HIWIT

  
Ang nagligad:

Ginbisita ko ang surhano nga kilala ni Imak.  Ginpaman-an ako ni Manding Bukay nga sa kato nga gabii, tirawan ang akun kapag-un gani kinahanglan ko kang panaming.  Ang pula nga kandila ginsindihan ko pa-abot sa balay.  Amo dya ang nag-iwag sa bayi nga mal-am nga akun nakit-an nga nagaluhod sa kilid kang akun katre.  Kang manimuron ako, ginlagas na ako kag nagtampad sa akun uyahun ang ana dagway sa gwa kang kapay.

Ang kasugpun kang atun sugidanun…

  
Ikaanum nga Tsapter:  Sumpa sa Paya

  
Madapugan ko ang ginhawa kang aswang, maramig kag daw asupre nga nagabalingaso.  Ang nagabaga na nga mga mata daw mga dagum nga nagatuslok sa panit ko.  Batiun ang kumod na nga naga orasyon.  Pirit ko nga ginawaslik ang akun panuruk pero indi ako makahulag.  Ang akun batiis nagbiriring sa sobra ka tiskug.

Dayon ko nabatyagan nga daw may nag-usgang sa tuo nga kilid kang akun katre.  Naman-an ko nga may nagpungko hay nagyupuk ang kama kag daw gin-ula ako paagto sa tuo.  Daw mangampo run ako.  Pero ang tanan dya pagtiraw lang, ang padumdum ko sa akun kaugalingun.  Sa tunga kadya tanan, makit-an ko ang sirak kang pula nga kandila.

Hinali nagtay-ug ang akun katre, sa una mahinay hasta amat-amat nga nagbaskug.  Pamatyag ko ginatahup ako sa kararaw.  Natumaran ko nga nagurap ang akun panuruk kag gulpi nadura ang dagway sa gwa kang kapay.  Ginbuslan dya kang kahoy nga may pinta nga puti.  Natingala ako kon manhaw kitaun ang mga lawa sa kisame.  Nagalutaw ako imaw sa katre!

Nagapalak ako sa kakulba nga basi magbaliskad ang katre kag iula ako nga daw semento nga ginmasa.  Pero nalipatan ko ang magpangyabut kang makit-an ko nga may mga kandila nga nagrulutaw sa palibot ko.  Mga sangka dosena, sari-sari ang kolor, kag mas daragkul sa butkun kang bata.

Indi mapatihan ang tanan nga dya.  Sa pinsar ko lang dya tanan nagakatabo.  Basi ginsuhot run ka hangin ang akun ulo.  Dya ang ginaliwat liwat ko hambal.  Nagpirung ako.  Sa amo dya nga tion napinsaran ko nga wara ako ti mahimo kundi ang mangamuyo.  Angay sa mga matun-an ko sa mga masunod nga tinuig, ang pagpangadi ang dampig nga wara ti pili.  Ang ayuda ginatugro kon ginpangayo.

Nagkariring ang orasan sa pagsamput kang alas tres.  Ginhungud ko kaina nga magpaalarma agud maman-an ko nga pwede run ako ka turog.  Nasat-uman ko nga mayad nga idiya dya, hay hinali naglinung ang tanan, ang katre ko nagbalik run rapit sa lamisita kon diin natungtong ang kandila nga pula, nga hasta kadya padayon nga nagasadlab.  Ginpatay ko ang orasan.  Bahul ang pasalamat nga nauli sa normal ang kasanag kag kurti kang akun kwarto.  Daw ginbunutan ako kang tariwis nga siit.  Ginpadayon ko ang pagpangamuyo samtang nagapirung.  Kaput ang rosarito kag malagday nga nagaginhawa, naturugan ako.

Ginduaw ko si Manding Bukay sugon sa ana una nga pabilin.  Pag-abot kang Biyernes ti hapon, rugto ruman ako nagapungko sa atubang na.  Sa anang uluhan makit-an ko ang altar nga napuno kang nasari-sari nga mga santos nga haros indi ko makilala pero tanan dya santos kang simbahan nga Katoliko.  Sa tunga kang altar amo ang Santo Ninyo kag ang laragway kang hamtung nga si Hesus kag ang anang iloy nga si Santa Maria.  Sa ubus kang altar, sindido ang mga kandila nga daw sa tubudan nga pag-agas kang luha.

Liwat nga gintawas ako ni Manding Bukay paagi sa pulso kag sa pagwaswas kang ginisi nga papel nga ginsawsaw sa lana.  Dayon na hambal nga natuipan run kang aswang nga may nagakuntra sa ana nga hiwit gani sigurado nga mangaman dya.  Ginmuno na nga mayad nalampasan ko ang kaupangan kang nagligad nga Martes hay kon indi basi nagbuang ako ukon nag-ulbo run buol ko kadya.  Nagyuhum lang ako kang maaslum.  Nadumduman ko ang silot nga akun naagyan.  Kon mahina-hina lang ako, basi tuod nga nadayunan ako.  Ginpaathag kanakun ni Manding Bukay nga ginsulud kang manughiwit ang akun damgo.  Amo dya nga ginpaandam na kanakun nga indi magturog.  Hay kon masulud na dya, indi ako dayon makabugtaw kag mangin mahuyang ako sa anang mga halit.  Pasalamat ikaw sa pula nga kandila, hambal ni Manding Bukay.  Amo dya ang nag-iwag sa imo damgo kag namalabag sa pagsal-ut kang aswang sa imo lawas.  Gusto na dya sudlun agud mapigus na ang imo espiritu hasta marumpag dya.  Malawig pa ang mga paathag ni Manding Bukay pero wara ko malipati ang ginpamankot ko kang Martes kon sin-o ang nagpahiwit kag wanhaw.

Ang gugma kang bayi nga gindis-ayrehan kaanggid kang balud nga indi mapunggan, daw sa luwa nga hambal ni Manding Bukay.  Dayon na kadlaw.  Wara dya ti pili kon magtimalus.  Balikid ikaw sa pulo ka tuig nga nagligad, ang padayon na.  Ang bayi nga dya maanyag, ang panit na daw parehas kang singkamas sa kaputi.  Marapit tana kanimo ugaring wara mo gintugruan kang pagtamud ang ana pagpalangga kanimo.  Para kana daw suyak dya sa tagipusuon.  Mapin-ud, mahapdi.  Gani napinsaran na ang magtimalus.  Halin sa gawang kang simbahan hasta sa atubang kang altar nagluhod ang dya nga babayi nga nagasiyak.  Ang ana panaad amo ang imo silot nga gintuman kang manughiwit nga taga Siquijor.  Amo dya ang ginhimo kang manughiwit, ang padayon nga istorya ni Manding Bukay, samtang nagapirung nga daw nagapasurip.

Ang imo litrato ginbutang sa paya kang niyog.  Gintabunan dya kang baras kag ginbuta kang ulod.  Matapos putson, ginlubung dya sa patyo, sa idalum kang pantyon imaw ang sumpa kanimo.  Amo ria nga mabatyagan mo nga ang bukol sa imo uyahun kag liug nagasibwal kag nagangutngut sa kada pag-ukad kang mga ulod.  Kon indi dya matapna dayon, ang panit mo ut-utun kang ulod hasta magkaradunot.

Nagkaratul ang kalawasan ko nga daw puno kang giruk kang mabatian ko dya.  Kinahanglan  malubad ang hiwit insigida, ang paandam ni Manding Bukay.  Natuipan ko kon manhaw.  Ang kwaresma masugod run sa masunod nga semana kag ang mga surhano indi makapamulong sa tiyempo kang semana santa.

- May Kasugpon -

	1. 11-11-2006 15:48
	daw ga lantaw lang ta kang shake rattle n' roll...kakabakaba...okat tokat...ga nami ron ang mga kasunod nga hitabo...chapter 7 pa gid please... Guest Report

mhing

	2. 11-11-2006 16:33
	huo mn.. hehe Guest Report

Jalexanderdh

Only registered users can write comments.
Please login or register.

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved