HIWIT

Ang nagligad:

Ginpaalinton ni Insong nga surhano paagi kay nanay nga ginahiwitan ako kang bayi nga aswang.  May ginhatud nga manugbulong sa balay ugaring pagsamput pa lang sa gawang ginkumbulsyon dya kag nagturong ang mata na.

Ang kasugpun kang atun sugidanun…

  
Ikalima nga Tsapter:  Ang Pagtiraw

  
Nag-us-us nga daw upos kang tabako si Soling pero mayad lang nasagang ni Manding Ipyon bag-o malugmok sa salug.  Madasig ko nga gindawat patindug si Soling.  Insigida nga naulian man tana pero matigdas ang butkun na nga nadakup ko.  Makit-an ko sa anang kiwi nga baba ang kasakit nga nabatyagan na.  Ano ang natabo, pangusisa ni manding Ipyon.  Wara magsabat si Soling, kag gulpi pinanghablot na ang mga gamit nga ana nabuy-an.  Dadagun-dagun dya nga magtalikod nga daw may ginapalagyuhan. 

Sa sulud run kang taxi kang amun nalab-ot si Soling.  Nagsulud man dayon si Manding Ipyon sa sarakyan.  Nagapanghurunos ang ginhawa na nga naghambal kanakun.  Kinahanglan magparayu ikaw sa balay nga ria.  Indi mo masarangan ang kabaskug nanda nga dara kang andang kaduruhun.  Nagaarawas ang mga kondinado nga kalag sa kwarto mo, tanan mapintas.  Nakita ko ang butkun ni Soling nga nagabanug kang ang anang mata nga daw gintuslok.  Gintambagan nanda ako, may naggapos sa akun kahig kag alima, may nagkamras sa akun uyahun, samtang ginhampak kang sangka bayi ang akun dahi kag dughan.  Wara ikaw ti bato kananda.  Dayon burhot kang sarakyan.

Wara ako ti tsansa nga mamangkot kon wanhaw wara ko maagyi ang ana inagihan.  Nadumduman ko nga indi pa ako pwede makahalin rugya hay may multa kon indi ko matapos ang kontrata sa balay.  Hinali nagtaghol ang akun silpon.  Si Imak nga akun klasmit.  Ginapaagto na ako sa Pedro Gil hay may naistorya tana nga surhano.  Kadya dayon, ang hambal na.  Makitaay kami sa Harrison Plaza kar-on mga alas sais.  Importante gid dya kag indi pwede maparum-an.  Ang limug ni Imak nagabarak, maisug kag hugut.

Marayu pa ako kag ginsumalang ni Imak.  Daragkul ang lik-ang nga daw mabayaan kang barko.  Samtang nagapanaw kami, ginsugid na kanakun kon paano na nakilala si Manding Bukay, isara ka bunggaitan nga surhano rugya sa Manila nga natawu kag nagbahul sa Surigao nga parte kang Mindanao.  Nagpanglubaybay kami sa masiuk kag masipot nga aragyan pasulud sa maikit nga mga panimalay hasta makasamput kami sa ugsadan nga may linya kang mga sinelas kag sapatos.  Duro bay bisita na, ang kumod ni Imak.  Nagaurukad sa kaduruhun ang mga tawu sa sulud agud magpabulong.  Mayad lang hay duro man kananda ang pauli run.  Kami ang pinakaurihi mag-abot gani mga tunga sa oras ang amun hulat.  Mga alas siyete sa gabii run kang magpuas ang mga bisita kag gin-abibar kami ni Manding Bukay.

Ginturuk na ako kang madalum nga daw nagatagos sa akun lawas.  Ang bayhun na daw lansang sa katigdas kag ang kurit kang anang mata daw sa ayam nga manuruso. Pira ka segundo nga wara tana magmisuk, dayon na yuhum nga nagpaanyag kang anang uyahun.  Si Manding Bukay matambuk pero mapagsik nga babayi, mga kwarenta anyos ang edad, maisug kag diretso ang turuk.  Ginpapungko na ako sa anang atubangan.  Gindab-ot na ang akun tuo nga alima kag ginpulsuhan.  Dayon na buul kang ginisi nga papel, ginsawsaw sa lana, kag ginwaswas na sa akun alimpuduhan kag kalawasan nga daw may ginatabog.  Bayi nga aswang ang nagahiwit kanimo, hambal na, samtang ginasunog na ang papel.

Bukut bag-o sa akun pamatin-an ang ginmuno ni Manding Bukay.  Mayad nga nakahingabot ikaw kadya nga gabii, matawhay na nga hambal.  Kon indi ikaw mapatay kar-on sa tungang gab-i, mabuang ikaw sa kahadluk.  Daw ginbasyahan ako kang maramig nga tubig, pati lasi ko nagkudug.  Amo to guro nga nagapamirit si Imak nga indi dya pwede maparum-anan.  Matuipan ko sa urihi nga ginpangamanan run ni Manding Bukay si Imak kang mag-istoryahanay sanda sa telepono.  Amo ra ka tanda nga surhano si Manding Bukay.  Gin-usisa ko kon sin-o ang nagpahiwit kag ano ang rason.  Ang kuon na, maman-an natun ria sa masunod nga inadlaw.  Kulang run kita sa panahon.  Ang impotante kadya, may panaming ikaw.  Kar-un sa tungang gabii, tirawan nanda ang imo kapag-un, gani kinahanglan mo kang ayuda.  Imawan ta ikaw.  Dayon na dawhat kang pula nga kandila nga napatong sa lamisa kag ginduhol na kanakun.  Nagaisahanun dya nga daw ginhanda sa akun pag-abot.  Nagturuk ako kay Imak nga sa kadya nga tion daw nagkusug sa kahadluk, ang ana baba naglaylay samtang suud nga nagapamati kay Manding Bukay.

Nagalangoy sa kahawaan ang akun huna-huna samtang nagapauli ako.  Indi pwede makahingga si Imak sa balay hay wara ti imaw ang hinablos na nga bata gani nagyapon lang kami kang madasig nga mag-uli.  Alas diyes sa gabii kang mag-abot ako sa balay.  Sa akun pagsamput, ginsindihan ko ang pula nga kandila suno sa mando ni Manding Bukay.  Antes magtakras sa katre, gin-usisa ko kon sarado run ang bintana kag gawang.  Sa akun pagpangadi, nabinag-binag ko ang akun mga kakulangan, ang kahuyang kang akun pagtuo.  Malawid run nga tinuig nga marayu ang akun pagtamud sa Makaako, binulan kon makasimba, kag kon kis-a urihi pa sa misa.  Padumdum siguro dya ang nagakaratabo kanakun.  Mabug-at ang akun buut samtang malinung nga ginpadayon ang pagpangadi.  Indi kaw magturog asta indi pa makalampas ang alas tres sa kaagahun, ang bilin ni Manding Bukay.  Ang kataragman maabot sa katuyo kag damgo.

Nagdukot ang akun panuruk sa kalayo nga mahinay pero matinung nga nagatunaw kang pula nga kandila, nga kuon ni Manding Bukay, binditado kag gintusmog sa orasyon.  Hinali nagbag-o ang akun palibot, nagdulum kag nagramig ang dapya kang hangin.  Madapugan ko ang usbong kang lupa nga daw bag-o lang nagtarithi amo man ang kahamut kang bulak kang kalatsutsi.  Sa akun sikwayan, maaninag ko ang pantyon nga may krus.  Sa patyo ako!  Hinali nagmura ang mal-am nga babayi nga nagapatadyong, ang anang bukay nga buhok nagatunton asta sa hawak, nagamudlo ang pula nga mga mata, kag nagaralaway.  May bitbit tana nga paya kag sa sulud may litrato kag may nagaarawas nga ulod.  Nagsinggit ako kang makita ko nga nagaturuk tana kag nagaparapit kanakun.  Pero wara ti limug nga nagagwa sa akun baba.  Nangurus ako kag pirit nga ginkapkap ang rosarito nga tugro ni nanay sa idalum kang akun ulunan.  Daw naputos ako sa sako, indi ako makaginhawa.

Nakabugtaw ako nga nagaburambud ang kapay sa akun liug.  Ginlaghap ko ang iwag kang kandila nga pula nga natungtong sa wala nga kilid kang akun katre.  Paglingi ko agud magturuk, daw gindakup ako kag gintakpan kang amakan.

Rugyan sa salug, sa binit kang katre, ang mal-am nga bayi nagaluhod kag nagaduko nga nagapangadi.  Hinali gin-atubang na ako.  Nagpisik ako kag magtiyabaw, ang akun limug libagun kag putos kang kahadluk.  Daw maumang ako!  Indi ko maman-an kon diin masuhot.  Nagadukduk sa akun pinsar ang puti na nga buhok kag ang pula na nga mata nga nagasiga.  Aswang! ang singgit ko, haros mapugto ang ginhawa, dayon ko panimuron.  Nagpirung ako kang hugut, nagapanilag nga ginahangos.  Kang magligad ang pira ka segundo nagmukra ako, nagapangabay nga tapos run ang tanan.  Nagsayup ako….

Ang kasanag kang kandila nagatagos sa manipis nga tela kang kapay.  Kang ginmukra ko ang akun mata, sa idalum kang kapay, madulum pero naaninaw ko ang dagway kang bayi nga aswang...nagalutaw kag nagatamud sa akun uyahun….

  
- May Kasugpon -

	1. 10-11-2006 09:13
	whaaaa! aguy, ja ruman kita...  true story gd mn ja? kng kaisa, gapinsar ko buhat buhat nlng hay sobra na ka kaladlukan... hehe  peace ed!  im everyday waiting for the next episode... http://www.bisngawcreations.blogspot.com Guest Report

This e-mail address is being protected from spam bots, you need JavaScript enabled to view it

	2. 11-11-2006 15:37
	whaaaa! ay maan nga storya dya ah..gina hadlukan man ko magturog sa kwarto ko ah basi may aswang ga baga mata na..pero padayuna ang istorya ah maskin ga hawat hawat paginhawa.. Guest Report

mhing

	3. 19-01-2008 21:52
	whaaaa! nami pa raad magbasa pero me duty pa ako.. ako na lang gali ja sara sa room sa computeran.. basi me mal-am ja karon nga magsulod! Registered Report

darckj

Only registered users can write comments.
Please login or register.

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved