Tagsaysay:   

        Sa yadtong panahon kang nagligad
        Kang Empiryong Sri-Vijaya narumpag
        Pangabuhi nangin magamo, kagarot naglapnag
        Nanakup Majapahit dara ang kapintas

        Sa mga ginpigus may nagbarato
        Nangin kabaylo pagdanak kang dugo
        May guban kang napulo ka datu
        Ginpangita kahilwayan sa pagparayu
         
Tuyo, lapyo kag kapoy sa baraghal nga pagpanakayun halin sa Bornay, nadab-ot kang mga Malay ang puro kang Aninipay. 

        (Kataposan nga Panakayun)

        (Kanta kang Pagdungka)

Hangaway:    Datu Sumakwel, ang puro kang Aninipay!

Sumakwel:    Bugtaw kamo, lantawa lupa kang kahilwayan!  Ang lupang Aninipay, ang lupa kang kahilwayan!

    (budyong)

Bangut banwa:    Salamat O Bathala, Bathalang Burulakaw!

Mga sinakpan:    Salamat! Salamat! Salamat!

Paiburong:     Lantawa ang kagayon kang pood wara’t angay
                    Higante nga dahon ang laragway kang kabukidan.

Kapinangan:  Lantawa ang kapispisan gasipal sa daray-ahan
                    Kasapatan galagsay sa bugana nga kakahuyan

Sinakpan:      Kakurunyag lagawan ang mga katalunan
                    Kun diin gakitaay ang bukid kag baybay

Tanan:          Ang imong mga suba kag bukid
                    Nga nagtugro kabuhi kanamun
                    Ang mga sapat sa patag naga hinugyaw
                    Sa kalipay nga dayon
                    Aninipay puluy-an namun nga raku it
                    Dungug sa mga katawhan
                    Amun gugma kag kabubut-un
                    Aninipay sa imo lang gid ihalad
                    Salamat... Salamat... Salamat!

         Gulpi lang magkudug si Padi nga daw sa ginsudlan kang ispiritu.

Padi:        Ahhhhh…
       
Sumakwel:    Ano to, Padi Bangutbanwa?

Padi:        Sa likod kang lasang may kasanag
               Pood nga ginapuy-an kang hilway nga mga kalag
               Mga tumanduk makita sa paino-ino
               Mayad nga panimuut kanatun paagto.

               Bugana nga lupa sa indi marayu
               Mayad nga paraaboton ana matugro
               Sa binhi kang mayad nga pagpamuno
               Kauswagan sa pood atun matugro
       
        (Ritwal kang Panabi)

        Orendiiiii…!  Orendiiiii…!
                Sa tanan nga mga palhi nga nagauli kag nagakabuhi
                Tuguti ang jang linahi nga magauli kag magabatiti
                Sa jang kalupaan nga putli….

Datu Puti:    Lupa nga kay Burulakaw ginpili
                  Katarungan para sa nagapasulabi
                  Kang kalinung kag kauswagan
                  Nga sa lupang tinubuan gindalukan.   

(Kanta kang Ritwal kang pagbiya sa ginhalinan)

Kadatuan:      Ang imong baras palidun kang amihan sa kahawaan
                    Kag lumsun sa madalum mo nga kadagatan
                    Kaimaw kang amun mapait nga inagihan
                    Mapanas sa panumduman, maanod sa amun dughan.
   
Tanan:          Salamat Burulakaw, sa lupa nga wara't kahikaw
                    Ikaw ang amun panghayhay sa pagpanakayun nga wara’t pahuway.
       
        Krrruhayy! Krrruhayy! Krrruhayy!

Paiborong:    Mangaman kita may nagapaabot!

Sumakwel:    Ang mga Ati nga tumanduk kang jang pood.

Bilang tanda kang pagtaha, ginkub-an ni Sumakwel ang nag-abot nga mga Ati.  May pagkatingala kag pagduwa-duwa nga nagsunod ang iba nga Malay sa pagkuub.

Dayon parapit kang taglubad kay Marikudo kag mag-istorya.

Marikudo:     Si Sumakwel? Ang bantog nga manugpanakayun?
                    Ha-ha-ha-ha!

                    Si Sumakwel?  Ang bantog nga mangangayam?
                    Ang isganan nga punong hangaway.  Ang mainaramun!  Ha-ha-ha!

                    Dali lang.  Maiwan kamo rugya? 
                    Ngaa daw sa binagyohan ang inyong mga itsura?

Sumakwel:    Gindara kami kang unos kag panganod sa inyong pood
                    agud magpasirong kag magpahuway
                    halin sa magarot kag mapintas
                    nga pagpangabuhi nga tuman kabudlay.

Paiborong:    Amun ginpalagyohan ang puno nga kurakot
                    Sa manggad kag gahum ginkaun kang kadalok
                    Si Makatunaw! Nga wara’t panimuut
                    Sinakpan nagpangabuhi sa kahadluk kag kaugut.
   
Sumakwel:    Rugya kami agud pagdanak kang dugo malikawan
                    Kag mga kamatayun nga wara’t kapuslanan
                    Agud bag-ong pangabuhi maumpisahan
                   Sa ngaran kang katarungan kag kahilwayan kang tanan.

Datu Puti:     Nagadangup kami nga inyo pasugtan
                   Makapangabuhi nga parehas kaninyo man.
                   Hilway kag wara’t ginahadlukan
                   May pagtururupung sa mga katawhan

Marikudo:    Daw sa indi mapatihan!  Ang mga manggaranun
                  Ang mga dungganun mabiya kang andang pagkabutang
                  Pati ang gahum anda talikdan.
                  Ano ja yamuhat nga bukut karadlawan?
   
                  Ukon sangra pagpatalang
                  Luyag nyo lang kami pigusun
                  Kag ang pood kanamun agawun
                  Kag ang pood kanamun agawun.


Datu Puti:      Ang pagpamigus kag pagkamaakug
                    lubos namun nga ginasikway bangud
                    sa andang kalain nga amo ang kabangdanan
                    kang amun pasimpalad nga panakayun. 
                    Indi ja namun gusto maagihan
                    ni sin-o man sa jang kalupaan. 

(Maturukay ang mga ati, maghinun-anun kag mag-atubang liwan sa mga Malay)

Marikudo:      Wara it makisin-o luyag mangin sayup kag magsaway
                    Ukon magpugung sa handum ninyo nga makapahuway
                    Ugaring ang jang puro subun  mangin magamay
                    Kon malipatan ang atun pag-intindihanay

(Maistoryahanay ang sangka ati kag sangka taga-bornay)

Sinakpan:     Malapad ang jang puro
                   Mataas ang mga kabukidan

Maniwantiwan:Bugana ang mga sapat
                    Kag isda sa kasubaan.
                    Gani ang jang lupa
                    Hilway namun nga ginalagawan.
                    Ugaring sa inyong pag-abot
                    Ang jang kahilwayan nali mabuhinan.

Marikudo:      Ang jang kalupaan para sa tanan
                    nga nagahandum kang kalinungan
                    Putli ayhan ang inyong tinutuyo
                    kag para sa kaaraydan kang karakuan?

Sumakwel:    Wara kami it ibang tuyo kundi
                    ang bag-o kag malinung nga pagpangabuhi
                    Ang tinaga nga amun ginabuy-an indi mabari


Mamaramangkot si Marikudo sa mga kaimaw samtang padayon sa pagpaathag si Sumakwel.

                    Sa jang lupa handum namun pagapasadun
                    Kahilwayan, katarungan, pagtururupung
                    Nga sa amun ginhalinan wara namun maangkun
                    Ang amun pagpasimpalad rugya namun padayonon.

(Sige and hinun-anunkang mga Ati)

Marikudo:    Ang bahin nga patag kaninyo pagatugyan
                  Para sa pagpangabuhi nga kaninyo angayan

Sumakwel:    Sa diin tinyo maagto? 
                    Wara kami it handum nga magatabog kaninyo
                    agud amun maangkun ang amun tinutuyo

Mga Ati:        Ang kabukidan nagahulat kanamun.
                    Rugto ang mga halo, usa, baboy talonon
                    Kag duna nga pagkaun sa mga pananum.

Sumakwel:    Kon amo batuna ang jang pinakaali namun nga pagkabutang
                   Ang patimaan kang amun dungganun nga linayi.
                   Tanda kang amun pagpasalamat kag pagpabugal kaninyo.

(Magatugro kang sadok nga bulawan)

Pagkatapos daho, dayon saut si Marikudo tanda kang pagbaton.

Maagto si Maniwan-tiwan kay Marikudo kag magtudo sa kulintas ni Kapinangan.

Kapinangan:  Huud, batona ang jang kulintas bilang tanda kang atun mayad nga pagtamdanay                         kag pag-iririmaw sa sangka puro.  Ang himpit mo nga pagbaton kaja amun                                 pagadumdumun bilang pagbaton ninyo kanamun bilang kabugtoan sa dyang kalupaan.

Dayon saut man si Maniwantiwan kag ang iba nga mga ati. 

Paiborong:    Krrruuuhhhaaayyy sa atun mga kabugtoan nga mga Ati!

Tanan:        KKKRRRUUUUHHHAAAYYY!!!

Marikudo:    Salamat! Indi kami magbuhay. 
                  Bugayan kamo kang mga palhi kang katalonan kag kadagatan!

(Kag nagpamilin-bilin ang mga ati kag ang mga taga-bornay sa isara kag isara.)

Datu Bangkaya (kay Datu Sumakwel):

                Mahimo kita makapangabuhi kaimaw kananda
                Andut kinahanglan pa nanda magparayu?
                Mariit ang kabukidan.

Sumakwel: Mga abyan, andut indi run lang natun pagairimawan
                ang pagpangabuhi sa jang lupang inyong ginbahulan?

Marikudo:  Maski rugto kami sa kabukidan
                Ang lupa nga atun ginalapakan isara lang
                Ang amun pagparayu, bukut pagpalagyo
                Bukut pagbiya nga ginapinsar ninyo

Ati 1:        Kabukidan ang amun pangabuhian
                Ang patag kaninyo ginatugyan

                Ugaring maabot lang ang tinion
                Nga kita tanan magadararapun
                Bangud hakus kita kang nanay nga baybayun.

Maniwantiwan:    Handum lang namun
                        Nga sa pag-abot kang tong tion
                        ng inyong mga inanak
                        Handa kanamun magbaton.


Marikudo (maagto kag makig-alima kay Sumakwel):

Indi kami magbuhay tatapa ninyo kang husto
Ang jang lupang lubos nga nangin marahalun
Bangud sa inyong pagtanum
kang binhi kang buhi nga paglaum.

Halongi ang mga kakahuyan
Kananda naangut ang atun kabuhi
Pagpalangga sa palipot sa kabataan ipanggas
Agud magbunga kang mayad nga pagginawi.

Halongi ninyo ang jang lupa kag indi paglipati
Ang jang adlaw kang inyong pagdungka
Agud nga ang dinalan nga nag-angut kanatun
Padayon nga igasugid paglipas kang panahon.

Mapanaw kami!

        (Kanta kang Pagbiya)

Kapinangan:       Ay ay ay ay diin kamo maagto?
                        Ay ay ay ay ang bugay kabay kaninyo.

Maniwan-tiwan:    Rugto sa bukid magpanghayhay
                         Rugto sa bukid mangrantso anay
Marikudo:           Sa hakus kang ambon pood nga bugana
                         Sa laylay kang hangin bwasdamlag makita

Mga Ati:            Kon ang inyong pagbiya wara nangin mahulas
                        Ang amun pamaalam pagpasimpalad
                        Nga kon kaninyo nangin kakurugmat
                        Sa ja nga pagpangabuhi kami naanad.

Kag nagpanaw ang mga Ati.

(Panakayun sa Paraaboton)

I.
Ang panahon nagapanaw kag nagabaylo
Nagatuman ang handum halin sa damgo
Ang taob nagataas, nagalapad ang hunas
Nagaruphag ang bukid maski ano kataas.

II.
Mayad nga panimuut pasulabihun
Agud kaaraydan atun maagum
Malain nga buhat wara nagabuhay
Ugaring daw bagyo mangrangga anay

Chorus:

Padayon kita sa pagpanakayun
Panakayun sa bag-ong panahon
Sa lawud may unos kag mga pagtiraw
Sa pag-iririmaw kita mangibabaw

III.
Ang mga kurakot ihulog sa dagat
Agud mauntat kaharalit nga buhat
Agud panakayun sa kauswagan mangin tayoyun
Kag makadungka sa daray-ahan kang handum.

Repeat Chorus

Tagsayay:      Wara natapos ang pagpanakayun
                    Sa pagpalagyo sa kapintas, diin ang kahilwayan nga naagum?
                    Bangud nangin uripun kang kaimolon, kurapsyon
                    Duro nga mga pagparayu ang nasaksihan natun

                    Ayhan kadarag-an wara nangin mahagup
                    Nagpadayon ang biray sa bag-ong dinag-on
                    Bag-o nga mga lider ang nagkaput kang timon
                    Paamulya sa puro kang katumanan kang mga handum.       

                                            -tapos-

	1. 17-04-2008 03:44
	dinag-o kang pagpanakayon Randy m. tacgdoy;    Duro gid nga salamat kang reenactment script kang binira-yan.Te nakama-an man ako kang estorya kang aton   probinsiya.nanami-an gid ako kang mga ninyo mga inubrahan.  bugal diya sang aton probinsiya para mapromosiyunar kag   mapapromote naton umpisa sa pag pakilala kang aton estoriya,  kag ang aton kultura para sa para sa promssiyon kang turismo.  CONGRALUTACION. Registered Report

nenengfe

Only registered users can write comments.
Please login or register.

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved