ANTIQUE, RUDYA KAMI!

Music and Lyrics by Bernie L. Salcedo

Antique nga hamili nga kay Bathala ginpili.

Darangpan ikaw kang mga katawhan

  nga ginahidlaw sa katawhayan.

Ang imong bokid, soba, busay kag lasang,

  baybayun, hunasan, banglid kag wayang

Amun gid nga pangapinan kag amligan, hmm

Maragtas mo kag katawhan

  ipabogal ko sa bog-os nga kalibotan.

Panimuut mo nga namat-an isamay ko

  sa mga harakhak kang mga kabataan

O Antique di ta ikaw pagbayaan.

Lopa nga pinalangga

Kapihak kang kalipay ko kag kagha

Kadungganan mo kag kaoswagan 

Ginahuptan sa alibotod kang akun dughan

O Antique nga nagpadaug-daug

Pagbogtaw run manindugan, magpanikasug

Hay rudya ang manggad, rudya kanatun ang kaaram

Sarig sa igkasarang, paghimakas, pag-ogyon,

pagtabang lang ang kolang.

Ref:    Antique, rudya kami nga mga inanak mo

          Naga-onong kanimo, O Antique.

          Rudya kami, imong kabataan

          Patubas mo sa harum-an sa Antique

          Imo sarigi, amun gid nga bantayan

          Ang damgo mo nga kato anay ginpanghimatyan!

          O Antique, nag-abot run ang imong adlaw

          Hayahay ibayaw!

          Hukasa ang imong singkaw!...

          Kag magpangibabaw!

                          End
 

	1. 22-01-2007 05:07
	amo ra tana Tay, baw ga guruwa gid ang mga talented nga kasimanwa naton dya sa kinaray-a...     kinaray-a.com, it's a place where you can fully express one's God-given talent. Gani, intra ron kamo tanan kag inyo nga i-express ang inyo nga mga ginatago nga kinaadman.        Guest Report

Donz

	2. 22-01-2007 08:26
	Salamat gid Donz. Nagapati ako nga ikaw may ginatago man nga igkasarang. Baskug ra sa atun kaliwat. Guest Report

kalagoma

Only registered users can write comments.
Please login or register.

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved