamaan.
Sa amo daad diya nga paagi, indi run matabo sa iba nga tawo ang paglukso mo daad sa tulay. Taas ron nga daan ang tulay kadya. Ukon ang paghibi ko anay sa banyo, ukon ang paglampus kang bulig namon kang gitara sa ulo na.
Man-an ko nga duro pa ang pagtiraw nga atun maagyan. Kapin pa ikaw, sa pag-eskuwela mo sa SAC. Pero nasiguro ko nga masarangan mo man ria tanan. Ang akun lang nga himurati gid ang pagtu-on para malipay man si father. Malipay si nanay mo, kag ikaw man eh mismo. Sa pangamuyo ko lang ikaw mabuligan migo.
Kon makagraduate kaw, bukon lang ti tunga sa kahon nga beer ang imnom ta, maihaw ta pa kang pato kag rudto kita maselebrar sa Tig-ohot! Siguro sa panahon ngato indi run ikaw magmayha nga pangalyagan ang bayi nga buhay mo ron ginadamgo.
Ti, ubusa ron ra hay may misa pa bay sarum-an? Hambalon mo si Wangyu nga bagtingun na ang simbahan ha? Ay, lingganay gali.
 Add as favourites (3) |  Quote this article on your site | Views: 447
Only registered users can write comments.
Please login or register. Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved |
