Gina-abi abi ang tanan sa pagbatun kag pagbasa kang “Sana-aw: ang Handurawan kang Antique sa mata kang Kinaray-a.com”. Bag-o nga barasahun halin sa Kinaray-a.com, sa pagsabat sa mga pamangkot, pagbulong kang kahidlaw, kag pagbulig pasundayag kang mga talento nga kina-adman. Kabay nga paagi sa Sana-aw inyo mabasa kag makita kang klaro kung daw ano kanami kang Antique, kag sa pihak nga lugar, inyo man maman-an kung ano ang kinahanglan panamiun. Ang kanami kang atun probinsya puede natun ipabugal kag ipamalita sa iban. Kag mayad man maman-an natun ang mga butang nga kinhanglan panamiun ukon pamayadun agud nga makipag-ugyon man kita kung ano ang mahimo natun ibulig sa atun probinsya. Tyempo run nga hindi lang kita magbatang sa kanamiun kang atun baybayun, kanta kag taramnan. Tyempo run nga magbugtaw kita para makita natun nga ang atun sosyedad maga-uswag lamang kung kita nakamaan kang mga tuud nga nagakaratabo kag makadesisyon kita kung ano ang atun mahimo para sa kaaraydan kang atun banwa.

Luwas sa atun probinsya, inyo man mabasa ang mga nagakaratabo sa mga Antikenyo sa iban nga lugar kang Pilipinas kag sa bilog nga kalibutan. “Kung sa diin ang Antikenyo, rugto man ang Antique- mabatian ang naga-ragumo nga Kinaray-a”. Gani nga ang atun mga pinalangga sa iban nga lugar magpartisipar man sa pagsulat rugya, para atun man mapamatian kung ano ang sa sulud kang anda paminsarun; sa anda taguipusuun may bahin gid kang Antique nga anda nadara sa anda nga pagpasimpalad sa marayu.

Ang mga balita halin sa Antique amo ang scholarship program para sa high school students, ang “Bulig Kabataan Project, Iskolar kang Kinaray-a.com”, kag ang pag-analisar kang educational program sa atun ni Goldie Chan. Sa bilog nga Pilipinas atun mabasa ang parte sa supply kang bugas nga dali run lang maubos, kag ang oil exploration sa Spratlys Island halin kay Jojo Paala.

Duro nga nagakaratabo sa bilog nga kalibutan nga nagaapekto man sa atun kabuhi. Gani rugya may balita kag mga pamensarun parte sa International Women’s Day ni Frances Alorro kag mga kababaihan kang K.com kag ang Earth Day celebration ni Anne Naig.
Marso kag Abril ang mga bulan kang graduation, kag pagdesisyon para sa sunod nga chapter kang kabuhi kang mga estudyante. Mabasa natun ang column ni Tranz parte sa ana experience bilang Antikenyo nga nagpasimpalad mag-eskuela sa Unibersidad kang Pilipinas, kag ang balor kang edukasyon.

Tuhay sa Antikenyo ang dugo kang pag-arte. Bunga dya kang kanami kang atun lugar, nga nagpukaw kang mga imahinasyon nga ginapasundayag sa pagsulat, pagkanta, pag-arte, pagpinta, fashion, kag kung ano pa nga media. Rugyan ang handum nga ma-capture ang beauty kang palibot sa papel, sa pinang, sa film, kag kung sa ano pa nga paagi. Gani sa Entertainment Section, ginapakilala ni Manie Magbanua, Jr. ang lawas na. Si Manie sara sa mga nangin successful sa film industry sa Pilipinas. Mabasa natun ang mga naga-karatabo sa kalibutan kang sine sa mata kang sangka insider. Gina-sugid man ni Anne Naig ang ana eksperyensa kag natun-an bilang myembro kang production staff para sa paghimo kang Indie movie nga “Pain Things”.

Sa mga masunod nga mga isyu duro pa ang mga topiko nga atun isulat rugya. Ginatinguha nga ang mga miyembro nga nabase sa Antique maging aktibo sa pagsulat kag pagsugid kang mga nagakaratabu sa atun, kag paano maapektuhan kang mga nagakaratabu sa iban nga lugar. Kabay nga ang Sana-aw maging instrumento agud mapabugtaw ang pagpalangga natun sa atun probinsya, kag makabulig sa pagpa-init kang atun baratyagun nga mag-tulud kanatun para maghulag. Para sa ikamayad kang tanan kadya; kag para man sa buasdamlag kang atun mga bata kag mga kaapuhan.

Kabay nga sa una nga isyu kang Sana-aw mangin-mabaskug ang inyo interes kag padayun ninyo nga suportahan ang hirikuton nga dya. Kita mismo ang handurawan kang atun probinsya. Gani gina-ambit ang tanan nga magsumitir kang mga balita parte sa inyo kabuhi ukon mga sinulatan. Puede isulat sa Kinaray-a, Tagalong/Filipino, ukon English. Kabay nga sa inyo nga pagbasa matugruan kamo kang sana-aw nga panuruk parte sa kabuhi rugya sa kalibutan, ilabi na gid bilang Antikenyo.