Ang nagligad:

Daw nahaw-asan ang pamatyag ko kang naman-an ko nga si Manang Purik ang ginakahadlukan ko nga white lady sa sulud kang kwarto.  Pati tana nanguyus man sa akun gulpi nga pag-abot.  Ginlusaw namun sa harakhak ang kulba nga mas mabaskug pa sa lagabung kang tambur.  Nakaturog ako sa kakapoy kag wara ko matalupangdi ang pagdalagan kang oras.  Nabugtawan ko ang mamag-an nga hapros kang sangka alima sa akun batiis, ang mabaskug nga pagbutung sa akun kahig, kag ang hinali nga pagbukas kang patay nga TV.

Ang kasugpun kang atun sugidanun…

Ikatlo nga Tsapter:  Tigadlum sa Buho

Hinali ako nagburungkalas sa akun pagkabatang.  Nabatyagan ko ang alima nga naghiram kag akun batiis kag ang katre nagatay-ug nga daw gina-ayag.  Gulpi man dya tanan nag-untat.  Madasig ang mga hitabo nga daw huyup kang hangin pero naabutan kang akun pang-aninaw ang bayo nga suksuk kang bata.  Itum ang bestida na nga may burda sa parti kang dughan.  Pungus ang anang buhuk nga gintunga sa darwa ka parte.  Abi ko una nagatalikod tana pero nasat-uman ko sa urihi nga panas ang anang uyahun.  Mabatyagan ko pa ang kahugut kang anang gamay nga mga alima samtang ginabutung na ang akun kahig.

Gin-usisa ko ang akun kahig nga naglapaw sa punta kang katre.  Nanguyus ako kang makita ko nga nahapay ang bulbol sa parte nga ginbutung.  Nagpungko anay ako kag magpanilag.  Damgo lang to, nahambal ko sa akun kaugalingun, dayon ko hipid kang akun uyahun nga nayukut sa ulunan.  Indi ko gusto nga ipakita nga nahadluk ako.  Ginduaw liwat ako kang kakulba nga nalipatan ko run kaina.  Ginpirit ko nga makabangon agud mag-inum kang tubig pero pamatyag ko daw lipung ako nga pantat…daw bibi nga lingin…indi ko maman-an kon diin mawaslik.

Gintamwa ko ang orasan.  Alas dos y medya sa kaagahun.  Amo to kalawid ang turog ko.  Daw ginduyan ako sa katuyo.  Gin-usug ko ang akun mga mata nga nagharabal sa turog.  Natarupangdan ko nga ang TV bukas kag ang pasayud parte sa KFC.  Nadumduman ko nga wara pa ako kayapon.  Nalipasan siguro ako kang gutum amo ra nga nanghina ako kag naguba ang akun paminsarun.  Nagtindug ako kag ginpasiga ang sulo sa akun uluhan.  Hinay-hinay ko nga ginyudyud ang akun kahig agud makaparapit sa predyidir para magbuul kang karan-un.  Ginbuksan ko dya kag ginlab-ot ang pula nga mansanas.  Amo lang dya ang nabilin sa pinamakal ko kang nagligad nga Sabado.  Mabudlay kon indi kamaan magraha, magutman gid ikaw.

Samtang ginagus-ab ko ang matipurun nga mansanas, akun ginbalikan ang natabo kaina.  Bukun ti tumalagsahun dya nga hitabo.  Pira ka beses run nakabati ako kang mga tuktok sa pwertahan nga kun buksan ko wara man ti tawo.  Ang salug sa bilding ko malinung kag wara kaw ti makita nga naga-istambay.  Sa kalawidun, nag-untat ang mga tuktok hay wara ko ginsahut.  Natak-an man siguro.  Manawag tana ria kon may taho gid man.  Ginkalipatan ko run dya ugaring may isara ka hitabo nga liwat-liwat nagabisita sa pinsar ko.

Sabado kato nga gabii.  Wara ako sa balay hay may miting kami parti sa Kasadyahan.  Si Mark nga suud ko nga amigo nagtawag agud mamangkot kang ginabaligya nga kondominyom yunit sa Ayala.  Sala ang natawgan na nga numero.  Imbis nga silpon,  numero sa balay ang napindot na.  Sugun kana, nagtunog kang tatlo ka beses ang telepono kag dayon may naghakwat.  Ang nagsabat limug kang mal-am nga daw Latin ang hambal nga daw naga misa.  Nagkadlaw si Mark hay abi na ginalahug ko tana.  Namangkot pa kon diin ako nakatuon kang Latin.  Pero wara run ti nagsabat kag dayon napatay ang linya.  Naliwat dya sa tatlo pa ka mga tinion kag sa kada sara lain-lain ang limug nga mabatian.  Sugud kato wara run magtawag si Mark sa balay.  Dya nga paraisipan, ginpaathag tanan ni John kanakun.

May buho dyan sa balay mo, hambal na, kon diin nagagwa-pasulud ang mga kalag nga nagtalang.  Amo dya ang aragyan paagto sa pihak nga bahin kang kalibutan.  Ang imo kwarto parahuwayan samtang naguhulat tanda magtabuk.  Gani indi mo malikawan nga may magtandug kang mga gamit mo.  Luwas karia, may mga malain man nga espiritu nga nahisa kanimo kag gusto ikaw sakitun.  Kon nagaturog ikaw, ginakastigo ang lawas mo nga espiritwal amo ra mabatyagan mo ang kakapoy sa imo pagbugtaw.  Ang mga bukul sa uyahun mo sara sa andang mga siste kanimo agud maghalin kaw dya sa kwarto.  Pero mayad gani wara pa nanda ikaw mapakitai.  Huud, wara pa….

Nagpisik ako kang madumduman ko ang mga bukol ko sa lawas.  Daw mga makul dya nga nag-urusbong lang.  Nami pamunpunon kag pabukalan hasta magrulupok.  Ginhimo ko run ang tanan agud mapanas ang mga bukol sa akun uyahun.  Huray kag magarut ang akun pinsar kon ano pa ang sunod nga himuon.  Indi ko run maagwantahan dya.  Kinahanglan mangayo run ako kang bulig.  Kag hinali lang, wara ti pamaan, napatay ang sulo kag TV.  Ang bilog nga balay gintulun kang kadulum kag kalinung.

Madasig ko nga ginlili ang kurtina agud turukun ang pihak bilding.  Brown out.  Luwas abi sa sanag nga tugro kang bulan, madulum ang palibot nga daw gintakluban kang tabungus.  Ginbuksan ko ang lamisita sa kilid kang akun katre kag ginkapkap ang kandila nga esperma kag posporo.  Mayad lang hando ikaw kundi indi kaw manglaghap kadya, ang sukma ko sa akun kaugalingun.  Hinali lang may naghuyup sa likod kang akun talinga.  Maramig nga daw hangin kang Disyembre ang ana ginhawa.  Naudum ako.  Indi ako makahulag.  Ang tanan nga buhok sa akun lawas nagtiriskug pati ang nahapay nga bulbol sa akun batiis.  Ginpirung ko kang hugut ang akun mga mata kag mangadi kay St. Michael kag St. Barrachiel.  Parayu kadu, dampigi ninyo ako sa kataragman kang kadulum.

Kaput sa nagakurudug nga tudlo, madasig ko nga ginkiskis ang palito sa posporo agud sindihan ang esperma.  Nagsadlab ang pula nga kalayo sa punta kang palito kag nagtugro dya kang maniki nga kapawa.  Samtang ginahulat ko nga magkudut ang kalayo sa esperma, nasiplatan ko sa kilid kang akun panuruk, may tawu nga nagatindug sa likod kang akun wala nga abaga….

- May Kasugpon -

	1. 08-11-2006 12:22
	very nice, ari na! tnx edgar... love reading this! nami! Guest Report

Jalexanderdh

	2. 08-11-2006 16:35
	daw pedro penduko ba, gina kahawat-hawatan ang mga masunod nga bahinka istorya. subaybayan ta ja. ahahahahah. Guest Report

sirMark

	3. 08-11-2006 19:13
	waaaaaahhhhhhh! indi ko mapunggan nga magbalikid sa akon abaga.. nali may tawo man nga naga tindog! nagadalhit ang atay ko!  mayad lang indi uso brown out ja sa japan! heheheheheh!  Guest Report

ztirfps

	4. 08-11-2006 19:38
	Hala! may naga tindog liwan sa wala na abaga... Hindi anay ako magpulaw kar-on daw ga abay ako sa eksena ... Kurulbaan! Guest Report

fridy

	5. 09-11-2006 20:00
	OK lang may matindug basta sexy hahahahaha Guest Report

sirMark

Only registered users can write comments.
Please login or register.

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved