Sangka tuig kag anum ka bulan ang nagligad kang gintukod ang Kinaray-a.com. Kadasig lang kang mga inadlaw, kag antis natun marealisar duro run gali nga mga inadlaw ang nag-agi. Duro-duro run ang inagyan kang pinakabaskog kang influential nga website nga para sa mga Antiqueño. Sin-o bala ang naghunahuna nga mangin paagi dya sa pagtipon kang mga Antiqueño sa lain-lain nga palibot kang kalibutan?
SANA-AW: ang Handurawan kang Antique sa mata kang Kinaray-a.com
Posted by Arlene Nietes Satapornvanit
Gina-abi abi ang tanan sa pagbatun kag pagbasa kang “Sana-aw: ang Handurawan kang Antique sa mata kang Kinaray-a.com”. Bag-o nga barasahun halin sa Kinaray-a.com, sa pagsabat sa mga pamangkot, pagbulong kang kahidlaw, kag pagbulig pasundayag kang mga talento nga kina-adman. Kabay nga paagi sa Sana-aw inyo mabasa kag makita kang klaro kung daw ano kanami kang Antique, kag sa pihak nga lugar, inyo man maman-an kung ano ang kinahanglan panamiun. Ang kanami kang atun probinsya puede natun ipabugal kag ipamalita sa iban. Kag mayad man maman-an natun ang mga butang nga kinhanglan panamiun ukon pamayadun agud nga makipag-ugyon man kita kung ano ang mahimo natun ibulig sa atun probinsya. Tyempo run nga hindi lang kita magbatang sa kanamiun kang atun baybayun, kanta kag taramnan. Tyempo run nga magbugtaw kita para makita natun nga ang atun sosyedad maga-uswag lamang kung kita nakamaan kang mga tuud nga nagakaratabo kag makadesisyon kita kung ano ang atun mahimo para sa kaaraydan kang atun banwa.
