|
HIWIT
Ang nagligad:
Nangampu run sa pagbulong kanakun si Manding Bukay kang wara na masiud ang aswang. Daw naduraan ako kang paglaum nga mag-ayad hasta nga ginsugidan ako ni nanay parte kay Tay Roque. Nadangtan kang kagab-ihun ang pag-obra na pero tanan may balus. Nabuul ni Tay Roque ang mga ulod sa akun lawas kag napabawi na sa aswang ang sumpa paagi sa pagbuka kang paya.
Ang kasugpun kang atun sugidanun…
Ikasiyam kag Katapusan nga Tsapter: Pagtuo, Paglaum kag Pagpalangga
Nag-abot kag naglabay ang Biyernes santo nga ginapangalkagan ko. Nakalampuwas ako nga buhi. Ang mga bukol nga kauna daw makul sa kabahul, amat-amat nga nagkupus kag napanas. Ang nabilin amo ang mga kurit himo sa pagkuyum kag pagpali.
Ginpabay-an ko ang pamangkutanun nga sin-o ang nagpahiwit kag wanhaw. Nagsugot ako nga lipatan ang nagriligad agud liwat mag-umpisa. May mas importante pa nga mga bagay luwas kadya.
Gani sa akun pagbalik kay Manding Bukay, nga wara ti untat ang pamulong, nagayuhum dya nga magkuon pagkatapos na tawas kanakun, wara run ti sablag sa imo lawas. Bisan wara na diretso nga ginhambal, nabatyagan ko nga nakamaan si Manding Bukay nga ginbulong ako kang iba nga surhano. Pero bisan paano, nagpasalamat ako sa ana nga bulig. Sa gihapon, si Imak ang nag-imaw kanakun hasta sa katapusan ko nga pagbalik kay Manding Bukay. Si Imak isara sa mga nagdampig kanakun.
Sa liwat namun nga pagsugilanun ni John nga manugpakut, ginpamangkot ko tana nga wanhaw daw ginpabay-an ako kang mga anghel dela gwardya nga nakit-an na sa kilid ko kauna. Ang mga anghel, ang hambal na, pirmi naga-imaw sa tawu. Rugyan tanda sa luyo sa tanan nga tion agud magbulig, magpabaskug, kag magpaandam. Ugaring wara dya tanda ti kaugalingun nga mando.
Wara dya gapasilabut sa desisyon ukon ginabuhat kang mga tawu. Pirmi ta ikaw ginapadumdum kauna nga mangadi kag tawgun sanda sa tanan nga tion. Kon indi mo tanda pagtawgun kag mangayo kang bulig, indi man tanda maghulag bisan ginahalitan run ikaw, ang paaman ni John. Gani umpisa kato, pirmi ko ginatamyaw si St. Michael, ang akun nga angel dela gwardya, kag si St. Barrachiel, nga nagpabaskug pa gid kang akun pagtuo sa Diyos.
Nagsimba ako sa pag-abot kang Domingo kang Pagkabanhaw. Ang mga kabulig kang Makaako maduro pero ang bulig nga nagakaangay para kanimo magaabot sa tion suno sa ana nga pagbuut, ang sermon kang pari. Ang mga tawu nga kaimaw ni Imak nga klasmet ko, ang manugpakut nga si John, ang suud ko nga amigo nga si Mark, Si Insong, si Manding Ipyon kag Soling, si Manding Purik nga masadyahun kag ngurusyun gihapon, nga nag-untat run sa anang obra kag mag-uli sa Samar agud magpahuway kang maghalin ako sa akun apartment, si Manding Bukay, si Tay Roque, kag si nanay, amo dya tanda ang mga bulig nga ginpadara kanakun sa tsakto nga tion.
Pero sa tanan si nanay ang wara ti kaanggid nga bulig ko. Ang ana pagpalangga sirak sa kadulum nga wara pagkiraw. Samtang ang tanan nangampo run sa pagpadayon, ang ana paglaum ligum kag siri gihapon. Ang pagtuo na sa banglid mas bakud kag mapag-un, mas supug sa gindapun nga hiwit kag idalmunun. Kon kay Manding Bukay pa, ang mga kataragman akun nalampasan tanan tungud kay nanay.
Apat run ka Martes santo ang nagligad. Ang mga nag-aragi, kon diin gindarawat ang dya nga sugidanun, daw malus-aw lang nga mga damguhanun. Daw kang san-o lang.
Kag rugya, sa atubang kang bintana kang akun opisina sa New York, nagayuhum ako samtang ginasundan ko ka turuk ang adlaw nga nagahingarup, ang paglugum kang sirum liwat nagpadumdum kang kahagnup.
- Ang Katapusan -
 Add as favourites (12) |  Quote this article on your site | Views: 650
Only registered users can write comments.
Please login or register. Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved |
