| Hiwit |
|
|
| Posted by Edgar Poe | ||||||||||||||||||||||||||||||||||||||||
|
src="http://pagead2.googlesyndication.com/pagead/show_ads.js"> Ang sugidanun nga inyo mabasahan natuhay sa matuod nga mga hitabo. Duro kanatun ang nakabati kang mga makatiringala kag makaharadluk nga istorya, pero ang akun isugid matuod ko nga inagyan. Kun may mga tawo, tumawo ukon kalag nga maumid, wara ako ti kadu nga tuyo, kag kadya pa lang nagapangayo ako ka andang pasaylo. Ang mga tawo nga imaw sa sugidanun nga dya tanan buhi kag matuod pero ginbayluhan ang andang mga ngaran. Hiwit Part I Ginsundan ko ka turok ang pagtunod kang adlaw sa bintana kang akun opisina sa Makati. Manug-alas singko ruman sa kahapunanun kag madasig ang paglapnag kang sirum nga daw kapay sa kadulum. Ang hangin lab-as pero nagapanarutsot sa akun kusug ang karamig nga nagapukaw kang kahadluk. Mauli ruman ako sa akun apartment kung diin naga-isahanun ako. Pira run kagabii nga wara ako makaturog sa mga nagkaratabo nga indi ko maathagan. May murto sa akun apartment. Amo dya ang hambal ni John, kilala ko nga psychic. Wara na pa makita ang akun apartment pero ginbisita na dya sa iba nga paagi. Ana ginsugid nga ang akun apartment rumbuhan kang mga patay nga tawo. Daw sa plaza sa kaduro ang murto nga nagatinir sa balay ko. Malagday ang akun pagkalihuk nga daw wara ti gana. Ginlab-ot ko ang keyboard kag ginpatay ang computer. Sin-o man abi ang maganahan mag-uli sa balay nga ginamurtuhan? Kapoy ako hay kulang sa turog sa naglingad nga pito ka adlaw. Pwede nga indi ako mag-uli sa apartment kadya nga gabii, indi gani hagadun ko si Imak nga classmate ko agud imawan na ako maturog sa balay. Pabay-i run lang, ang hambal ko sa akun kaugalingun, indi bala mabaskug man ang imo pagtuo? Ang akun apartment paranawun lang kang mga kinse minutos halin sa opisina. Samtang nagapanaw ako, nagalupad ang akun huna-huna. Gintandug ko ang mga bukol sa akun uyahun nga daw punggud kang pamatan-un kun turukun. Daw mga makul nga nagturubo sa pungyahun ko kag sa iban pa nga parte kang akun lawas, ilabi run gid sa likod kag liug. Bag-o ang tanan kanakun. Tatlo pa lang ako ka bulan nga naghalin dya sa bag-o ko nga apartment agud marapit sa bag-o ko nga obra. Amo man dya ka lawig nga nagbulag kami kang akun nobya. Abi ko tana run gid ang akun madayunan. Sa sulud kang pulo ka tuig nga magnobya kami, imaw ko tana sa sangka balay gani wara ako maanad nga nagaisahanun. Antes mag-alas-sais nagatindug run ako sa atubang kang pwertahan kang akun apartment. Ginkapkap ko ang yabe sa akun bulsa pero ang akun pinsar nagaduha-duha kun masulod ako ukon indi. Ano abi kon pagbukas ko makita ko ang mal-am nga laki nga naga-Amerikana? Amo dya ang ginsugid ni John kanakun nga nakita na imaw ang sangka bata nga baye nga pito ka tuig. Ang laki mga otsenta run ang pang-edadun. Ginbale ko nga yamwat kag pamahug ang una nga hambal ni John. Wara ako nagpati kana parte sa mal-am nga laki kag bata nga bayi. Nag-umpisa ang tanan kang gin-istorya ko kay John nga wara naga-ayad ang mga bukol nga nagturubo sa pungyahun ko. Duro run nga doctor kag espesyalista ang nag-usisa kag nagresita kang nasari-sari nga bulong pero wara gid ti alibyo. Ang hambal stress lang ria sa bag-o mo nga obra. Ang obra ko sa bangko madali lang kag wara ti kabudlay. Hinali napanas ang mga paandam ni John. May nagakinulas ako nabatian sa sulud kang akun aprtment. May tawo sa sulud. Ginsuksuk ko ang yabe sa doorknob kag hinay-hinay nga ginlubag agud buksan. Mabatian ko ang kuba-kuba kang akun dughan. Daw mapati run ako sa mga ginpanghambal ni John nga kon kis-a ang mga espiritu makapahulag kang mga pagkabutang ukon makapakita sa mga tawo. Nagahulas ang akun palad sa kakulba samtang ginakaptan ko ang doorknow agud itikwang. - to be continued -  Add as favourites (18) |  Quote this article on your site | Views: 785
Only registered users can write comments. Powered by AkoComment Tweaked Special Edition v.1.4.6 |
||||||||||||||||||||||||||||||||||||||||
