Mapintas ang tag-irinit:

Ang akun tubug gamara parehas kang kasingkasing ko
nga ginauhaw sa imong katahum,ginahapoan kag ginabahulay
sa paghulat kanimo sa tunga kang gatagiti nga temperatura
dungan sa amat-amat nga pagkaging kang paglaum
nga makaptan liwan ang imong mga alima
kag madapulay ang imong dagway

ang adlaw nagapalubug kang akun panurukan
parehas kang bulawan nga nagsilaw kanimo  
kag nagpatalang parayu kanakun
ang kasingkal gapadumdumdum kanakun
kang mainit mo nga mga haruk kag hakus
nga sa tulad sa hangin ko lamang mabatyagan

kaangay ko ang laya nga tanum:
ang mga dahon kang akun kalipay nagkararitak kag naghubas run
ang suba nga anay gintampisawan kang atun mga kadlaw
makadangat pa ayhan sa gibungan kang katumanan ang atun mga pangako
kun ang ginatungtungan puro rurok run lang?- mga laya kag gumon
nga mga kabuhi nga una pa namarhan sangsa kanakun.

gaugut ako sa tag-irinit kag ginakalangkagan ko
ang dason nga pagtupa kang uran samtang galaum
nga ang tagsa ka turo magahugas kang pilas kang akun pagkatawo
kag magapalong kang naga daba-daba ko nga baratyagun para kanimo
nga gaupos kanakun kag samtang wara ikaw

sa tag-ururan ko gid lamangmatago
ang diyang kasubo nga ginamitlang kang akun mga luha.

Only registered users can write comments.
Please login or register.

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved