09-08-2007 04:43

Salamat sa mga sintimento, matuod ria ang ginahambal mo nga kauna abunansya ang kawayangan, kabukidan kag kadagatan. Basta matandos lang magpanigayon, indi gid mawad-an ang sulod kang Kuron. Bisan matuod malisod ang cuarta pangita-on pero masadya ang ang mga kabataan kag mabinuligon.  
 
Sugpon ka mga sipal kauna nga wara mo masambit. 
 
Sipa kang mga bata nga babahi:  
Tintin baka, papel nga bata-bata (paper dolls), barabaligya -dahon kang ubi ginatangkas-tangkas nga daw buyo, magpang lipstick kang istiwitis, mag eye brow kang uring, magsuksok kang panik ka puso himo-on nga sapatos. Kag magbalay-balay. Nawili ron ria kag magsagi ka sipal. 
 
Sipal ka mga bata nga lalaki: 
Pa-upas ka damang, saka sa kudal kag magbisikta nga may inutod nga kahoy sa kahig na. Taraktarak kag magpadalagan kang gamay nga ariring nga may dikorasyon.  
 
Ang mga sipal kang tanan: Padosdos sakay sa buhos kang bunga, Birahon, lantay-lantay okon tubig-tubig, syato - tikyaw okon pikyaw. Soft ball sa taramnanan kon natubas ron ang ani sa panahon kang maadlaaw. Amo ria ang pinaka playground kauna.  
 
Napakasadya ilabi na kon sanag-bulan. Nagasinggiyaw ang mga bata pati mga mal-am naga-intra. Nasadyahan ang tanan.  
 
Matuod nga maiwat ang sarakyan kauna pero matandos ang tanan magpanaw. Matuod ra abunansya sa laswahon kag mga kararuton. Mga matandos ang mga bata kauna mabunoligon ilabi na sa mga kamal-aman.  
 
Kauna kon makita mo ang mal-am nga may ginalokdo, ibul-on gid ria kang pamatan-on kag buligan ka dara. Ti, kon mabuligan gani, ang hambal kang mal-am amo: "Baw, kaloy-an gid ikaw kang Mahal nga Makaako hay mabinuligon ikaw nga bata." Ti, blessing ron gali to nga wara mo ria pangayo-a.  
 
Raad no ang mga urehingtubo kon pwede nanda mapadayon ang ugali nga mabinoligon kag may ambisyon. Magahublag gid sa kauswagan. Seguro ang T.V., Playstation, Billiar kag Baraha, matalikdan hay may handom mong nga dapat dab-otun.  
 
Ang kalingawan mayad ria. Pero indi pagpakontrol ang imong kaugalingon, hay si kalingawan dyan lang ra naga-estasyon. Kaangay ria sa Duyan, Sakyi bala kag maghabughabog wara ti paagtonan. Mahulog pa ikaw kon magapok ron.  
 
Amo ria mga kabataan himurat gid. Wara pag-una ang ngusol, permi gid baya sa Urihi ang paghinulsol. Hurubaton kang mga mal-am kauna "Ay maan kadton mo man siko mo indi madab-ot." Maghiwa-os ss pag-uswag hay may kadalag-an kamo nga maabutan kag kalipay. 
 
Hala!Hublag gid mga pamatan-on, kamas sa pagtuon. Hay kamo ang paglaum kang aton nasyon.  
 
 
 

http://Kinaray-a.com

Guest