|
Posted by Ai Pelingon Tarroja
|
Kis-a ang pag ulong ulong hindi malikawan
Kun ang mga gakaratabo maobserbahan
Kun sa mga libog lang, ay, hindi gid mawad-an
Kapurautan di madura sa kalibutan.
Gaabot mga bes nga kita ginaluyahan
Sa duro nga pagtiraw nga aton ginaagyan
“Andut abi may kasubo?” –pamangkot ka tanan
kasi-uk gid kang mga ginaekspersyensyahan.
Hambal da: ‘kabuhi daw ariring’—tuod gid man
Ang ana nga paglibot di ta gid ra mapunggan
May panahon nga gaarapaw ang kalipayan
Mag-abot gani problema, kita ginangusyan.
Kun ikaw hina-hina lang, ikaw matabunan
Kang daw gatarithi lang nga mga paraligban
Hambal nanda… kun baskug gid ang imo nga dungan
Mga budlay nga hitabo, daw labay labay lang.
Pero sa tuod lang, sara lang gid ang sabat dyan
Mabaskug nga pagtuo ang aton kinahanglan
Bisan ano gakatabo, di ta paglipatan
Ang Diyos, aton Tatay, nga gapalangga sa tanan.
Kun may bagay gapapin-ut kang imu nga dughan
Kag hindi maributay kun sin-o ang agtunan
Kun tudok nga pangamuyo aton mamitlangan
Sigurado, pinsar kag pamatyag matawhayan.
Andut abi magsagi ta ka kunsumisyon man?
Ang tanan nga nagatabo may rason gid ri-an
Pirte man ka kumplikado nga di ta mahangpan
Diyos lang gid kaintindi kag kamaan… Tana lang!
~~~~~~~~~~~~~~~~~~~~~~~~~~~~~~~~~~~~~
Padumdom lang dya a….
Bisan ano pa aton ginaatubang, pabaskugon ta gid ang aton nga pagtuo mga Antiquena kag Antiqueno. Kita pa! :) Godbless gid….
 Add as favourites (4) |  Quote this article on your site | Views: 341
Only registered users can write comments.
Please login or register. Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved |
