Ang Kinaray-a.com nagpatin-ad kang Original Kinaray-a Music ukon kilala bilang OKM kag nagpakilala sa bilog nga kalibutan kang kanami kag buhi nga mga kanta nga ginhimo kang mga musikero nga puro mga Antikenyo. Bangud kadya, nagakabagay run nga ang OKM mangin importante nga bahin kang sangka Filipino Online Radio nga nabase sa sagwa ka pungsod – ang Joko Jun Radio.

Ang Joko Jun Radio gin-umpisahan kang 2005 bilang pagtuman kang handum nga magpalayag kang mga Original Pilipino Music ukon OPM sa internet. Sa kabuhayun, labi run gid nga nakita ni Joko Jun ang kinaadman ka mga Pilipino sa bilog nga kalibutan sa patag ka musika, gani kang 2006 nag-umpisa magtukar sa radyo ang mga kanta kang mga bantog nga mga singers sa iban nga pungsod parehas kang Amerika, Canada, Australia kag iba pa – mga singers nga iba ang nasyonalidad pero ang linahe Pinoy. Kang tuig 2007, sangka pahina sa nasambit nga radyo ang liwan nabuksan. Nabatian ang mga Bisaya, Waray, Ilonggo kag Kapampangan nga mga ambahanun.

Kaangut kadya, tion run man nga madugang sa mga lenggwahe nga na-feature sa dyang radyo ang Kinaray-a. Gani, ginapaalinton sa tanan nga mga musikero kag manogkanta kang OKM nga welcome gid sa Joko Jun ang inyo mga kanta.
Madali lang ang magpadara kang inyo mga obra maestra. Magbisita lamang sa www.jokojun.com, mag-sign up para mangin miyembro, pagkabaton mo kang imo password, maglog-in  kag mag-agto sa “publish content” rugyan makita ninyo ang “audio” link nga magagiya kaninyo sa pag-upload kang inyong mga kanta. Pwede ipadara ang bisan ano nga klase kanta, bisan “raw demo” or “released.”

Amo run dya ang inyo tsansa nga makalinya sa mga sikat kag mga world-class nga Filipino singers sa bilog nga kalibutan. Sa kadya ang mga nagapanguna nga tagparamati kang dya nga online radio nagahalin sa Amerika, Japan, United Arab Emirates, Germany kag Canada. Gani, magdali, ipalapnag ang Kinaray-a, makigbahin sa mga hirikuton nga pangkalibutanun para makilala ang atun lenggwahe indi lamang sa atun pungsod kundi sa bilog nga kalibutan!

	1. 12-08-2008 15:20
	Bugal kang Kinaray-a Ang karantahun nga Kinaray-a dapat gid natun ipabugal tungod hay Original ang mga tinaga Tuno kag nagakasanto nga Musica. Kag original ang mga nagpasad okon nagkomposo sa kadya nga Karantahun. Nakabulong kang kahidlaw.    Manami pamati-an nakapadomdom. Nagapukaw kang naagyan kag kinaandan kang kauna nga mga pamatan-un kag nangin tularan sa mga urihing tubo.     Ti, Suportaran ta kag itib-ong ang tradisyon kag boroligan ta sa pag promotar ang atun Karantahun nga kinaugalingun. Registered Report

Consoling

Only registered users can write comments.
Please login or register.

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved