Samtang nagatahaw ang diskusyon sa kontrobersya nga ZTE Broadband nagapangibabaw sa tulad ang isyu sa kakulangan kang suplay kang bugas sa Pilipinas. Epekto dya kang pagkontrol kang mga nasyon nga kato anay naga-eksport kang bugas kanaton partikular ang Vietnam kag Thailand. Luwas pa dya kara, epekto man dya kang industriyalisasyon tulad kang pag konbert kang mga taramnan kang paray sa mga sabdibisyon partikular sa mga probinsya kang Bulacan kag Pampanga. Tungod kadya nag-isot ang produksyon kang paray kag ginakinahanglan nga magdugang kang pondo ang aton gobyerno para mag-import kang amo nga produkto para tostosan ang ginalauman nga taggutom.
Ginalauman nga magtaas pa gid ang presyo kang bugas kada kilo halin sa 28 pataas sa 38 piso. Dugang pa gid, ang wara ti untat nga pagtaas kang krudo kag gasolina magaekspektar kita nga madugangan pa gid at pabug-at sa paras-anon kang mga kubos nga pomuluyo.
Pero, nangako si Agriculture Secretary Arthur Yap nga indi dapat magkabalaka ang publiko tungod ang problema sa kakulangan kang paray sarang nga solusyonan kang aton gobyerno. Dugang pa gid, nagpaabot kang mensahe si Yap sa mga tag-iya kang karan-an nga kung pwede kontrolon ang pagtugro kang kan-on sa mga kostumer agod nga indi mauyang. Sunod kana, duro nga kan-on ang indi maubos kang mga kostumer sa karan-an tungod ang iba sobra kon mag-order.
Tungod ka dya, ang gobyerno kang Pilipinas nagpaguha kang dugang nga pondo nga may kantidad nga 36.12 milyong dolyar para sa pagsuporta kang paggamit kang mga binhi nga manami. Suporta man dya sa mga mangunguma nga ginakulang sa kapital. Luwas pa dya kara, ang National Food Authority (NFA) nag-import kadya nga bulan kang 335,000 tonelada nga paray halin sa Vietnam, Thailand kag Pakistan.
Ginalauman man nga ang gobyerno magpanagtag kang mga libre nga bugas sa mga lugar nga pigado, ilabi ron gid sa mga probinsya kon magpadayon ang problema.
Mga Proyekto kang Kinaray-a.com
Sa mga nagligad nga mga binulan, duro nga mga hirikuton ang ginpangunahan kang Kinaray-a.com. Ang amo dya nga mga proyekto, bahin kang pagpatib-ong kang Kinaray-a kag kang Antique sa kabilogan.
High School Scholarship
Lima ka estudyante nga manug-eskwela sa High School ang pagataw-an kang scholarship kang Kinaray-a.com. May mga sponsors nga may mabinulawanun nga tagipusuon nga nagtugro kang anda nga financial support agud nga mabuligan ang mga kubos nga mga Antiqueño nga gusto magpadayon sa pag-eskwela. WVRAA 2008
Nangin official documenter ang Kinaray-a.com sa bag-o lang natapos nga WVRAA Meet. Sangka tikang agud makatugro kang updated kang preska nga balita sa mga Antiqueños sa bulig nga kalibutan. Nangin bahin ang website sa pagtugro kang awareness sa mga taho nahanugod sa estado kang Isports sa Antique.
Semana Santa sa Antique
Kaimaw kang bilog nga kalibutan, nagpakigbahin ang Kinaray-a.com sa pagpamalandong sa Semana Santa. Gincover kang website ang bantog nga Semana Santa sa Guinsang-an kang ang Stations of the Cross sa San Jose, Antique. Nakipag-imaw ang mga miyembro kang website sa mga Antiqueños sa pagreenact kang Stations of the Cross.
DYKA mabatian run sa Kinaray-a.com
Ang pagtuman sa sangka handum umpisa nga gintukod ang website amo ang pagpabati sa mga miyembro ilabi na gid sa abroad kang una kag nagaisarahanun nga institusyon kang radyo sa Antique. Ang DYKA ginastream run sa Kinaray-a.com agud mapabaskog pa gid ang awareness sa mga nagakatabo sa Antique.
