|
Posted by Manuel Jr E Magbanua
|
Una sa tanan ginatamyaw ko ang tanan nga mayad gid nga adlaw (ukon gabii) sa diin man kamo nga parte kang kalibutan. Tungud una ko diya nga pagsulat, imbes nga madiretso ako sa gintugyan kanakun nga topiko nga amo ang “entertainment” gusto ko nga gamitun anay diya nga kahigayunan para magpakilala kaninyo labin pa sa mga tawo nga kadya lang gid nakasalapu kang akun ngaran.
Wara ako ti kinaagman sa pagsulat. Bagay nga wara ko gid tantu nga natun-an hay bisan magbasa gani, wara ko gid nahiligan. Gin-aku ko diya nga responsibilidad tungud may gamay nga kudot sa akun tagipusuon nga nagatulod nga ipa-ambit ko man kaninyo ang akun natun-an sa patag kang TV, movie ukon entertainment industry. Ako nagahandum nga ayhan ma-“lingaw’ kag matudluan ko man kamo sa maniki nga paagi, kang mga bagay kag paglaylay sa mga hitabu sa sulod kang nasambit nga industriya.
Sa maabot nga Hunyo amo ang ikawalo nga anibersaryo kang pagsulod ko sa industriya kang telebisyon. Una ko nga obra pagkatapos ko sa kolehiyo. Nag-upisa ako bilang Boomman (taga kaput kag tagataya kang microphone sa mga artista) sa shooting kang mga programa kang ABS-CBN Foundation. Sumunod bilang Audioman hasta mangin Editor. Kang magresign ako kang Mayo 2006, duro pa nga posisyon ang akun gintun-an. Direktor, Producer, Cinematographer, Technical Director, etc.
Samtang ginasulat ko diya nga artikulo, hinali ko lang nariyalisar nga daw kabug-at gali kang obligasyon nga akun ginbaton. Entertainment? Kalingawan? Paano ako mangin “entertaining” sa iba? Sa diin ko ayhan puruton ang mga balita nga “ihain” ko kaninyo. Wara ako maghalin sa
“mainstream” nga kumunidad. Kadya palang, ginaapila ko dayun nga wara kamo ti mabasa kanakun nga mga bagay parte kay Piolo Pascual, Judy Ann Santos, etc., kapin pa ang mga parte sa personal nanda nga pangabuhi. Wara man ako ti ibalita parte sa mga Asianobela, telenobela kag kun anu-ano pa. Sigurado may iba nga tawo nga puwede maghatud kanga amo nga mga balita.Sa akun plano nga igatugyan ang paghimo kang pelikula nga kinaray-a.
Ang subject nga akun ipahayag amo ang may kuneksyon sa mga proseso kag maganyat ang tagsa tagsa nga mangin parte kanga akun ginahulagan nga kalibutan. Ang independent filmmaking. Ang pamangkot, entertaining ayhan ria para sa kalabanan? Diskubrihun
naton diya. |
