|
Balita wara didya, wara didto. Ginatinguhaan kang tagsulat nga maghatud kalipay kag kalingawan ka ninyo. ang tanan ang inyo mabasa puro ginhimu kag wara ti may ginatumud bisan sin-o. Ang dya nga programa ginadul-ong kang pamilya Ong..Ung..Ungoy, C-rez Liner, Talisay Funeral Homes, An J-an G, Pouchweiko, Susuki Stars, U Lar Tey kag Shell…Shell sa Bantayan, Shell sa Hamtic kag Shell sa Pispand. Mayad pa ang kwarta may tawo, pero ang tawo wara ti kwarta. Ako si Anton Anthony Antonio….Ang naga……RAAAAATSADA!!!… Mayad nga adlaw kag mahamungayaun nga pagkadlaw. Antes ang iban… Una kita sa mga balita local… Sara ka umang ang ginbungguan kang haras-haras nga piang, samtang nagapanaw sa dalan, pagtupa sa lupa nagrapta ang bilog nga kalawasan…kang piang indi ang umang. Ang umang sa gilayon gindakop kang mga kapulisan, para gamiton sa pagdakop kang mga kreminal kag takawan. Ang umang karon gaumpisa lagaw, para magdakop kang mga kreminal nga lamok kag langaw, kag pati man sa pagdakop kang takawan nga balabaw. Sara ka pisu ang nadakpan nga nagapangadi, gilayon ginparapitan kag ginpamangkot kang tigasaw nga agi. Ginpamangkot kang tigasaw kon andut nagaluhod-luhod kag nagapirung-pirung gid dara tangra sa ibabaw. Ang pisu nagsabat nga tana nagapangayo sabat, kon andut may itlog ang ana nanay, kag indi ang ana tatay. Sa iban pa nga balita local… Sari-sari nga hayop ang ginasagod ni Saul T. Roh, may manok, karbaw, ayam kag kabayo, pati ang mga baboy, pato kag baka, ginaparako man. Indi para ibaligya, kundi parautwasan kon magkatol ang ana atubangan, mayad ra kaysa sa daraga kag bata. Makwartahan mo pa.
Sa pihak nga bahin… Ang mangunguma nga indi makabati, ang nagapasingit kag nagapamisti, kag kon kis-a pa gani, gapanakit kang mga inosenti. Anda ginpalantaw sa anga nga doctor, patay nga balsamador kag sa langa-langa nga kondoktor. Pero sara lang ang anda nakita , sa sulod kang ana talinga, amo ang tutuli nga daw bola kang basketbol. Ang operasyon saksespol, kag ang daw basketbol anda nabuol, karon ang bola…ginadribol. Antes ang iban nga mga balita, dya anay ang mga importante kag mapuslanun nga pahanumdom… Kon nagaupak-upak ang inyo mga pungyahun, banyosi kang ginamos nga nasulod sa dahon, bantayi lang sa pira ka semana. Pero kun nagaupak-upak gihapon, patimaan lang ra nga ang inyo panahon irisipon. Hay basi ikaw ginsumpa, ginpahiwitan ukon epekto lang kang ginamos ang tanan. Kaw bala magbutang ginamossa pira ka semana, lantawun ta kon indi mag-agnas ang imu itsura. Nagabanog bala ang inyo bibig kag baba, sa sobra ka init kang panahon? Inyo lang agwantaha kaysa sa wara kamu ni bibig kag baba. Pero kun indi gid kamu kontento, kihapa kag lakot sa tinola. Inyo gid mapuslan, ilabi run gid hay tama gid ka pigado kang aton sitwasyon kadya. Balik kita sa mga balita, balita sa iban nga pungsod… Didto sa Kuwait, may pinoy nga nagapamung-it. Ana ginpisil-pisil, gin-unyat-unyat kag ginbilog-bilog hasta nga naghimo bola, gilayon gintablog na sa karsada, wara kamaan nga sa unahan kang anda balay, may trak nga nagalabay, ang trak natumba kag ang mga pasahero nagkaramatay. Antes kita maagto sa entertainment news, dya anay ang pangabay… Kon namahalan kamu sa pagpamanikyur kag sa pagpapedikyur, simpli lang mga abyan, indi run kinahanglan nga maggastos kamo, magbuol kang martilyo kag pulpuga ang inyo mga kuko. Instant multi-kolor ang Q-tex ang maagom niyo, hay nabaog ang inyo mga kuko. Balik kita sa balita, balita sa Artista… Sara ka artista ang nadakpan nga nagauba, nagalagaw para ilibud ang ginabusong na, pero imbes nga tiripunan kang mga tawo, tanan nagsururuka kag nagparalagyo, hay ang amo nga artista, tuman pa karaw-ay kay Zoraida.
Samtang… Sara ka bata nga naghalin sa probinsya, ang gusto magpasimpalad sa Manila para mag-artista, pero sa pag-abot didto hindi siya ang bida, ukon kontrabida sa pelikula, kundi sara tana ka salbabida. Sports News pagkatapus kang pila ka mga importante nga pahanumdum… Good news para sa mga problemado, may kontest nga nagahulat sa inyo, simpli lang ang pagahimuon niyo, mag-agto lang sa Iloilo, hay sigurado mabuol ninyo ang premyo, pero antes ka ra…magpabunggo anay kamo sa C-rez, siguraduhon lang patay run kamo, kag ang inyo kalawasan indi run mapuslan, hay ang pers prays mangin inyo. Nagakanang-kanang kag nagabadlak nga lungon, ang inyo maagom. Para sa aton balita sa patag kang isports… Ang Sumo Wrestler nga taga-Japan, ginhangkat ka pinoy nga niwang kag piang. Ang sipal nag-umpisa, pero ang mga nagalantaw indi mapuslan ang itsura, tungod naluoy sa nagasipal nga kasimanwa. Ang mga pamuluyo gin-atake nerbyos kag hart atak, basi ang lawas kang pinoy mapihak. Pero sa hinali, ang tonto nga hapon nagparamuti, ang Sumo Wrestler natingala, indi gali wrestling kundi tintin baka. Gani… Kon nagamasakit ang inyo kabataan, indi run magpalibog kang inyo garastuhan, darha lang sa Talisay Funeral Homes, hay ang inyo kabataan anda atipanon, ang kama mahumok nga lungon kag ang kwarto brand new nga pantyon. Ang balitang espesyal pagkatapus kang dya nga mapuslanon nga mga pangabay… Nagatingkarag bala ang inyo buhok? Ang rason kon andut ang mga lalaki sa inyo wara pagturok? Simple lang…ang gas ang inyo i-shampo, gilayon buol kamu kang posporo kag sinduti ang inyo ulo. Ayos!kalbo run kamu…dara buhok pati kuto. Indi bala kamo makakita, bangud sa mga timus-timus nga nagakapol sa inyo mga mata?amo ri-a ang resulta, kang sobra ninyo nga kabastusan, pero indi kamo magastuhan. Magbakal lang kang rugby kag ipalhit sa inyo kalimutaw, hay permanenti nga indi ikaw makapanglingling kag makapanglantaw.
Kag karon sa sa aton balitang espesyal… Didto sa Taiwan, may sara ka kaharian nga ginapamunuan, kang mabuot, malioayun kag maalwan, nga si Haring Rae Nhan. Sa ika-50 nga kaadlawan, nagpakontest para sa kalipayan sang tanan. Gintipon ang mga kalalakihan, para ita-o ang instraksyon kag ang tanan nga kinahanglan. Ang tanan redi, kag nagapamati sa hambal kang hari. “Kon sin-o ang makapadara kang espisyal nga bunga didya sa tunga kag…” ang hambal kang hari wara pa natapus pero ang tanan, dayon nagdaralagan para itao ang kinahanglan ni Haring Rae Nhan. Sara ka oras ang nagligad, ang mga kalalakihan sa hari nagtampad. Dara ang mga bunga, nga kis-a lang makita. Ang sara ka soltero may kurbasa, nga ang kabahulun daw kawa.. sangka balo ang may dara nga daw makan nga tarong, ang sara pa gid may langka nga daw tamburong, kag ang sangka dupa nga mani dara kang nano nga agi. Naghambal ang hari, “Ang inyo gindara nga mga bunga, espisyal gid ka tama, pero ang urihi ko nga hambal wara ninyo mabatian, kinahanglan ang mga bunga inyo masarangan, nga idasok sa inyo mga uli pero siguraduhun nyo lang nga indi kamo maghiribi. Samtang ang balita sa panahon… Kadya mayad ang panahon, luwas lang gid kon may gal-om, kag may bagyo nga maagom. Kon nag-uran, ang lupa basa. Kon wara, syempre mara ang lupa. Ramig kon naba ang temperature, init kontaas ang temperature. Masanag kon adlwaon kag kon gab-I madulom. Antes kita magtakop, dya anay pila ka mga panawagan. Kon sin-o man ang nakakita kang akon kwata, palihog indi pagbatuna, hay ri-a tinakaw kang manugnakaw. Simple lang makakila akon isahanon ngaa kwarta; may Rizal nga nagakadlaw, kag sa likod may nagabudlak nga adlaw. Ang nagapanawagan ang tawo nga permi lang nagakadlaw kag naga-uli sa mental hospital Ginapanawagan kon sin-o ang nakakita, kang lima ka tuig nga bata. Ang bata kon kis-a lalaki kag kon kis-a babayi,nagasuksok sya bayo, may walo ka tudlo, sa kahig kag sa alima, sara gid ang ana mata, darwa lang ang irong kag ang buhok kurong. Ang nagapanawagan amo ang ginapanawagan. Dyan sa USA, Antique, ginapanawagan si Rit C. Movy, nga palihog buol kang imo panty, hay imo nalipatan, kang akon ikaw ginhimuslan. Ang mabuot nga rapist ang nagapanawagn.
Kag ang News Analysis nga ginpadara ni Vhari C. Koh… Kadya nga year 2008, duro run ang nagbag-o sa aton kalibutan. Dungan sa pagbag-o ang aton teknolohiya nagamoderno kag nag-ilis man ang ugali kag batasan kang tawo. Duro nga mga robot ang naimbento, may dyan nga daw pareho gid ka tawo. Ang dya nga mga robot, duro gid ang mabulis sa palibot, nagapamag-an kag nagapadali kang obra, pero nagarangga man kon sobra. Ang robot indi makalabaw sa kaaramon kang tawo, bangud ginhimo lang tnana kang ginhimo man kang Ginoo. Kato wara gid ti bisyo ang tawo, bisan pagpanigarilyo, karon may marijuana kag shabu, kag may bag-o, ang ecstacy , nga ang epekto pwerti. Ang mga kustumbre kag tradisyon, sa diin run? Ang nobyo sang una, nagaagto sa balay kang nobya, pero kadya tana….asal…antes ang kasal… Kag amu dya ang balita wara didya, wara didto… Salamat sa mga nagabasa, kas sa mga nabasa (kang laway) hindi lang magkabalaka, biskan gamay, akon kamo ginpakadlaw (wara pa?), ang akon lang mahambal, kon kamo nagapangasubo…kadlaw bisan wara ti unto sa ibabaw… Tubtob sa liwat, duro gid nga salamat!! Anton Anthony Antonio…Signing off!!! Inspired by Langas-langas
 Add as favourites (7) |  Quote this article on your site | Views: 419
Only registered users can write comments.
Please login or register. Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved |
