|
HIWIT Ang nagligad: Naabtan kang akun panuruk ang bata nga bayi nga naghapros kang akun batiis. Nabanaagan ko nga wara dya ti uyahun. Duro pa nga katingalahan ang nagtiraw kang akun kaisug. Sara ka adlaw, hinali lang nagbrown out. Dali-dali ko gindakup ang posporo agud sindihan ang kandila. Kag hinali may naghuyup kang maramig sa akun talinga. Sa kilid kang akun mata, nasiplatan ko nga may nagatindug nga tawu sa likod kang akun wala nga abaga. Ang kasugpun kang atun sugidanun… Ikaapat nga Tsapter: Laragway sa Ban-awan nga Bato Ang kapagrus halin sa mansanas nga akun ginyapon, daw sa harigi kang balay nga gin-at-at kang anay. Magabok…dali marumpag…. Man-an ko nga ginagari-gari ako kang tawu sa akun likod nga magtalingi kag mag-atubang ka na pero nagdis-ayre ako sa anang pangagda. Pirit ko nga ginbaylo ang akun pinsar parayu. Kasan-o lang, malinung kag malipayun ang pangabuhi ko, ang napinsaran ko. Apat ka bulan pa lang ako nakabalik halin sa America agud tapusun ang akun pagtuun nga nasugdan rugya sa AIM. Wara ako ti padahum-dahum nga amo dya ang masug-alaw ko sa akun pag-abot. Nagyuhum ako kang malas-ay pero bisan paano nagmag-an ang akun pamatyag. Marayu ang pinsar ko samtang nagaturuk ako sa nagasaut nga kalayo sa pabilo kang esperma. Panandalian nga nalipatan ko ang tawu sa akun likod kang hinali may nanuktok sa gawang. Daw balagun nga ginbuklas ang akun animo. Namadmadan ako. Ginturuk ko kang matarum ang gawang nga kahoy. Mga panulay, nagbalik ruman kamo, ang panggasud ko nga ang limug daw sa balabaw nga naipit. Siguro nag-abot run ang tion para atubangun ko kamo. Liwat nga nabatian ko ang toktok. Mas madasig kag mas mabaskug pa sa bagting kang lingganay. Danay kaw, dyan run, ang singgit ko. Gintungtong ko ang esperma sa lamisita, agud buksan ang ganhaan. Mapagsik ang akun pagkalihuk, wara ti mantsa kang kahadluk. Ang kiraw nga sirak kang esperma ang nagtuytoy kanakun parapit sa gawang. Makit-an ko padayon ang saut kang kalayo nga daw ginatayhup bisan wara ti hangin kag sarado ang mga bintana. Maisug ko nga ginbutung pabukas ang pwertahan. Mayad nga gabii, ang panamyaw kang laki nga nakauniporme kang puti. Gwardya kang bilding ang nagsulud sa pinsar ko. Bahul nga tawu, mas mataas kanakun. Ang limug na madalum nga daw ginhunos sa awang. Indi ko mamulalngan ka mayad ang nawung na hay madulum sa gwa. Mga diyes minutos pa antes mag-andar ang giniritor kang bilding, ang pamaan na, kag indi pwede magamit ang elevator. Dayon na talikod kag magpanaw nga daw nagalutaw, wara ti barabalikid, hasta madura tana sa kadurulman. Tonto nga gwardya dya, bisan plaslayt, wara ti dara. Burubhay nagtunog ang telepono. Gindab-ot ko dya kag ginsabat. Sir, sa front desk dya, mga diyes minutos pa antes mag-andar ang giniritor, hambal sa pihak nga linya. May gamay lang nga aberya gani indi pa pwede magamit ang elevator. May nagpamaan run kanakun, sabat ko. Bag-o lang gani maghalin rugya ang isara sa mga gwardiya ninyo. Sir, indi mahimo ria hay ikaw pa lang ang una ko nga natawgan, sabat na. Darwa lang kami dyuti kadya nga gabii. Ako kag si Fernandez nga dya sa atubang ko nagakid-an kang makina. Kang magtakup ang telepono nadumduman ko nga sa ikapulo ako nga salug kang bilding. Imposible nga matakras ang hagdanan sa sangka minuto. Wara ako maturugan ka paminsar asta mag-alas-sais sa kaagahun. Nagadaguuk ang busong ko kang magbugtaw ako kang mga ala una sa hapon. Nanaog ako kag ma-igma. Kang pabalik run ako sa balay, nakabaton ako kang tawag sa silpon halin kay nanay sa Antique. Nasugidan ko si nanay kang nagligad nga Miyerkules tungud sa nagkaratabo kanakun gani nag-agto tana sa surhano agud ipaturuk ang sabid ko. Ginbilid ikaw ni Insong, surhano nga taga Bantayan, hambal na. Ginahiwitan ikaw kang bayi nga aswang! Abi ko ginabagat lang ako kang mga murto dya sa balay, may hiwit pa gali. Daw nahum-ut ako sa dya nga balita. Matuod kuno ang mga murto sa balay ko pero indi dya ang ginhalinan kang mga bukol sa akun uyahun kundi hiwit. Dya nahurma kag nakit-an sa ban-awan ni Insong. Ang ban-awan na sangka bato nga nagabadlak bisan sa dulum. Mataas ang gahum kang manughiwit, labaw sa kaaram ni Insong gani nangampo si Insong nga indi magpasilabut sa kahadluk nga maumid. Si Manding mo Ipyon, padayon ni nanany, may kilala nga manugbulong sa Manila. Paagtunon ko tana dyan agud ihatud na sa balay mo ang manugbulong sa paraabuton nga Martes. Sa kaluoy kang Makaako, buhi pa ako kang mag-abot ang adlaw nga Martes. Nagatarithi kato kag nagaguum ang kalangitan. Mabaskug ang bertud kang pagbulong sa Martes ukon Biyernes hay amo dya ang tag-hiriwit nga mga inadlaw, hambal kuno ni Insong. Alas kwatro pa lang nag-uli run ako agud sugataun si Manding Ipyon kag ang imaw na nga manugbulong nga si Soling, mga kwarenta isingko anyos ang edad, maniwang, kag hipusun. May dara tanda nga mga pinutos nga dahon-dahon, kandila, rosarito, balde, kag labador nga gamay. Nagatiringkadol ang mga gamit sa pagsamput namun sa atubang kang akun gawang. Ginduso ko dya agud buksan, kasunod si Soling kag si Manding Ipyon. Hinali nagpundo si Soling kag maghulunghulung, pahani nga nagakumud, nga daw may ginakaraan. Nakit-an ko nga lapsi ang ana uyahun, ang lawas na gulpi nagkudug nga daw ginkuyap, ang mata na nagturung kag naglutaw ang puro puti kang anang kalimutaw …. - May kasugpon -
 Add as favourites (7) |  Quote this article on your site | Views: 600
Only registered users can write comments.
Please login or register. Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved |
more more! hehe nami paring edgar...
