Ang probinsya kang Antique kag ayhan ang Republika kang Pilipinas nawad-an kang sangka labing mapuslanon kag dunganun nga alagad.  Dya napamatud-an kang mapatay si Justice Calixto O. Zaldivar katong bulan kang Oktobre 1979. 

 Si Justice Zaldivar isa ka pinasahi nga tawo nga gintuga kang Diyos sa Antique agud nga ang Antique may ana nga sarang ipabugal sa pungsod ukon sa guwa man kang Pilipinas, hay dya nga tawo isara kang mga lunsay matarung, masarigan, mabinuligun, kag dungganun sa tanan nga bahin kang anang kabuhi. 

 Ginbata si Calixto O. Zaldivar sa Pandan, Antique kang Setyiembre 13, 1904.  kang matapos na ang anang elementarya sa Pandan nagpadayon tana kang anang pagtuon sa high school kag rogto na gintapos sa Manila South High School.  Ang anang pagkaabogado gintapos na sa Unibersidad kang Pilipinas kang 1928, nga sa amo man nga tuig tana nakapasar sa Bar, sa diin nakabuol tana kang ikatlo nga lugar sa mga nakapasar sa amo nga eksamin.  Lamang nga makatapos tana sa anang pagbutho, naging konsehal tana sa munisipyo kang Pandan sa tuig 1928-1931.

 Sa anang nagkasari-sari nga puwesto sa gobyierno amo ang masunod: nangin representante tana kang Antique sa 10th Lehislatura kang Pilipinas tuig 1935 tubtub sa 1938; kang gin baylo ang kamara de legislatura sa Asemblea Nasyonal, tana man angod ang napilian nga Assemblyman kang Antique sa tuig 1938 tubtub sa nag-abot ang ikarwa nga away (WWII) kag ginhimo tana nga Deputy Chairman kang Civilian Emergency Administration, dayon sa pagka Judge Advocate Service kang ikaanum nga military district sa diin tana gin taw-an kang ranggo sa pagka tenyente koronel.

 Pagkatapos kang inaway nagmatuod ang atun anay nga koronel, nga mananabang sa bilog nga puod kang Panay kag Negros.  Naging propesor man tana sa Central Philippine College (nga sa karon CPU) sa Iloilo, sa diin ginhimo tana nga dekano sa College of Law. 

 Kang 1951 napilian si Zaldivar nga gobernador kang Antique.  Apat lamang ka tuig ang anang pagkagobernador tungod nga kang 1954 wara run tana magpapili liwan.  Nag maukod tana kang pito ka tuig sa pagkamananabang lamang kag pagkapanudlo sa Central Philippine University.  Ugraing hay tungod dya nga tawo may kinaadman, kag bangod nga ginakilala kag ginatahud tana, ginpangita kag ginpangayo kang labing mataaas nga puno-an kang pungsod kato nga si Diosdado Macapagal, kag si Tio Itin Zaldivar ginpili nga sakup kang Reparations Commission kang 1962-64. 

 Samtang nga tana nagtrabaho sa Reparations Commission, gin himo tana ruman ni Presidente Macapagal nga anang executive secretary, nga dya nga parangaku-an ginatawag nga “Little President” bangud hay ang kalabanan nga pagbuut sa pamanwa ginbutang sa anang pagdumara kag kon maguwa ang presidente sa Pilipinas ang Executive Secretary amo ang harus naga pagkapresidente.  Wara pa gid maayawi si Presidente Macapgal sa amo nga puwesto nga ana gintugro kay Zaldivar; ana tana nga gin-nombrar nga Chairman kang Reparations Commission, Director kang Bureau Forestry, kag gobernador kang Development Bank of the Philippines.  Kang 1964 ginnombrar tana nga Associate Justice kang Korte Suprema, ang pinakamataas nga Hukuman kang Pilipinas. 

 Kang rugto run si Congressman anay Zaldivar sa Korte Suprema, ginpadara tana ni Chief Justice Roberto Concepcion paagto sa Geneva, Switzerland, sa pagtambong kang Executive Council kang World Association of Judges. 

	1. 23-04-2008 18:34
	Good work, Mr. Paala.    Kabay nga duro pa ang magasulat rugya sa Kinaray-a.com parte sa mga dungganun nga mga Antikenyo pareho kay Justice Zaldivar...para makabukas man ka paminsarun ka mga urihing tubo nga nagakahuya kang anda pagka-Antikenyo. Registered Report

Inday Emmy

Only registered users can write comments.
Please login or register.

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved