HIWIT

  
Ang nagligad:

Nangampu run sa pagbulong kanakun si Manding Bukay kang wara na masiud ang aswang.  Daw naduraan ako kang paglaum nga mag-ayad hasta nga ginsugidan ako ni nanay parte kay Tay Roque.  Nadangtan kang kagab-ihun ang pag-obra na pero tanan may balus.  Nabuul ni Tay Roque ang mga ulod sa akun lawas kag napabawi na sa aswang ang sumpa paagi sa pagbuka kang paya.

Ang kasugpun kang atun sugidanun…

  
Ikasiyam kag Katapusan nga Tsapter:  Pagtuo, Paglaum kag Pagpalangga

  
Nag-abot kag naglabay ang Biyernes santo nga ginapangalkagan ko.  Nakalampuwas ako nga buhi.  Ang mga bukol nga kauna daw makul sa kabahul, amat-amat nga nagkupus kag napanas.  Ang nabilin amo ang mga kurit himo sa pagkuyum kag pagpali.

Ginpabay-an ko ang pamangkutanun nga sin-o ang nagpahiwit kag wanhaw.  Nagsugot ako nga lipatan ang nagriligad agud liwat mag-umpisa.  May mas importante pa nga mga bagay luwas kadya. 

Gani sa akun pagbalik kay Manding Bukay, nga wara ti untat ang pamulong, nagayuhum dya nga magkuon pagkatapos na tawas kanakun, wara run ti sablag sa imo lawas.  Bisan wara na diretso nga ginhambal, nabatyagan ko nga nakamaan si Manding Bukay nga ginbulong ako kang iba nga surhano.  Pero bisan paano, nagpasalamat ako sa ana nga bulig.  Sa gihapon, si Imak ang nag-imaw kanakun hasta sa katapusan ko nga pagbalik kay Manding Bukay.  Si Imak isara sa mga nagdampig kanakun.

Sa liwat namun nga pagsugilanun ni John nga manugpakut, ginpamangkot ko tana nga wanhaw daw ginpabay-an ako kang mga anghel dela gwardya nga nakit-an na sa kilid ko kauna.  Ang mga anghel, ang hambal na, pirmi naga-imaw sa tawu.  Rugyan tanda sa luyo sa tanan nga tion agud magbulig, magpabaskug, kag magpaandam.  Ugaring wara dya tanda ti kaugalingun nga mando.

Wara dya gapasilabut sa desisyon ukon ginabuhat kang mga tawu.  Pirmi ta ikaw ginapadumdum kauna nga mangadi kag tawgun sanda sa tanan nga tion.  Kon indi mo tanda pagtawgun kag mangayo kang bulig, indi man tanda maghulag bisan ginahalitan run ikaw, ang paaman ni John.  Gani umpisa kato, pirmi ko ginatamyaw si St. Michael, ang akun nga angel dela gwardya, kag si St. Barrachiel, nga nagpabaskug pa gid kang akun pagtuo sa Diyos.

Nagsimba ako sa pag-abot kang Domingo kang Pagkabanhaw.  Ang mga kabulig kang Makaako maduro pero ang bulig nga nagakaangay para kanimo magaabot sa tion suno sa ana nga pagbuut, ang sermon kang pari.  Ang mga tawu nga kaimaw ni Imak nga klasmet ko, ang manugpakut nga si John, ang suud ko nga amigo nga si Mark, Si Insong, si Manding Ipyon kag Soling, si Manding Purik nga masadyahun kag ngurusyun gihapon, nga nag-untat run sa anang obra kag mag-uli sa Samar agud magpahuway kang maghalin ako sa akun apartment, si Manding Bukay, si Tay Roque, kag si nanay, amo dya tanda ang mga bulig nga ginpadara kanakun sa tsakto nga tion.

Pero sa tanan si nanay ang wara ti kaanggid nga bulig ko.  Ang ana pagpalangga sirak sa kadulum nga wara pagkiraw.  Samtang ang tanan nangampo run sa pagpadayon, ang ana paglaum ligum kag siri gihapon.  Ang pagtuo na sa banglid mas bakud kag mapag-un, mas supug sa gindapun nga hiwit kag idalmunun.  Kon kay Manding Bukay pa,  ang mga kataragman akun nalampasan tanan tungud kay nanay.

Apat run ka Martes santo ang nagligad.  Ang mga nag-aragi, kon diin gindarawat ang dya nga sugidanun, daw malus-aw lang nga mga damguhanun.  Daw kang san-o lang.

Kag rugya, sa atubang kang bintana kang akun opisina sa New York, nagayuhum ako samtang ginasundan ko ka turuk ang adlaw nga nagahingarup, ang paglugum kang sirum liwat nagpadumdum kang kahagnup.

  
- Ang Katapusan -

	1. 21-11-2006 19:47
	matuud gid nga ang paghigugma kang sangka nanay sa anang bata, wara it katupong. sa tanan nga tinion sarang na itaya ang anang kabuhi para lang sa aton. amo rian nga indi ta gid pag pasipad an ang aton ginikanan ilabi na gid ang aton nanay...    nay, kon sa diin ka man kadya, nagapasalamat ako sa imong pagpalangga kag pagpakasakit para lang sa amon nga imo mga bata. nagapangayo ako kang pasaylo sa tanan nga kasakit nga akon gintugro kanimo. nagapasalamat ako sa makaako nga ikaw ana nga gin tugro sa akon para mangin nanay. nay, sa tanan tanan.. duro gid nga salamat. palangga ko gid ikaw! Guest Report

ztirfps

	2. 22-11-2006 14:35
	ay kanami ba. daw pati ako nahadluk man kay ako lang man daan sara gauli sa apartment ko. pero, i'm always saying to myself nga it's just about faith e. kung baskug pagtuo mo sa Diyos, wara kaw ti kahadlukan. daw ginaramigan man ko nga indi ko ba maintindihan samtang ginabasa ko from chapter 1 to 9. Guest Report

in_beijingcn

	3. 27-07-2007 12:02
	huhuhu! lain pa gid tana ra nga estorya ang NANAY nga ria! wra run ti may mas magdaug pa sa relasyon kg sangka nanay kag bata! Nayyyyy, ako man, hidlaw gid ko kanimo...siyam run katuig ang nagligad kang ginbayaan mo ako!huhuhu! Guest Report

zeanra7

	4. 06-08-2007 15:38
	whoahhh!! Ayawan man ko balik balik sa literature kag matapos ko ang hiwit ba.. Ang pagpalangga tuod kang isa ka Iloy wara ti taraksan,, tungod nanay man ako I will do anything for my own child..and I thanks God for giving me a mother like my Nanay, bisan pa ginaakigan na ako pirmi man-an ko sa sulod karang kaakig pagpalangga nga wara tupong...sin-o man abi ang indi pag-akigan ,magluwas suplada tig-a ulo pa hehehehe ako kabay ang juniar ni Nanay ...nice story... Guest Report

This e-mail address is being protected from spam bots, you need JavaScript enabled to view it

Only registered users can write comments.
Please login or register.

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved