Padayon na nga ginahusay ka ana mga tudlo ang malabug ko nga buhok…

“Kon kis-a ang kabuhi gid man, daw kabudlay gid tukladun…Man-an ko kon ano ang ginaagyan mo kadya, pero abi mo, malampuwasan mo ra ang tanan kag magkuon ikaw sa imo kaugalingun: ‘daw hangin lang dya nga nagadapya’…”

Ginsambit na dyang matam-is nga mga tinaga samtang ang akun luha wara’t pahuway nga gailig nga daw pareho kang tig-ururan kon Hunyo.

Una ko to nga naagyan ang kasakit nga dara kang gugma. Raku man ang akun namigo, pero mahambal ko, nga ikasara pa lang ako nagpalangga ka todo.

Simple lang tana nga tawo, mabuut kag mapinalanggaun. Gintalikdan ko ang iba nga mga handum ko sa kabuhi para lang maparapit ako kana.

Manabaw lang sa umpisa ang amun relasyon, daw sipal-sipal lang. Pero sa pagligad ka mga inadlaw, nangin madalum ang amun pagtamud sa sara kag sara hasta nga amun ginplanuhan ang amun bwasdamlag. Ugaring, ang kapalaran wara gid nagtugot. Ang amun mga plano, daw baras nga kastilyo nga ginkagod ka balud paagto sa lawud. Ginhimo namun ang tanan para masalbar ang amun nagapungha nga relasyon, pero maimut gid ang kapalaran, wara na gid gintugutan.

Masakit! Mapait! Ang una ko ginhimo, nanago sa tanan. Wara ako ti gusto makita, kag indi ko man gusto nga ako makita. Daw pareho ka ba-o napahamtang ako kang kalinung kag kainit nga ginatugro kang alukaba.

Alas dos run sa kasanagun. Nagsulud ako sa akun kwarto, hungud nga wara ginsindihan ang kingki kag ang kasanag lamang kang ugsad nga nagasulud sa bukas ko nga bintana ang nagatugro iwag sa akun aragyan paagto sa akun baratangan. Ang kurtsyon kang akun katri, nga pirme natugro kang kasulhayan, daw wara gid ti mabulig sa akun ginabatyag. Pati ang ramig nga huyup kang hangin nga amihan wara ti alibyo nga natugro sa akun lawas samtang wara’t pahuway nga nagatarabiris ang akun balhas. Gintinguhaan ko nga ipirung ang akun mga mata, pero ang akun paminsarun bugtaw kag indi gid madapuan kang katuyu. Nagalinagumba ang akun corazon kag daw malupok…nagabaha ang mga laragway kang mga nagligad sa akun panghuna-huna….aaaahhhh!!!!

Nagbungkaras ako, dayon gwa sa akun payag kag gindalagan ko ang inas paagto sa pihak nga banglid…

Ang ugsadan, pareho man gihapon ang itsura kang gamay pa ako kag nagasipal kami kang amun ayam nga si Babu…may tatlo ka pares ka simagul sa wala kang amun doormat nga may pud-is nga nakasulat nga “Welcome”…Ay, “welcome”…sa amo pa lang nga ti-on ko nabatayagan ang matuod-tuod nga kahulugan kang amo nga tinaga. Nanuktok ako sa pwertahan, kisra, karwa…daw wara gid ti nagatimuk-timuk sa sulud. Alas 3:30 run gali sa kasanagun. Ginsige ko ang pagpanuktok hasta nga ginbuksan na ang gawang. May pagkahangyus ang ana itsura samtang nagaturuk kanakun, dayon na tugro kang pinakamahugut na nga hakus nga wara ko matirawan sa bilog ko nga kinabuhi.

Ang mga luha padayon sa pag-ilig samtang nagapaagto kami sa ana kwarto. Gintugruan na ako ka darwa ka mga paborito ko nga ulunan, kag ginkuhap ang akun likod. Ang ana mga kuhap, daw sa nagtulod ka nagabalabag nga luha sa akun tutunlan, kag nagwa ang una ko nga pisngu…pisngu nga nangin hibi hasta nga nag abot sa paggaraabun. May pagkabalaka pero makalma…dayon na pungko sa katri, hinay-hinay nga ginsabak ang akun ulo kag husayun ka ana mga tudlo ang akun malabug nga buhok…

Pira run ka ugsad ang nagligad kang natabo to, pero ang ana mga tinaga padayon nga nagasarasalida sa akun panghunahuna: ‘daw hangin lang dya nga nagadapya.’

Tuod gid man gali. Daw hangin lang gid man nga nagdapya. Kadya, nabatyagan ko nga mas madinarag-un ako, mas masadya kag mas ginbugayan samtang nagaklaro, nagasanag kag naganami ang akun bwasdamlag. Kadya, handa ruman ako maghigugma. Paagi sa kusug kag kapagrus kang ana pagpalangga, wara run ako nahadluk nga padayon kag padayon nga maghigugma.

Salamat gid Nay, sa imo wara’t kapin kag kulang nga pagpalangga. Malipayun nga pagsaulog kang Adlaw kang mga Nanay!

	1. 14-05-2008 22:26
	wow! bravo! emms! bravo! thumbs up! bilib ko ah. kun manami kaw magsulat sa english, mas manami pa gid sa kinaray-a. maragumu kag marimis,hehe. daw manok nga bisaya! hahaha!     more!emms more! daw mapierde si itok kaja haw,hehe. Registered Report

zeanra7

	2. 15-05-2008 18:58
	wow! ay! bonggaitan. sagad sagad gid timo, megs. Registered Report

zlimeee

	3. 23-05-2008 14:18
	sister! kita mo gid no facial expresion ko ka pagbasa ko kaja...best in emoticon man ako ba.. Registered Report

lanz

	4. 31-05-2008 12:29
	sister! chika gd timo day! si mary nga miga ko nagturo gd ana luha daw soap opera kuno!!! Registered Report

akik

	5. 14-08-2008 07:24
	sister! day hibi man ko ka sulat mo ba!!!!kmusta kna?yuhum yuhum man ako grabe....tapos ko basa!he he he. Registered Report

lizworld

Only registered users can write comments.
Please login or register.

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved