Gusto ko nga palanggaun kag respetohon kang akun isigkatawo. Wara it normal nga tawo nga indi malyag respetohon. Wara man it sin-o nga maka palangga kun wara it respeto sa anang tagipusoon kag pamensarun (magluwas kun may makapamatuod sa atubangan ko nga pwede nga wara ang sara kag diyan ang sara). Wara ako it mahimo kun indi kamo magpati sa mga madason nga mga sulud kang akun gusto ipahayag kag wara ako it intensiyon nga piritun kamo nga patihun gid ako. Gusto ko lang mag istorya angut sa tinaga nga respeto.

Pirme ko mabatian kag mabasahan ang diyang tinaga pero ano gid bala ang diyang ginatawag nga respeto?

Kang Grade 1 ako madumduman ko pa nga sa akun report card may nakabutang nga mga tinaga patas kang courtesy, honesty, industry kag iban pa abay run ang tinaga nga Respect sa diin kada tapos tagtaganay kang amun maestra kang amun report card mansig kumparar kami kang akun mga klasmeyts kag mansig turuk kun ano nga letra ang ginsulat ni maam sa tadlung kang kada tinaga kag sa mayad nga palad tanan kami nakabuul ka letter A. Kun kis-a gani ga ham-ut ako kun madumduman ko nga A akun mga ratings kag ginapamangkot ko ang akun kaugalingun kun ayhan takus man ako makabaton kang A sa tulad.

Suno sa akun kubus nga ihibalo and respeto sangka tinaga kang kabuhi. Ang diyang tinaga gapahayag kang sangka sibilisado kag disiplinado nga pagkatawo. Kun ang sangka tawo may respeto sa anang pareho kag sa anang kaugalingun tana may kapasidad sa pagpalapnag kang mayad nga kabubut-un kag pagtamud sa tunga kang katawhan. Ang respeto imahe kang paghigugma kag paghidaet kag responsible nga kahilwayan. Kun ang katawhan may respeto sa kada sara ang kahilwayan kang kada tawo indi maapektuhan kag malapakan kag mangin rayu ang kalibutan sa laragway kang inaway kag  kagamo.

Para kanakun, kun ako may respeto, ginakabig ko ang iban nga tawo bilang sangka ahente kang kamatuoran.

Gapati man ako nga sangka laragway kang respeto ang pagtugro kang tsansa sa iba sa tanan nga bagay kag pamaagi. Tsansa nga magpalangga kag palanggaun, magpabutyag kang huna-huna kag baratyagun, magpamati kag pamatian, kag labaw sa tanan, magkabuhi kag magtugro kabuhi.

May respeto ako kun gapamati ako kang baratyagun, opinion kag panurukan kang akun isigkatawo kag wara ko tana gina pirit nga magpati ukon batunon dayon ang akun kaugalingun nga mga panurukan kag opinion kag ginakabig ko nga kami pinasahi sa kada isara kag kada sara kanamun may pulos.

May respeto ako kun gina tahod ko ang anang mga gina himo kag wara ko dayon ginalantaw ang mga malain nga bahin kang anang mga buhat kundi ginapamatian ko ang tanan nga possible nga rason kag angulo kun andut nangin amo tana karia kag kun andut amo ra anang ginpili kag ginapatihan.

May respeto ako kun wara ko gina istorbo ang akun isigkatawo sa anang pagpakalinung kag wara ko gina intrahan ang anang personal nga pangabuhi.
May respeto ako kun wara ko gina baton ko nga naka sala ako kag ginapangayuan ko kang kapatawaran-Wara ko ginadara ang nga bagay sa pa isug-isug kag pa purus-purus kag wara ako gahandum nga magtimalus sa naka sala ukon naka sakit kanakun kundi ginahimuratan ko nga mapamatian ang bahin kang pihak kag pihak.

May respeto ako kun kamaan ako magpatawad kag magpaubus.

May respeto ako kun wara ko ginapabugal sa akun isigkatawo ang mga manggad , abilidad kag tanan nga mga grasya nga akun nabaton kundi ginakabig ko diya nga sangka huram kag kabaraslan sa Diyos, ang tag-iya kang tanan, kag wara ko ginakabig nga imol kag wara’t pulos ang akun isigkatawo.

May respeto ako kun ginaako ko nga ang tanan nga tawo may baratyagun may kinamatarung sa kalipay, kasubu, kasakit kag katibawasan kag kada tawo may handum kang kahilwayan kag kadarag-an kag kamaan ako maghibi imaw sa mga nagahibi kag maghugyaw imaw sa mga nagahinugyaw.

May respeto ako kun ginakilala ko ang mga layi kang Diyos kag tawo kag paghidaet kag katawhayan kang kalibutan nga  handum kang kadam-an . Kalakip sa respeto sa Diyos ang pagrespeto sa akun kaugalingun. Tanan kita gintuga sa imahe kang atun makaako kag kun ginarespeto ko kang akun kaugalingun gina respeto ko man ang akun tagtuga. Dugang pa, indi ako makatugro kang bagay nga wara kanakun pareho nga indi ko marespeto ang iban kun ako mismo war ate respeto sa akun kaugalingun.

Parehas kang pagsarig, ang respeto wara ginabakal, wara kundi gina tun-an kag gina patubo.. 

Sa tulad, amo pa lang diya ang akun naman-an, napanilagan kag na realisar angut sa tinaga nga respeto kag man-an ko kag ginaako ko nga duro pa ako it kinahanglan maman-an kag dapat himoonkag bisan sa akun ginpanghambal duro pa ang wara ko mahimo.. Kag base sa diyang akun namitlang nga pagkilala sa amo nga tinaga, gina kahuya ko kag ginaako sa akun kaugalingun nga bukun ako takus sa ginbutang kang akun maestra nga letter A sa akun report card kang elementary kag samtang ginasulat ko ang diyang bugu nga artikulo ginapamensar ko nga daad hasta san-o Grade 1 run lang ako hay sa amo nga edad ko kag grado mas gamay ang responsibilidad ko sa tinaga nga respeto kag daw ka hulas lang patihun kag tun-an ang diyang tinaga ugaring ang kabuhi ta wara it tsansa run mag isul kundi magapadayon lamang kag nagamando nga dapat ko atubangun ang diyang bag-o, mas dalum kag mas kinahanglanun nga pagkilala sa diyang tinaga kang kabuhi.

Sa hingapusan, man-an ko nga ikaw nga nagabasa kadya may naman-an man kag may lain nga pagkilala sa diyang tinaga samtang galaum man ako nga may napuslan man ikaw sa imong gin usik nga tiyempo sa pagbasa kanga kun sinulatan. Kun ano man ang imo makomentar  ukon reaksyion ginabaton ko it hugut sa tagipusuon kag pamensarun. Gusto man gani ikaw pamatian. Palihog istoryahi man ako. Kag kabay nga sa atun pag-istoryahanay magdugang kang atun pagkilala sa diyang tinaga kag pareho kita maka buul ka letter A sa alima kang atun gamhanan kag gina respeto nga Maestro kang kabuhi.

	1. 23-08-2008 22:20
	wow thanks sa pag post kadja nga article mo...respect is immenent sa bawat salita at buhat ka isa ka taho nasa personalidad mo dan pero iba iba gid man bay ang perception ka isigkataho sa bawat sara kag sara pero kun gusto mo nga respeto kaw ka isigkataho mo dapat respetuhon mo man tana give and take malang dan sa akon opinion... Registered Report

MeTeam

	2. 29-08-2008 09:51
	wow Thanks gid sa nagpost ng RESPETO.I learn a lot!Godbless!!! Registered Report

Analyn

Only registered users can write comments.
Please login or register.

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved