(Mga migo kag miga…. Kauna –sa kolehiyo- kang mejo nakabatyag ako kang ‘kasiuk’ sa akun nga tagipusuon, may ginpabasa kanakun akun ‘dormm8’, sangka barasahun sa ingles. Kang ako nagaduloy lang kang pira lang ka adlaw, dumduman ko lang to  isulat sa karay-a, mejo di ako eksperto kag akun akun lang ja ha… hehe, nami kag daw may kahulugan gid bay=)

Ang gugma … baw!

Sangka misteryo kun andut kita nagapalangga. Sangka misteryo kun paano ra nagatabo. Sangka misteryo ang anang pag-abot sa kabuhi ta. Misteryo pa gid kun andut ang iba nga gugma nagatubo kag nagalawid kag ang iba dasig lang nagadura.

Pwede mo gid dya palibugan kag pangitaan ka rason kag mga kabangdanan, pero wara gid ikaw ti maubra kundi dapat ikabuhi na lang ang amo dya nga eksperyensya. Pareho kang kabuhi ta nga di lang simple, ang gugma bukon gid ti simple. Di lang ra parte sa pagluyagay kag pagkapareho kang ugali kang darwa ka tawo. Sobra pa dyan kara. Kag pareho man kang kabuhi ta nga sangka espesyal gid nga regalo nga nagaumpisa kag nagatapos sa takna nga oras, amo man kara ang gugma. Dapat ta ra nga kabigon nga sangka makatilingahan nga regalo nga hindi gid mapamangkot anang mga pamaagi sa pag-abot sa kabuhi ta.

 Kis-a, bisan kisra lang sa kabuhi ta, magatuhaw kag magausbong dya nga regalo. Kun matabo dya gani, kupkupi kag iselebrar gid ang anang pinasahi nga kanami. Amo gid dya ang handum natun tanan. Sa kalabanan nga bes gaabot ang gugma nga dya sa kabuhi ta kag magtinir ti dali lang buhay kag maghalin man.

Kun dya gani gatabo, kapin pa sa mga pamatan-on, pirme gid nanda ginatirawan nga hawidan ang gugma, ginakumkum ka mayad, di gusto magbatun kang kamatuoran nga ang gugma sangka regalo nga libre lang nagaabot, kag libre man nagalumbos. Kun gaamat amat gani las-ay ang pagpalangga da, ukon ang pagpalangga kananda ginatinguwaan gid nga bawiun ang gugma nga nadura kaysa batunon nga ang gugma sangka nami nga regalo… pero mag abot ang oras nga dya madura dun, ang kabuhi magapadayun gid gihapon.

Ginapangitaan ka mga sabat ang duro nga mga pamangkot, nga sa tuod lang wara gid ti sabat. Gusto maman-an kun ano ang diperensya kananda kun andut wara dun sanda ginapalangga kang mga tawo nga palangga nanda or ginapangitaan gid ka paagi nga magbag-o ang pagpalangga nanda kay ginapanumdom nga kun may maglain lang bisan gamay nga bagay, mamulak liwan ang gugma. Ginabasol ang mga gakaratabo sa palibot kay gapati nga siguro kun magsaylo sanda sa iba kag marayu nga lugar kag mag-umpisa liwan…. matubo liwan ang pagpalangga da sa sara kag sara.

Ginatirawan gid tugruan kang eksplanasyon ang mga natabo. Pero sa tuod lang wara gid it eksplanasyon luwas sa gugma mismo kag kun hindi gid dya mabatun ang pagkamisteryo ka gugma nga dya… tanan gid malumos sa kasubo.

 Amo dya ang dapat maman-an kang tanan parte sa gugma, kag dapat gid batunon. Dapat kabigun ti may kalipay kag may kaalwan ang tanan nga ginadara kang gugma sa kabuhi mo.
Kun ikaw nagapalangga kang tawo nga di na ikaw palangga, di pagpabudlayi ang imu nga kaugalingon. Wara ti sala kanimu. Wara lang napili kang gugma mag-istar sa tagipusuon kang tawo nga gusto mo.

Kun ikaw ginapalangga kang sangka tawo nga wara mo ginapalangga, magpasalamat gid ikaw nga nag-abot kag nanuktok ang gugma sa gawang kang imung tagipusuon, pero…. ti may pag-ulikid kag kabuot, hindi pagbatuna ang sangka regalo nga hindi mo masarangan ibalik. Hindi gid manggamit kang tawo kun may oportunidad. Hindi gid magsakit kang baratyagon. Ang pagtratar mo sa gugma gapakita gid kun ano man pagtratar mo sa kaugalingon mo. Parepareho gid ang mga  tagipusuon ta nga  nagabatyag kang pareho nga kasakit kag kalipay bisan iba iba kita nga tawo.

 Kun nagapalangga ikaw kang sangka tawo, kag tana man nagapalangga kanimu tapos ang gugma magahalin, hindi gid pagtirawi piritun ibalik or magpangbasol. Sige lang, di run paghawidi. May rason gid riyan. Maman-an mo gid dya sa tsakto nga oras.

 Panumdumon gid nga bukon ikaw nagapili kang gugma. Ang gugma nagapili kanimu. Ang maubra mo lang gid ay batunon ang anang pagkamisteryo kun dya mag-abot sa kabuhi mo. Batyaga ang gaparanglapaw nga mga emosyon nga ginadara na sa kabuhi mo tapos ipabatyag dya sa iba. Ibalik dya sa tawo nga nagtugro kang tuod nga pagpalangga kanimu. Itugro dya sa mga tawo nga nagakinahanglan kang pagpalangga. Kag itugro dya sa kalibutan sa mga paagi nga imo naman-an.

Amo dya ang sala kang kalabanan nga nagapalangga. Sa kalawidun nga paghulat nanda ka gugma, ginakabig nanda dya nga sangka kinahanglanun. Ang panurukan nanda kang andang tagipusuon sangka kalong nga kahon nga gugma lang gid ang makabuta kag ginakabig nanda ang gugma nga sangka bagay nga magailig paagto kananda…. nga dapat dya mahalin ukon maumpisa kananda.

 Ang una nga pagbuskad kang gugma, gaparanglapaw gid pero kun maghuraw kag magramig dun gani dya, ginahimo dun dya nga sangka kinahanglanun. Ginauntatan dun ang pagtugro kang gugma, kundi ginapangita run ang gugma. Nalipatan gid ang sikreto kang gugma nga dya sangka regalo nga mapatubo lang gid kun dya ipabatyag kag itugro sa iba.

 Dapat madumdumduman ta gid pirme kag itanum sa aton mga tagipusuon… ang gugma may ana nga oras, may ana nga tyempo, kag may ana nga rason sa pag-abot kag paghalin. Di mo ra mautis o mapirit o mabais para lang magtinir. Dapat mo lang ra haksun kun mag-abot sa kabuhi mo kag ipabatyag sa iba samtang diyan ra kanimu. Pero kun dya dun manughalin sa tagipusuon mo ukon di gani sa tagipusuon kang tawo nga palangga mo…. wara gid ikaw ti maubra kag wara gid ikaw ti dapat ubrahun. Ang gugma sangka misteryo gid halin kauna kag asta san-o. Dapat kaw gid magmalipayun nga nakaagi dya abot sa kabuhi mo kag nakaestar man sa tagipusuon mo.

 Kun pabilin mo lang nga bukas ang tagipusuon mo…. Maabot gid riya liwan.

;-)

GODBLESS!

(palangga ka TUOD kag TODO Antiqueno!)

Kag sa tuod lang, pinakaNAMI gid kun ang atun pagPALANGGA ipangamuyuan ta gid sa TATAY natun sa langit kay TANA gid nagaplangga kanatun. ;-)

	1. 09-06-2008 17:15
	Abaw nga gugma! Abaw nga gugma, budlay guid intsendihun, mayad lang hay buta ka kasanag ang gugma nga gin hutik ni Ai rudya, kundi na-intendihan ko man kun andot ako naga hibi run sa kaga-ihun.... daw patas bala sa akun nga binalaybay nga diya, pag nadumduman ko ang gugma:    Nagbasa lang Ka Sangka Binalaybay    Nagbasa Lang   ka sanka  Binalaybay  Kag dayun   Nag hibi.  Daw sa subra  Pa ikaw sa sangka   Agi.    Wanhaw,   Dalum  Guid ang pilas  Kang imo baratyagun,  Nga hasta kadya  Indi guid sarang  bul-ngon,  ang mga nagmarara  nga marka nga  napag-it  Sa imo dughan  Kag paminsaron? Registered Report

artebadong

	2. 27-08-2008 06:56
	Abaw nga gugma! Salamat sa imung sugidanon,  Nagdugang run man ja sa akun kaaram.  Nagtugro gid ja kang kasanag,  Sa baratyagun nga buhay run gahulat.. Registered Report

timvillar

Only registered users can write comments.
Please login or register.

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved